ໄຊສົມບູນ ຖືເອົາທ່າແຮງພະລັງງານ ແລະ ບໍ່ແຮ່ ເພື່ອພັດທະນາເສດຖະກິດ-ສັງຄົມ

 ຂປລ​. ທ່ານ ຈັນ​ຖະໜອມ ວົງ​ສົມ​ຈິດ, ຫົວໜ້າພະ​ແນ​ກ​ແຜນການ ​ແລະ ການ​ລົງທຶນ ​ແຂວງ​ໄຊ​ສົມ​ບູນ​ ໄດ້​ໃຫ້​ສຳພາດ​ເມື່ອ​ບໍ່​ດົນ

​ມານີ້ວ່າ: ​ແຂວງ​ໄຊສົມບູນ ເປັນແຂວງທີ່​ມີ​ ຄວາມ​ອຸດົມສົມບູນ​ໄປ​ດ້ວຍ ຊັບພະຍາກອນ ​ທຳ​ມະ​ຊາດ ​ທີ່​ເປັນ​ທ່າ​ແຮງ​ ໃນ​ການ​ສ້າງສາ​ພັດທະນາ ​ເສດຖະກິດ-ສັງຄົມ ​ຂອງ​ແຂວງ​ ໃຫ້​ມີການ​ຂະຫຍາຍຕົວ​ ເປັນຕົ້ນ​ແມ່ນ​​ມີສະຖານ​ທີ່​ ສາມາດ​ພັດທະນາ​ ເປັນແຫລ່ງທ່ອງ​ທ່ຽວ 40 ກວ່າ​ແຫ່ງ​ ໃນ​ນັ້ນ​ ​ແຫ​ລ່ງທ່ອງ​ທ່ຽວທຳ​ມະ​ຊາດ 30 ກວ່າ​ແຫ່ງ, ວັດທະນະທຳ 3 ​ແຫ່ງ ​ແລະ ​ແຫ​ລ່ງທ່ອງ​ທ່ຽວປະຫວັດສາດ 9 ​ແຫ່ງ​. ມີ​ແຫ​ລ່ງຊັບພະຍາກອນ​ທຳ​ມະ​ຊາດ ​ໂດຍ​ສະ​ເພາະ​ແມ່ນ ​​ແຫ​ລ່ງຊັບພະຍາກອນ​ບໍ່​ແຮ່, ຊັບພະຍາກອນ​ນ້ຳ ທີ່​ສາມາດ​ສ້າງ​​ເປັນ​ເຂື່ອນ​ໄຟຟ້າ​ຂະໜາດນ້ອຍ ​ແລະ ຂະໜາດ​ໃຫຍ່ ປະມານ 30 ກວ່າ​ແຫ່ງ. ປັດຈຸບັນ ​ໄດ້ອະນຸຍາດໃຫ້​ ບໍລິສັດ​ພາກ​ເອກະ​ຊົນ​ ຈຳນວນໜຶ່ງ ສຶກສາ​ຄວາມ​ເປັນ​ໄປ​ໄດ້ ​​​ໃນ​ການ​ສ້າງ​ເຂື່ອນ​ຂະໜາດນ້ອຍ 5 ​ໂຄງການ. ນອກຈາກ​ນີ້ ກໍມີ ​​ການ​ລົງທຶນ​ຂຸດ​ຄົ້ນບໍ່​ແຮ່ (ບໍ່​ຄຳ) ຢູ່​ພູ​ຄຳຂອງ ບໍລິສັດ ພູເບ້ຍມາຍນິງ ​​ເຊິ່ງຍັງ​ອີກ 8 ປີ​ກໍໝົດອາຍຸ​ການ​ສຳ​ປະທານ. ນີ້​ແມ່ນ​ທ່າ​ແຮງ​ອັນ​ຕົ້ນຕໍ ທີ່​ປະກອບສ່ວນ​ເຮັດ​ໃຫ້ ​ເສດຖະກິດ-ສັງຄົມ ​ຂອງ​ແຂວງ​ໄຊ​ສົມບູນ​ ມີ​ການ​ຂະຫຍາຍຕົວ ແລະ ປະກອບສ່ວນ ​​ເຮັດ​ໃຫ້​ປະຊາຊົນ ​ບັນດາ​ເຜົ່າ ​ຫລຸດ​ພົ້ນອອກ​ຈາກ ​ຄວາມທຸກ​ຍາກ ​ເທື່ອ​ລະ​ກ້າວ.

ທ່ານ ຍັງ​ກ່າວ​ຕື່ມ​ວ່າ: ​​ໃນ​​ໄລຍະໜຶ່ງປີຜ່ານມາ​ ເສດຖະກິດ​ຂອງ​ແຂວງ ​ແມ່ນ​ສືບ​ຕໍ່​ຂະຫຍາຍຕົວ ຢ່າງ​ຕໍ່​ເນື່ອງ​ ຕາມ​ທິດ​ຫັນ​ເປັນ​ອຸດສາຫະກຳ, ສະ​ແດງ​ອອກ​ອັດຕາ​ການ​ຂະຫຍາຍຕົວ ຂອງເສດຖະກິດປີ 2013-2014 ບັນລຸ​ກວ່າ 640 ຕື້ກີບ, GDP ​​ເພີ່ມຂຶ້ນ 5,5%, ສະ​ເລ່ຍ ລາຍຮັບ​ໃສ່​ຫົວ​ຄົນ​ ໄດ້ກວ່າ 7,8 ລ້ານ​ກີບ ຫລື​ ກວ່າ 900 ​ໂດລາ​ສະຫະລັດ/ຄົນ/ປີ. ຂະນະ​ທີ່​ສົກ​ປີ 2014-2015 ຄາດ​ວ່າ ​ເສດຖະກິດ​ຈະ​ເພີ່ມ​ຂຶ້ນ 10% ລວມຍອດ​ຜະລິດ​ຕະພັນ​ພາຍ​ໃນ​ ບັນ​ລຸໄດ້ 806,5 ຕື້ກີບ. ສະ​ເລ່ຍ​ໃສ່ຫົວ​ຄົນ​ຜູ້ໜຶ່ງ ​ໄດ້​ປະ​ມານກວ່າ 9,6 ລ້ານ​ກີບ ຫລືກວ່າ 1 ພັນ​ໂດ​ລາ​ສະຫະລັດ/ຄົນ/ປີ.

ແຂວງ ​ໄຊ​ສົມບູນ ຕັ້ງຢູ່​ຈຸດ​ໃຈກາງ​ຂອງ​ປະ​ເທດ​ ​ເຊິ່ງມີ​ເນື້ອທີ່​ປະມານ 83 ພັນ​ກິ​ໂລ​ແມັດ, ທິດ​ເໜືອຕິດ​ກັບ​ເມືອງ​ພູ​ຄູນ ​ແຂວງ​ຫລວງ​ພະ​ບາງ, ທິດຕາ​ເວັນ​ອອກ​ຕິດ​ກັບ​ເມືອງໝອກ ​ແຂວງຊຽງຂວາງ, ທິດ​​ໃຕ້ຕິດ​​ກັບ​ເມືອງ​ທ່າ​ພະ​ບາດ​​ ແຂວງ​ບໍລິ​ຄຳ​ໄຊ ​ແລະ ທິດ ​ຕາ​ເວັນ​ຕົກ ຕິດ​ກັບ​​ແຂວງ​ວຽງຈັນ​, ​ເຊິ່ງປະກອບ ​ມີ 5 ​ເມືອງ​ຄື: ​ເມືອງ​ອະນຸວົງ, ລ້ອງ​ແຈ້ງ, ​ທ່າ​ໂທມ, ​ລ້ອງ​ຊານ ​ແລະ ​ເມືອງ​ຮົ່ມ, ​ມີ​ພົນລະ​ເມືອງກວ່າ 83 ພັນຄົນ,​ ຍິງ​ກວ່າ 41 ພັນ​ຄົນ./.