ປະຊຸມສ່ອງແສງລາຍງານການເຄື່ອນໄຫວວຽກງານເວັບໄຊສ ປະຈຳໄຕມາດ II ປີ 2023

ລາຍລະອຽດ

ສ້າງຂື້ນເມື່ອ ວັນພະຫັດ, 27 ກໍລະກົດ 2023 03:53

ຂຽນໂດຍ ສິດນ້ອຍ ນາມມີໄຊ

ຄະນະໂຄສະນາອົບຮົມແຂວງ ເຂົ້າຮ່ວມກອງປະຊຸມສ່ອງແສງລາຍງານການເຄື່ອນໄຫວວຽກງານຜ່ານສື່ເອເລັກໂຕຼນິກ (ເວັບໄຊສ).

  ===========@@===========

• ໃນຕອນເຊົ້າຂອງວັນທີ 26/ 7/ 2023 ຄະນະໂຄສະນາອົບຮົມແຂວງ ໄດ້ເຂົ້າຮ່ວມ ກອງປະຊຸມສ່ອງແສງລາຍງານການເຄື່ອນໄຫວວຽກງານຜ່ານສື່ເອເລັກໂຕຼນິກ (ເວັບໄຊສ) ຄະນະໂຄສະນາອົບຮົມແຂວງ ປະຈໍາໄຕມາດ II (4-5-6) 2023 ແລະ ທິດທາງແຜນການເຄື່ອນໄຫວວຽກງານຜ່ານສື່ເອເລັກໂຕຼນິກ (ເວັບໄຊສ) ໃນໄຕມາດ III (7-8-9) ປີ2023. ໂດຍຜ່ານ Video conference.
• ໂດຍພາຍໃຕ້ການເປັນປະທານຂອງ ທ່ານ ນາງ ວິລະວອນ ພັນທະວົງ ຄະນະປະຈໍາພັກ ຮອງຫົວໜ້າຄະນະໂຄສະນາອົບຮົມສູນກາງພັກ ຜູ້ຊີ້ນໍາວຽກງານກົມຂໍ້ມູນຂ່າວສານ ແລະ ຝືກອົບຮົມ. ໂດຍເຂົ້າຮ່ວມຮັບຟັງໃນຄັ້ງນີ້ປະກອບມີ 04 ທ່ານຄື:

1. ທ່ານ ຢ່າຊົ່ງວ່າ ຢົງມາ ຮອງຫົວໜ້າຄະນະໂຄສະນາອົບຮົມແຂວງ ຜູ້ຊີ້ນໍາວຽກງານເວັບໄຊສ
2. ທ່ານ ໃຈ ຢ່າງ ຮອງຫົວໜ້າຂະແໜງສັງລວມ ແລະ ຂໍ້ມູນຂ່າວສານ
3. ທ່ານ ຕູ້ລໍ່ ໂຊ້ຕູ້ກີ ວິຊາການ ຂະແໜງບໍລິຫານ
4. ທ່ານ ສິດນ້ອຍ ນາມມີໄຊ ວິຊາການ ຂະແໜງໂຄສະນາ

• ໃນວາລະກອງປະຊຸມ ທ່ານ ຢ່າຊົ່ງວ່າ ຍົງມາ ໄດ້ລາຍງານການຈັດຕັ້ງເຄື່ອນໄຫວ ວຽກງານຜ່ານສື່ເອເລັກໂຕຼນິກ (ເວັບໄຊສ) ປະຈໍາໄຕມາດ II ແລະ ທິດທາງແຜນການເຄື່ອນໄຫວ ໃນໄຕມາດ III ຂອງຄະນະໂຄສະນາອົບຮົມແຂວງໄຊສົມບູນຕໍ່ກອງປະຊຸມ. ຫຼັງຈາກນັ້ນ ກໍ່ໄດ້ຮັບຝັງການລາຍງານຂອງບັນດາແຂວງ ໃນທົ່ວປະເທດ ຢ່າງເປັນຂະບວນຟົດຟືນ.
• ໃນຕອນທ້າຍຂອງກອງປະຊຸມ, ທ່ານ ນາງ ວິລະວອນ ພັນທະວົງ ຄະນະປະຈໍາພັກ, ຮອງຫົວໜ້າຄະນະໂຄສະນາອົບຮົມສູນກາງພັກ, ຜູ້ຊີ້ນໍາວຽກງານຂໍ້ມູນຂ່າວສານ ແລະ ຝຶກອົບຮົມ ກໍໄດ້ມີຄໍາເຫັນໂອ້ລົມ ຕໍ່ກອງປະຊຸມດັ່ງກ່າວ ເຊິ່ງມີເນື້ອໃນດັ່ງນີ້:

1. ຄະນະໂຄສະນາອົບຮົມແຂວງຕ້ອງເປັນເຈົ້າການເລືອກເຟັ້ນພະນັກງານຜູ້ທີ່ມີພອນສະຫວັນ, ມີຄວາມຮູ້, ຄວາມສາມາດມາຮັບຜິດຊອບວຽກງານດັ່ງກ່າວ ຜູ້ທີ່ຖືກແຕ່ງຕັ້ງຈະເປັນຜູ້ເກົ່າ ຫຼື ຜູ້ໃໝ່ຕ້ອງໄດ້ເອົາໃຈໃສ່ຍາດແຍ່ງຄວາມຮູ້ນໍາຜູ້ຮັບຜິດຊອບທາງສູນກາງ ເພື່ອພັດທະນາວຽກງານໃຫ້ສໍາເລັດໄດ້ຮັບໝາກຜົນທີ່ດີ.
2. ຕິດຕາມກວດກາຄືນການເຄື່ອນໄຫວເທິງຫນ້າກະດານຂ່າວເອເລັກໂຕຣນິກ (ເວັບໄຊ) ຂອງ ແຂວງຕົນໃນບັນດາເມນູ, ຄໍລໍາຕ່າງໆ ມີບົດຂ່າວ, ບົດຄວາມ ຫຼື ຂໍ້ມູນຕ່າງໆ ມີການເຜີຍແຜ່ເປັນປົກກະຕິ.
3. ພະຍາຍາມສ້າງການພົວພັນ ລະຫວ່າງຄະນະໂຄສະນາອົບຮົມແຂວງ ແລະ ຄະນະໂຄສະນາ ອົບຮົມເມືອງ ສ້າງການຫັນປ່ຽນໃຫ້ເມືອງມີການປະສານຂໍ້ມູນ ບົດຂ່າວການເຄື່ອນໄຫວຂອງເມືອງ ລົງໃນເວັບໄຊທັງເປັນການກໍ່ສ້າງພະນັກງານ ໃນຂັ້ນເມືອງໄດ້ຮຽນຮູ້ ແລະ ພ້ອມກັນຫັນເປັນທັນສະໄໝ ໃນວຽກງານໂຄສະນາອົບຮົມ ບໍ່ໃຫ້ບັນດາແອັດມິນແຂວງຄອງຄອຍແຕ່ສູນກາງລົງໄປຊ່ວຍ.
4. ກົນໄກການປະສານລະຫວ່າງຜູ້ຮັບຜິດຊອບເວັບໄຊຄະນະໂຄສະນາອົບຮົມແຂວງ ແລະ ທີມງານ ທາງສູນກາງ ຂໍໃຫ້ເພີ່ມທະວີຂື້ນຕື່ມ, ແຂວງໃດທີມີຂໍ້ຄົງຄ້າງກໍ່ໃຫ້ຮີບຮ້ອນສະເໜີ ຫຼື ອາດຈະປະຊຸມທາງໄກຮ່ວມກັນ ເພື່ອຫາວິທີແກ້ໄຂບໍ່ໃຫ້ວຽກງານພວກເຮົາຢຸດສະງັດ ພະຍາຍາມຫັນມານໍາໃຊ້ເຕັກໂນໂລຊີ ເຂົ້າໃນການປະຕິບັດຫນ້າທີ່ວຽກງານໃຫ້ເກີດປະໂຫຍດສູງສຸດ.
5. ໃຫ້ບັນດາແຂວງສືບຕໍ່ປັບປຸງຂອດທີ່ຍັງຄົງຄ້າງໃຫ້ສໍາເລັດ ແລ້ວສະຫຼຸບລາຍງານສົ່ງໃຫ້ທາງສູນກາງ ພ້ອມທິດທາງແຜນການໃນຕໍ່ຫນ້າ.

• < ຕໍ່ໄປ
• ຕໍ່ໄປ >