ກອງປະຊຸມ ໃຫຍ່ຜູ້ແທນອົງຄະນະພັກ ເມືອງລ້ອງແຈ້ງ ແຂວງໄຊສົມບູນ ຄັ້ງທີ II ໄດ້ໄຂຂຶ້ນຢ່າງເປັນທາງການ ໃນຕອນເຊົ້າຂອງວັນທີ 17 ມີນາ 2025 ນີ້ ທີ່ສະໂມສອນກອງພັນນ້ອຍ 596 ພາຍໃຕ້ການເປັນປະທານຂອງ ສະຫາຍ ບຸນຜອງ ຄຳມະນີວົງ, ເລຂາຄະນະບໍລິຫານງານພັກ ເມືອງລ້ອງແຈ້ງ ໂດຍການເຂົ້າຮ່ວມຂອງ ສະຫາຍ ພອຍຄຳ ຮຸ່ງບຸນຍວງ, ເລຂາຄະນະບໍລິຫານງານພັກ ແຂວງໄຊສົມບູນ ພ້ອມດ້ວຍ ຄະນະພັກ-ຄະນະນຳຂັ້ນແຂວງ, ຂັ້ນເມືອງ ທັງ 5 ເມືອງ ຕະຫຼອດຮອດແຂກຖືກເຊີນ, ພະນັກງານອາວຸໂສບຳນານ ແລະ ຜູ້ແທນສົມບູນ ທົ່ວເມືອງ ຈຳນວນ 88 ສະຫາຍ ເຂົ້າຮ່ວມ.
ໃນໂອກາດກ່າວໄຂກອງປະຊຸມ ສະຫາຍ ບຸນຜອງ ຄຳມະນີວົງ ໄດ້ກ່າວວ່າ: ກອງປະຊຸມໃຫຍ່ໃນຄັ້ງນີ້ ຈະໄດ້ພ້ອມກັນຕີລາຄາ ກ່ຽວກັບຜົນສຳເລັດການຈັດຕັ້ງປະຕິບັດວຽກງານ ຂອງອົງຄະນະບໍລິຫານງານພັກເມືອງ ໃນໄລຍະ 5 ປີ ຜ່ານມາ ໂດຍຍົກໃຫ້ເຫັນຈຸດດີ, ຈຸດອ່ອນ-ຂໍ້ຄົງຄ້າງ ພ້ອມທັງຄົ້ນຄວ້າຮັບຮອງເອົາຮ່າງບົດລາຍງານການເມືອງ ທັງ 2 ພາກ, ແຜນພັດທະນາເສດຖະກິດສັງຄົມ 5 ປີ ຄັ້ງທີ III ແລະ ຮັບຮອງເອົາບົດສຳຫຼວດການນຳພາລວມ ຂອງຄະນະບໍລິຫານງານພັກເມືອງ ຊຸດທີ I ນອກນັ້ນ ຍັງຈະໄດ້ຮັບຟັງການປະກອບຄຳເຫັນ ຈາກເມືອງວັງວຽງ ກ່ຽວກັບການພັດທະນາແຫຼ່ງທ່ອງທ່ຽວ ແລະ ການບໍລິການດ້ານການທ່ອງທ່ຽວ, ຮັບຟັງການປະກອບຄຳເຫັນ 5 ຂົງເຂດວຽກງານ ແລະ 1 ຄອບຄົວຕົວແບບ. ພ້ອມດຽວກັນນັ້ນ ກອງປະຊຸມ ຈະໄດ້ດໍາເນີນການປ່ອນບັດເລືອກຕັ້ງເອົາຄະນະບໍລິຫານງານພັກເມືອງ ຊຸດໃໝ່ ແລະ ປ່ອນບັດຄັດເລືອກເອົາຜູ້ແທນສົມບູນ ແລະ ສຳຮອງ ໄປຮ່ວມກອງປະຊຸມໃຫຍ່ຂອງຄະນະພັກຂັ້ນເທິງ ທີ່ຈະໄດ້ໄຂຂຶ້ນໃນຕໍ່ໜ້ານີ້. ໃນຕອນທ້າຍ ຈະໄດ້ຮັບຟັງຄຳໂອ້ລົມຈາກ ສະຫາຍ ເລຂາຄະນະບໍລິຫານງານພັກແຂວງ ເພື່ອເປັນເຂັມຊີ້ທິດເຍື່ອງທາງໃຫ້ແກ່ຄະນະພັກເມືອງ ຊຸດໃໝ່, ສະມາຊິກພັກ, ພະນັກງານ, ທະຫານ, ຕຳຫຼວດ ແລະ ປະຊາຊົນບັນດາເຜົ່າ ເພື່ອສືບຕໍ່ຈັດຕັ້ງປະຕິບັດ ໃນການປົກປັກຮັກສາ ແລະ ສ້າງສາພັດທະນາປະເທດຊາດ ກໍຄືເມືອງລ້ອງແຈ້ງ ໃຫ້ຈະເລີນກ້າວໜ້າຂຶ້ນເລື້ອຍໆ.
