ພິທີປາຖະກະຖາວັນເກີດ ປະທານ ສຸພານຸວົງ ຄົບຮອບ 114 ປີ ແລະ ເຜີິຍແຜ່ເຊື່ອມຊຶມ ເອກະສານທີ່ສຳຄັນ

ລາຍລະອຽດ

ສ້າງຂື້ນເມື່ອ ວັນພຸດ, 26 ກໍລະກົດ 2023 08:36

ຂຽນໂດຍ ສິດນ້ອຍ ນາມມີໄຊ

ແຂວງໄຊສົມບູນໄດ້ຈັດພິທີ ປາຖະກະຖາວັນເກີດ ປະທານ ສຸພາບນຸວົງ ຄົບຮອບ 114 ປີ ແລະ ເຜີຍແຜ່ເຊື່ອມຊຶມ ເອກະສານທີ່ສຳຄັນ ໃຫ້ແກ່ພະນັກງານ-ລັດຖະກອນ ພາຍໃນແຂວງ.

===========@@===========

• ກອງປະຊຸມ ເຜີຍແຜ່-ເຊື່ອມຊຶມ ຜົນສຳເລັດການພົບປະສອງກົມການເມືອງ ລາວ-ຫວຽດນາມ, ຜົນສຳເລັດການໄປຢ້ຽມຢາມ ທາງລັດຖະກິດ ສປ ຈີນ ຂອງສະຫາຍ ເລຂາທິການໃຫຍ່ ປະທານປະເທດ ແຫ່ງ ສປປ ລາວ, ການພົບປະສຸດຍອດຄັ້ງທີ 13 ລະຫວ່າງ ພັກປະຊາຊົນລາວ ກັບ ພັກປະຊາຊົນກຳປູເຈຍ ປີ 2023 ແລະ ວັນຄ້າຍວັນເກີດປະທານສຸພານຸວົງ ຄົບຮອບ 114 ປີ ໄດ້ຈັດຂຶ້ນໃນຕອນເຊົ້າຂອງວັນທີ 18 ກໍລະກົດ 2023 ນີ້ ທີ່ຫ້ອງປະຊຸມຫ້ອງວ່າການ ແຂວງໄຊສົມບູນ ໂດຍການເປັນປະທານ ຂອງທ່ານ ພອຍຄຳ ຮຸ່ງບຸນຍວງ, ເຈົ້າແຂວງໄຊສົມບູນ, ມີຄະນະປະຈຳພັກແຂວງ, ຕະຫລອດຮອດຄະນະພັກ, ຄະນະພະແນກ, ອົງການ, ກົມກອງ, ຫົວໜ້າຂະແໜງການ ອອ້ມຂ້າງແຂວງ ພ້ອມດ້ວຍຄະນະປະຈຳພັກ ເມືອງອະນຸວົງ ເຂົ້າຮ່ວມ.
• ໃນກອງປະຊຸມ ທ່ານ ເຈົ້າແຂວງໄຊສົມບູນ ໄດ້ເຜີຍແຜ່ເຊື່ອມຊຶມ ມະຕິກອງປະຊຸມຄົບຄະນະ ຄັ້ງທີ 6 ຂອງຄະນະບໍລິຫານງານສູນກາງພັກ ສະໄໝທີ XI ຊຶ່ງໄດ້ຄົ້ນຄວ້າ, ປຶກສາຫາລື ແລະ ໃຫ້ທິດຊີ້ນຳຕໍ່ບັນຫາສຳຄັນ ເປັນຕົ້ນແມ່ນຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ, ແຜນງົບປະມານ ແລະ ແຜນເງິນຕາ 6 ເດືອນຕົ້ນປີ ແລະ ຄາດຄະເນທິດທາງແຜນວຽກຈຸດສຸມ 6 ເດືອນທ້າຍປີ ຕິດພັນກັບການຕີລາຄາການປະຕິບັດວາລະແຫ່ງຊາດ. ພ້ອມນີ້ວຽກງານປ້ອງກັນຄວາມສະຫງົບກໍໄດ້ຮັບການເອົາໃຈໃສ່ປັບປຸງ, ພັດທະນາ, ຍົກລະດັບຂຶ້ນ ໂດຍສາມາດສະກັດກັ້ນ, ລະງັບ ແລະ ແກ້ໄຂບັນຫາຕ່າງໆ ທີ່ຈະເກີດຂຶ້ນ ພ້ອມທັງເອົາໃຈໃສ່ສະກັດກັ້ນ, ປ້ອງກັນ, ແກ້ໄຂໜໍ່ແໜງ, ປັດໄຈ ທີ່ຈະກໍ່ໃຫ້ເກີດຄວາມບໍ່ສະຫງົບ ທາງສັງຄົມ-ການເມືອງ ໃຫ້ທັນສະພາບການ. ນອກນີ້ ຍັງໄດ້ສຸມໃສ່ການນຳພາ-ຊີ້ນຳ ແຕ່ນີ້ຮອດກອງປະຊຸມ ຄົບຄະນະບໍລິຫານງານສູນກາງພັກ ຄັ້ງທີ 7 ສະໄໝທີ XI ໂດຍແນໃສ່ໃຫ້ຄະນະພັກກະຊວງ, ອົງການ, ແຂວງ ເປັນເຈົ້າການໃນການຊີ້ນຳການຈັດຕັ້ງເຊື່ອມຊຶມ, ຜັນຂະຫຍາຍ ແລະ ຈັດຕັ້ງປະຕິບັດ ມະຕິກອງປະຊຸມ ໃຫ້ເຂົ້າສູ່ຂະບວນການຕົວຈິງ ພາຍໃຕ້ການຊີ້ນຳ, ຕິດຕາມ, ກວດກາ ແລະ ຊຸກຍູ້ ຢ່າງເປັນປົກກະຕິ, ເພີ່ມທະວີຄວາມຮັບຜິດຊອບການເມືອງ ຍົກສູງຄວາມຮັບຜິດຊອບການປະຕິບັດພາລະບົດບາດ, ໜ້າທີ່ ຂອງພະນັກງານ, ສະມາຊິກພັກ ໂດຍສະເພາະແມ່ນການແກ້ໄຂບັນຫາຫຍຸ້ງຍາກ ຂອງເສດຖະກິດ, ໄພວ່າງງານເປັນຕົ້ນ. ຈາກນັ້ນທ່ານຍັງໄດ້ປາຖະກະຖາ ວັນເກີດປະທານ ສຸພານຸວົງ ຄົບຮອບ 114 ປີ ຄື ວັນທີ 13 ກໍລະກົດ 1909 ຫາ ວັນທີ 13 ກໍລະກົດ 2023 ຊຶ່ງປະທານ ສຸພານຸວົງ ແມ່ນຜູ້ນຳສູງສຸດຄົນໜຶ່ງ ທີ່ຕິດພັນກັບຂະບວນການປະຕິວັດ ທ່ານໄດ້ຮ່ວມກັບຜູ້ນຳຄົນອື່ນໆ ນຳພາຂະບວນການຕໍ່ສູ້ປົດປ່ອຍຊາດ ກໍຄືປົກປັກຮັກສາ ແລະ ສ້າງສາປະເທດຊາດ, ປະທານ ສຸພານຸວົງ ເປັນສັນຍາລັກຂອງຄວາມສາມັກຄີ ຊຶ່ງເພິ່ນເປັນຜູ້ທີ່ມີນ້ຳໃຈຮັກຊາດອັນສູງສົ່ງ, ຍອມເສຍສະຫຼະທຸກຢ່າງເພື່ອປະເທດຊາດ ແລະ ເພື່ອປະຊາຊົນ.
• ໂອກາດນີ້ໃນກອງປະຊຸມ ຍັງໄດ້ຮັບຟັງການເຜີຍແຜ່-ເຊື່ອມຊຶມ ຜົນສຳເລັດການພົບປະ 2 ກົມການເມືອງ ລາວ-ຫວຽດນາມ ປະຈຳປີ 2023, ຜົນສຳເລັດການຢ້ຽມຢາມ ສປ ຈີນ ທາງລັດຖະກິດ ຂອງສະຫາຍ ເລຂາທິການໃຫຍ່ ປະທານປະເທດ ແຫ່ງ ສປປ ລາວ ແລະ ຜົນສໍາເລັດການພົບປະສຸດຍອດ ຄັ້ງທີ 13 ລະຫວ່າງ ພັກປະຊາຊົນລາວ ກັບ ພັກປະຊາຊົນກຳປູເຈຍ ໃນປີ 2023 ທັງນີ້ ກໍເພື່ອເຮັດໃຫ້ພະນັກງານ-ລັດຖະກອນ ພາຍໃນແຂວງໄຊສົມບູນ ໄດ້ເຊື່ອມຊຶມ ຮັບຮູ້, ເຂົ້າໃຈ ໂດຍສະເພາະແມ່ນ ຄະນະພັກ-ຄະນະບັນຊາ ກຳລັງ ປກສ ປກຊ ເພື່ອນໍາເອົາເນື້ອໃນຈິດໃຈຂອງບັນດາເອກະສານ ໃນຄັ້ງນີ້ ໄປຈັດຕັ້ງຜັນຂະຫຍາຍ ສູ່ລວງເລິກ ແລະ ລວງກວ້າງ ໃຫ້ແກ່ບັນດາສະມາຊິກພັກ, ພະນັກງານ ພາຍໃນຂອບເຂດຄວາມຮັບຜິດຊອບຂອງຕົນ ໃຫ້ກຳໄດ້ ແລະ ພ້ອມກັນນຳໄປຈັດຕັ້ງປະຕິບັດ ພາຍໃນຂອບເຂດວຽກງານຂອງຕົນ ໃຫ້ກາຍເປັນການກະທຳຕົວຈິງ ແລະ ມີປະສິດທິພາບ. ຄຽງຄູ່ກັບການຮັກສາມູນເຊື້ອການພົວພັນຮ່ວມມື ແລະ ເສີມຂະຫຍາຍຄວາມໄວ້ເນື້ອເຊື່ອໃນ ທາງດາ້ນການເມືອງ ໃຫ້ເລິກເຊິ່ງແໜ້ນແຟ້ນ ຂອງການພົວພັນລາວ-ຈີນ ໂດຍຕິດກັບການເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ ຄວາມສາມັກຄີ ແລະ ການຮ່ວມມືຮອບດ້ານ ລະຫວ່າງ 2 ພັກ, 2 ລັດ ແລະ ປະຊາຊົນ 2 ຊາດລາວ-ກຳປູເຈຍ, ສືບຕໍ່ສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ໃຫ້ຢືນຍົງຕະຫລອດໄປ.

• < ຕໍ່ໄປ
• ຕໍ່ໄປ >