ກອງປະຊຸມເຜີຍແຜ່ນິຕິກຳການຂຶ້ນທະບຽນ ແລະ ອອກບັດອະນຸຍາດເຮັດວຽກຊົ່ວຄາວໃຫ້ແຮງງານຕ່າງປະເທດທີ່ມາເຄື່ອນໄຫວບໍ່ຖືກຕ້ອງຕາມກົດໝາຍແຮງງານຢູ່ເມືອງຮົ່ມ ແຂວງໄຊສົມບູນ ຈັດຂຶ້ນໃນວັນທີ 14 ສິງຫາ 2025 ນີ້ຢູ່ທີ່ຫ້ອງປະຊຸມ ຫ້ອງການ-ການເງິນເມືອງ ໂດຍການເປັນປະທານຂອງທ່ານ ສົມເພັດ ວົງພະຈິດ ຮອງຫົວໜ້າພະແນກແຮງງານ ແລະ ສະຫັວດດີການສັງຄົມແຂວງ, ມີທ່ານ ຊົວຢ່າຊົ່ງ ນະວົງໄຊ ຫົວໜ້າຫ້ອງການແຮງງານ ແລະ ສະຫັວດດີການ-ສັງຄົມ ເມືອງ, ບັນດາທ່ານຫົວໜ້າ-ຮອງຫົວໜ້າຫ້ອງການ, ກົມກອງ, ມີເຈົ້າໜ້າທີ່ຄຸ້ມຄອງແຮງງານຂັ້ນແຂວງ, ຂັ້ນເມືອງ, ມີບັນດາທ່ານແຮງງານຕ່າງປະເທດ ແລະ ນາຍບ້ານ 3 ບ້ານເທດສະບານເຂົ້າຮ່ວມ.
ໃນໂອກາດນີ້ທ່ານປະທານໄດ້ມີຄຳເຫັນກ່າວເປີດກອງປະຊຸມໂດຍທ່ານໄດ້ກ່າວວ່າ ເພື່ອເຮັດໃຫ້ບັນດາແຮງງານທີ່ມາເຄື່ອນໄຫວເຮັດວຽກ ຫຼື ຄ້າຂາຍຢູ່ເມືອງຮົ່ມຈົ່ງຮັບຮູ້ ແລະ ເຂົ້າໃຈຢ່າງເລິກຕໍ່ກັບເນື້ອໃນຂອງບັນດານິຕິກຳດັ່ງກ່າວນີ້, ຈາກນັ້ນໄດ້ຮັບຟັງການຜ່ານຂໍ້ຕົກລົງຂອງທ່ານເຈົ້າແຂວງ ວ່າດ້ວຍການແຕ່ງຕັ້ງ ຄະນະຮັບຜິດຊອບຂຶ້ນທະບຽນ ແລະ ອອກບັດອະນຸຍາດ ເຮັດວຽກຊົ່ວຄາວໃຫ້ແຮງງານຕ່າງປະເທດ ທີ່ເຄື່ອນໄຫວບໍ່ຖືກຕ້ອງຢູ່ ແຂວງໄຊສົມບູນ ສະບັບເລກທີ 0904/ຈຂ.ຊບ ລົງວັນທີ 15 ກໍລະກົດ 2025, ຄໍາແນະນໍາຂອງທ່ານລັດຖະມົນຕີ ກະຊວງ ຮສສ ສະບັບເລກທີ 2144/ຮສສ, ລົງວັນທີ 05/06/2025, ແຈ້ງການແນະນໍາຂອງທ່ານເຈົ້າແຂວງ ວ່າດ້ວຍການຂຶ້ນທະບຽນ ແລະ ອອກບັດອະນຸຍາດເຮັດວຽກຊົ່ວຄາວ ໃຫ້ແຮງງານຕ່າງປະເທດທີ່ມາເຄື່ອນໄຫວບໍ່ຖືກຕ້ອງ ຢູ່ແຂວງໄຊສົມບູນ ສະບັບເລກທີ 0855/ຈຂ.ຊບ ລົງວັນທີ 04 ກໍລະກົດ 2025, ຫຼັງຈາກນັ້ນຜູ້ເຂົ້າຮ່ວມກອງປະຊຸມກໍ່ໄດ້ມີຄໍາເຫັນແລກປ່ຽນເຊິ່ງກັນ ແລະ ກັນ ເພື່ອການຈັດຕັ້ງປະຕິບັດໃຫ້ໄດ້ຮັບຜົນດີໃນຕໍ່ໜ້າ.
ຕອນທ້າຍທ່ານປະທານໄດ້ມີຄໍາເຫັນໂອ້ລົມກ່ອນອື່ນທ່ານໄດ້ຮຽກຮ້ອງໃຫ້ອົງການປົກຄອງເມືອງກໍ່ຄືບັນດາຂະແໜງການທີ່ກ່ຽວຂ້ອງຈົ່ງສືບຕໍ່ນໍາເອົາເອກສານຄໍາແນະນໍາດັ່ງກ່າວນີ້ໄປເຜີຍແຜ່ໃຫ້ບັນດາເປົ້າໝາຍຢູ່ເມືອງຮົ່ມໃຫ້ທົ່ວເຖິງ, ສືບຕໍ່ເປັນເຈົ້າການໃນການເກັບກໍາຂໍ້ມູນບັນດາເປົ້າໝາຍໃຫ້ສໍາເລັດເພື່່ອຈະໄດ້ພິຈາລະນາອອກໃບຂຶ້ນທະບຽນ ແລະ ອອກບັດອະນຸຍາດເຮັດວຽກຊົ່ວຄາວໃຫ້ ແລະ ບັນດາແຮງງານທີ່ມາເຄື່ອນໄຫວຢູ່ເມືອງຮົ່ມຈົ່ງໃຫ້ຄວາມຮ່ວມມື ສະໜອງຂໍ້ມູນໃຫ້ລະອຽດຈະແຈ້ງຖຶກຕ້ອງຕາມຄວາມເປັນຈິງ.