ຕອນແລງວັນທີ 16 ທັນວາ 2024 ນີ້ ການນຳແຂວງບັ໋ກຢາງ ສສ ຫວຽດນາມ ໄດ້ຈັດກອງປະຊຸມພົບປະກັບຄະນະຜູ້ແທນຂອງແຂວງໄຊສົມບູນ ຢູ່ທີ່ຫ້ອງປະຊຸມຫ້ອງວ່າການຄະນະກຳມະການປະຊາຊົນແຂວງບັ໋ກຢາງ ໂດຍການເປັນປະທານຂອງສະຫາຍ ມາຍເຊິນ, ຄະນະປະຈໍາພັກແຂວງ, ຮັກສາການປະທານຄະນະກຳມະການປະຊາຊົນແຂວງບັ໋ກຢາງ ມີສະຫາຍ ແດງ ປະທຸມທອງ, ຮອງເລຂາພັກແຂວງ, ປະທານສະພາປະຊາຊົນແຂວງໄຊສົມບູນ ພ້ອມດ້ວຍຄະນະນຳແຂວງບັ໋ກຢ່າງ ແລະ ແຂວງໄຊສົມບູນ ເຂົ້າຮ່ວມ.
ຈຸດປະສົງໃນການພົບປະຄັ້ງນີ້ກໍເພື່ອເປັນການສຶບຕໍ່ຜັນຂະຫຍາຍເນື້ອໃນບົດບັນທຶກການຮ່ວມມື ລະຫວ່າງສອງແຂວງ ທັງເປັນການເສີມຂະຫຍາຍສາຍພົວພັນການຮ່ວມມື ລະຫວ່າງ ສອງຊາດ ລາວ-ຫວຽດນາມ ເວົ້າລວມເວົ້າສະເພາະ ແຂວງໄຊສົມບູນ ກັບ ແຂວງບັ໋ກຢາງ ໃຫ້ນັບມື້ນັບກ້າວເຂົ້າສູ່ລວງເລິກ, ໃນກອງປະຊຸມທ່ານ ແດງ ປະທຸມທອງ ໄດ້ລາຍງານຜົນສຳເລັດການຈັດຕັ້ງປະຕິບັດໃນໄລຍະ 1 ປີ ຜ່ານມາ ເຫັນໄດ້ວ່າທັງສອງແຂວງ ໄດ້ເອົາໃຈໃສ່ໃນການຈັດຕັ້ງປະຕິບັດສຳເລັດຫຼາຍຄາດໝາຍທີ່ໄດ້ລົງນາມຮ່ວມກັນເປັນຕົ້ນ ການໂຄສະນາເຜີຍແຜ່ສາຍພົວພັນອັນດີງາມຂອງສອງແຂວງໃຫ້ແກ່ສະມາຊິກພັກພະນັກງານ ແລະ ປະຊາຊົນບັນດາເຜົ່າໄດ້ຮັບຊາບຢ່າງກວ້າງຂວາງ, ໄດ້ມີການແລກປ່ຽນບົດຮຽນລະຫວ່າງຄະນະຜູ້ແທນຂັ້ນສູງຂອງແຂວງ, ຂັ້ນເມືອງ ແລະ ພະແນກການ ພ້ອມທັງໄດ້ຈັດຊຸດຝຶກອົບຮົມເພື່ອແລກປ່ຽນປະສົບການ ແລະ ຍົກລະດັບດ້ານວິຊາສະເພາະ ໃຫ້ແກ່ ພະນັກງານແຂວງໄຊສົມບູນ ແລະ ສຳເລັດການຈັດຕັ້ງປະຕິບັດບາງໂຄງການທີ່ໄດ້ຮັບການຊ່ວຍເຫຼຶອຈາກ ແຂວງບັ໋ກຢາງ
ໃນການຢ້ຽມຢາມຄັ້ງນີ້ ທັງສອງຝ່າຍໄດ້ລາຍງານໂດຍຫຍໍ້ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃນໄລຍະຜ່ານມາ ພ້ອມດຽວກັນນັ້ນ ສະຫາຍຮອງເລຂາພັກແຂວງໄຊສົມບູນ ຍັງໄດ້ສະເໜີໃຫ້ແກ່ການນຳແຂວງປັ໋ກຢາງ ໃຫ້ຊ່ວຍຄົ້ນຄວ້າພິຈາລະນາບາງຄາດໝາຍໃນຕໍ່ໜ້ານີ້ ເປັນຕົ້ນແມ່ນໄດ້ສະເໜີໃຫ້ສຶບຕໍ່ສົ່ງອາຈານມາສອນພາສາຫວຽດໃຫ້ແກ່ບຸກຄະລາກອນຂອງແຂວງໄຊສົມບູນ ເພີ່ມຕື່ມ, ສຶບຕໍ່ແຮກສ່ຽວລະຫວ່າງບັນດາພະແນກການ, ອົງການ ແລະ ເມືອງ ຂອງແຂວງໄຊສົມບູນ ກັບ ແຂວງບັກຢາງ ທີ່ຍັງບໍ່ທັນໄດ້ມີການແຮກສ່ຽວ ແລະ ຍັງໄດ້ສະເໜີໃຫ້ມີການແລກປ່ຽນບົດຮຽນ ລະຫວ່າງ ວິທະຍາໄລເຕັກນິກ ຫວຽດນາມ-ເກົາຫຼີ ຂອງ ແຂວງບັ໋ກຢາງ ແລະ ໂຮງຮຽນວິຊາຊີບຂອງແຂວງໄຊສົມບູນ ໃນຕໍ່ໜ້າໃຫ້ມີການຮ່ວມມື ແລະ ອື່ນໆ ທັງນີ້ກໍ່ເພື່ອເປັນການເປັນການເສີມຂະຫຍາຍສາຍພົວພັນການຮ່ວມມື ລະຫວ່າງ ສອງຊາດ ລາວ-ຫວຽດນາມ ເວົ້າລວມເວົ້າສະເພາະ ແຂວງໄຊສົມບູນ ກັບ ແຂວງບັ໋ກຢາງ ໃຫ້ນັບມື້ນັບກ້າວເຂົ້າສູ່ລວງເລິກ ແລະ ປະກົດຜົນເປັນຈິງ.
