ກອງປະຊຸມປະເມີນພະນັກງານ-ລັດຖະກອນ ຂອງຄະນະໂຄສະນາອົບຮົມ ແຂວງໄຊສົມບູນ

ລາຍລະອຽດ

ສ້າງຂື້ນເມື່ອ ວັນຈັນ, 12 ທັນວາ 2022 03:13

ຂຽນໂດຍ ສິດນ້ອຍ ນາມມີໄຊ

• ໃນຕອນບ່າຍຂອງວັນທີ 6 ທັນວາ 2022 ນີ້ ຄະນະໂຄສະນາອົບຮົມ ແຂວງໄຊສົມບູນ ໄດ້ຈັດກອງປະຊຸມ ປະເມີນຜົນສະເພາະຂອງພະນັກງານ-ລັດຖະກອນ ຂະແໜງໂຄສະນາ-ປາຖະກະຖາ ຄະນະໂຄສະນາອົບຮົມ ແຂວງ ຢູ່ທີ່ຫ້ອງຫົວໜ້າໂຄສະນາອົບຮົມ ແຂວງ ໂດຍການເປັນປະທານຂອງທ່ານ ຢ່າຊົ່ງວ່າ ຢົງມາ ຮອງຫົວໜ້າຄະນະໂຄສະນາອົບຮົມ ແຂວງ ມີຫົວໜ້າຂະແໜງ, ຮອງຂະແໜງ ພ້ອມດ້ວຍ ພະນັກງານວິຊາການ ແລະ ຄະນະຮັບຜິດ ຊອບການປະເມີນເຂົ້າຮ່ວມ.
• ໃນໂອກາດນີ້ ປະທານກອງປະຊຸມໄດ້ມີຄຳເຫັນຊີ້ນໍາຕໍ່ກອງປະຊຸມ ເຊິ່ງທ່ານໄດ້ຮຽກຮ້ອງມາຍັງຫົວໜ້າຂະແໜງ, ຮອງຂະແໜງ ແລະ ບັນດາພະນັກງານວິຊາການພາຍໃນຂະແໜງໂຄສະນາ-ປາຖະກະຖາ ຈົ່ງພ້ອມກັນປະກອບຄຳຄິດເຫັນ ຕຳນິຕິຊົມດ້ວຍຄວາມຈິງໃຈ ເພື່ອປັບປຸງ, ກໍ່ສ້າງພະນັກງານດຳລົງຕຳແໜ່ງບໍລິຫານປະເພດ 6 ເພື່ອໃຫ້ໄດ້ຜູ້ທີ່ມີຄວາມຮູ້ຄວາມສາມາດຕາມຄາດໝາຍທີ່ວາງໄວ້. ນອກຈາກນີ້ ຄະນະຈັດຕັ້ງພິທີກໍ່ໄດ້ຜ່ານຂໍ້ຕົກລົງຂອງຫົວໜ້າຄະນະໂຄສະນາອົບຮົມແຂວງ ສະບັບເລກທີ 680/ຄອຂ.ຊບ ລົງວັນທີ 1 ທັນວາ 2022 ວ່າດ້ວຍການແຕ່ງຕັ້ງຄະນະຮັບຜິດຊອບຊີ້ນໍາລວມ ແລະ ຄະນະຮັບຜິດຊອບປະເມີນຜົນສະເພາະ ຂອງການຈັດຕັ້ງບ່ອນສັງກັດ ກ່ອນການແຕ່ງຕັ້ງດຳລົງຕຳແໜ່ງໃໝ່ ທັງນີ້ ກໍເພື່ອຮັບປະກັນໃຫ້ກອງປະຊຸມ ໄດ້ດໍາເນີນໄປດ້ວຍລັກສະນະສ້າງສັນ, ເລິກເຊິ່ງ, ເປັນລະບົບ, ຖືກຕ້ອງ ແລະ ສອດຄ່ອງກັບແນວທາງນະໂຍບາຍຂອງພັກ, ກົດໝາຍຂອງລັດ, ຮັບປະກັນຄວາມເປັນເອກະພາບ ແລະ ຖືກຕ້ອງຕາມສະພາບຄວາມເປັນຈິງ. ຈາກນັ້ນ ກອງປະຊຸມໄດ້ດໍາເນີນການປະເມີນຜົນດ້ວຍການຂຶ້ນຜ່ານໃບເກັບກ່ຽວຜົນງານ ຕາມແຕ່ລະຂັ້ນຕອນ ແລະ ເນື້ອໃນມາດຕະຖານທີ່ໄດ້ກໍານົດໄວ້ ກໍຄືການຍົກເອົາຜົນສໍາເລັດ ໃນໜ້າທີ່ວຽກງານໃດໜຶ່ງ ທີ່ຂັ້ນເທິງມອບໝາຍໃຫ້ຕົນຮັບຜິດຊອບ ລວມທັງຈຸດດີ, ຈຸດອ່ອນ, ຂໍ້ຄົງຄ້າງຕ່າງໆ ພ້ອມດຽວກັນນັ້ນໝູ່ຄະນະກໍໄດ້ປະກອບຄຳຄິດເຫັນ, ຕີລາຄາ ແລະ ພ້ອມກັນປັບ ປຸງຊ່ວຍເຫຼືອເຊິ່ງກັນ ແລະ ກັນ ເພື່ອຮັບປະກັນໃຫ້ວຽກງານມີຄວາມກ້າວໜ້າ ທັງໄດ້ຮັບຜົນສໍາເລັດ ດີຂຶ້ນກ່ວາເກົ່າ.

------@@@--------

ຂຽນໂດຍ: ສິດນ້ອຍ ນາມມີໄຊ

• < ຕໍ່ໄປ
• ຕໍ່ໄປ >