ກອງປະຊຸມໃຫ່ຍກໍາມະບານຮາກຖານຄະນະໂຄສະນາອົບຮົມແຂວງໄຊສົມບູນ ຄັ້ງທີ II

ລາຍລະອຽດ

ສ້າງຂື້ນເມື່ອ ວັນພະຫັດ, 26 ຕຸລາ 2023 04:34

ຂຽນໂດຍ ສິດນ້ອຍ ນາມມີໄຊ

• ໃນຕອນເຊົ້າຂອງວັນທີ 24 ຕຸລາ 2023 ນີ້ ກໍາມະບານຮາກຖານຄະນະໂຄສະນາອົບຮົມແຂວງໄຊສົມບູນ ໄດ້ເປີດກອງປະຊຸມໃຫ່ຍຄັ້ງທີ II ຂຶ້ນຢູ່ທີ່ຫ້ອງປະຊຸມຂອງຄະນະໂຄສະນາອົບຮົມແຂວງ ໂດຍການເປັນປະທານເຂົ້າຮ່ວມຂອງ ສະຫາຍ ຄົວຈັ້ງ ດຣາເຊັ່ງ ກຳມະການພັກແຂວງ, ເລຂາໜ່ວຍພັກ, ຫົວໜ້າຄະນະໂຄສະນາອົບຮົມແຂວງ, ສະຫາຍ ເນັ່ງຢ່າງ ໃຈຫວັງໝັ້ນ ຄະນະບໍລິຫານງານສູນກາງສະຫະພັນກຳມະບານລາວ, ປະທານ ຄະນະບໍລິຫານງານສະຫະພັນກຳມະບານແຂວງ , ສະຫາຍ ລີວອນ ເລັ່ງຊົ່ງ ປະທານ ກໍາມະບານຮາກຖານ ຄະນະໂຄສະນາອົບຮົມແຂວງ, ມີປະທານ - ຮອງປະທານກຳມະບານຮາກຖານຈາກກຸ່ມການເມືອງ ພ້ອມດ້ວຍບັນດາສະມາຊິກກຳມະບານພາຍໃນກຳມະບານຮາກຖານຄະນະໂຄສະນາອົບຮົມແຂວງ ເຂົ້າຮ່ວມ ທັງໝົດ: 17 ສະຫາຍ, ຍິງ 3 ສະຫາຍ.
• ໃນກອງປະຊຸມ ໄດ້ຮັບຟັງການຜ່ານບົດລາຍງານການເມືອງ ທັງສອງພາກ ແລະ ບົດສໍາຫຼວດການນໍາພາລວມ ຂອງຄະນະກໍາມະບານຮາກຖານຄະນະໂຄສະນາອົບຮົມແຂວງໄລຍະ 5 ປີ ຜ່ານມາ ແລະ ວາງທິດທາງແຜນການໃນຕໍ່ໜ້າກອງປະຊຸມ ຊຶ່ງໄດ້ຍົກໃຫ້ເຫັນຜົນງານຫຼາຍດ້ານທີ່ພົ້ນເດັ່ນ ເປັນຕົ້ນແມ່ນໄດ້ເອົາໃຈໃສ່ສຶກສາອົບຮົມການເມືອງ-ແນວຄິດ ເຕົ້າໂຮມຄວາມສາມັກຄີພາຍໃນ-ພາຍນອກ, ເຮັດໃຫ້ສະມາຊິກກຳມະບານທຸກສະຫາຍມີສະຕິຕື່ນຕົວຕໍ່ກັບຄະນະພັກ, ຄະນະນໍາ, ເອົາໃຈໃສ່ນໍາພາ-ຊີ້ນໍາໃຫ້ແກ່ຖັນແຖວສະມາຊິກກຳມະບານຄົ້ນຄວ້າຊອກຮູ້ຮໍ່າຮຽນແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ປັບປຸງແບບແຜນວິທີເຮັດວຽກຕາມພາລະບົດບາດ, ສິດ ແລະ ໜ້າທີ່, ມີຄວາມຫ້າວຫັນ ຕໍ່ໜ້າທີ່ວຽກງານທີ່ຕົນເອງຮັບຜິດຊອບ ແລະ ສາມາດຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າໄດ້ດີຕະຫຼອດມາ.
• ກອງປະຊຸມດັ່ງກ່າວຍັງໄດ້ຜ່ານລະບຽບຂອງການປ່ອນບັດເລືອກຕັ້ງ ແລະ ມາດຖານເງື່ອນໄຂຂອງ ກໍາມະບານຮາກຖານຄະນະ ຊຸດໃໝ່, ພ້ອມກັນນັ້ນຍັງໄດ້ໃຊ້ສິດປະຊາທິປະໄຕຂອງຕົນເພື່ອປ່ອນບັດ ຄັດເລືອກເອົາຄະນະກຳມະບານຮາກຖານຊຸດໃໝ່ ໄດ້ມີຜູ້ລົງສະໝັກ 5 ສະຫາຍ, ໃນນັ້ນເລືອກເອົາ 3 ສະຫາຍ, ໃນກອງປະຊຸມ ຄັ້ງປະຖົມມະລຶກ ໄດ້ຕົກລົງເຫັນດີເປັນເອກະສັນເລືອກເອົາ ສະຫາຍ ລີວອນ ເລັ່ງຊົ່ງ ເປັນປະທານ, ສະຫາຍ ໃຈຢ່າງ ເປັນຮອງປະທານ, ທັງເປັນປະທານກວດກາ ແລະ ສະຫາຍ ເນັ້ງທໍ່ ໄຊຈູ ເປັນຄະນະ.
• ຕອນທ້າຍ ສະຫາຍ ຄົວຈັ້ງ ດຣາເຊັ່ງ ກຳມະການພັກແຂວງ, ເລຂາໜ່ວຍພັກ, ຫົວໜ້າຄະນະໂຄສະນາອົບຮົມແຂວງ, ສະຫາຍ ເນັ່ງຢ່າງ ໃຈຫວັງໝັ້ນ ຄະນະບໍລິຫານງານສູນກາງສະຫະພັນກຳມະບານລາວ, ປະທານ ຄະນະບໍລິຫານງານສະຫະພັນກຳມະບານແຂວງ ຊຶ່ງທັງສອງສະຫາຍ ຍັງໄດ້ຍ້ອງຍໍຊົມເຊີຍຕໍ່ຜົນງານທີ່ກໍາມະບານຮາກຖານໄດ້ເຄື່ອນໄຫວຈັດຕັ້ງປະຕິບັດວຽກງານກຳມະບານທີ່ມີຜົນງານດີເດັ່ນໃນໄລຍະຜ່ານມາ ແລະ ຍັງເນັ້ນໜັກໃຫ້ຄະນະຊຸດໃໝ່ ສຶບຕໍ່ເປັນເສນາທິການໃຫ້ແກ່ຄະນະພັກກໍ່ຄືຄະນະໂຄສະນາອົບຮົມແຂວງ, ພ້ອມຖືເອົາວຽກງານການເມືອງ-ແນວຄິດເປັນບັນຫາຕົ້ນຕໍ, ເປັນກົກ ເພື່ອເຮັດໃຫ້ສະມາຊິກກຳມະບານຂອງຮາກຖານເຂົ້າໃຈເຖິງພາລະບົດບາດສິດ ແລະ ໜ້າທີ່ ຂອງກົດລະບຽບກຳມະບານລາວວາງອອກ, ສຶບຕໍ່ຄົ້ນຄວ້າປັບປຸງກົງຈັກການຈັດຕັ້ງ, ແບບແຜນວິທີເຮັດວຽກໃຫ້ມີຄວາມເຂັ້ມແຂງ, ເຕົ້າໂຮມຄວາມສາມັກຄີພາຍໃນໝູ່ຄະນະໃຫ້ເປັນປຶກແຜ່ນ, ຕັ້ງໜ້າເຜີຍແຜ່ເຊື່ອມຊຶມມະຕິຄໍາສັ່ງ,ຂອງພັກ-ລັດ, ກົດໝາຍ ແລະ ກົດລະບຽບກໍາມະບານລາວວາງອອກ, ໃຫ້ແກ່ຖັນແຖວສະມາຊິກກຳມະບານພາຍໃນຮາກຖານ ເພື່ອນໍາໄປຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ໃຫ້ດີຂຶ້ນກວ່າເກົ່າ.

• ຕໍ່ໄປ >