ເນື່ອງໃນໂອກາດ ທີ່ມາເຄື່ອນໄຫວຢ້ຽມຢາມ ແລະ ເຮັດວຽກ ຢູ່ແຂວງໄຊສົມບູນ ສະຫາຍ ລາວປາວຊົ່ງ ນະວົງໄຊ, ກຳມະການສູນກາງພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ພ້ອມດ້ວຍຄະນະ ໄດ້ຖືເອົາໂອກາດນີ້ເຂົ້າພົບປະການນໍາແຂວງໄຊສົມບູນ ໃນຕອນເຊົ້າຂອງວັນທີ 11 ພະຈິກ 2024 ນີ້ ທີ່ຫ້ອງຮັບຮອງຫ້ອງວ່າການແຂວງ ເພື່ອຢ້ຽມຢາມຖາມຂ່າວ ແລະ ລາຍງານຈຸດປະສົງ ຂອງການມາເຄື່ອນໄຫວວຽກງານໃນຄັ້ງນີ້. ໂດຍໂອກາດນີ້ ສະຫາຍ ພ້ອມດ້ວຍຄະນະ ຍັງໄດ້ຮັບຟັງລາຍງານສະພາບວຽກງານພົ້ນເດັ່ນຂອງແຂວງ ເປັນຕົ້ນແມ່ນສະພາບເສດຖະກິດ-ສັງຄົມ, ວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ວຽກງານວັດທະນະທໍາ-ສັງຄົມ ຈາກສະຫາຍ ພອຍຄຳ ຮຸ່ງບຸນຍວງ ເຈົ້າແຂວງໄຊສົມບູນ ຕື່ມອີກ.
ໃນຕອນເຊົ້າຂອງວັນດຽວກັນ ສະຫາຍ ລາວປາວຊົ່ງ ນະວົງໄຊ, ກຳມະການສູນກາງພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ໄດ້ເຂົ້າຮ່ວມກອງປະຊຸມສ່ອງແສງລາຍງານສະພາບແນວຄິດ-ຫາງສຽງສັງຄົມ ໂດຍມີສະຫາຍ ບົວຜັນ ອິນທະປັນຍາ ຮອງເລຂາພັກແຂວງ, ຜູ້ຊີ້ນໍາວຽກງານພັກ-ພະນັກງານ, ສະຫາຍ ນາງ ຄຳສີ ສິດທິວໍລະດາ ກຳມະການພັກແຂວງ, ຫົວໜ້າຄະນະໂຄສະນາອົບຮົມແຂວງ, ພ້ອມດ້ວຍຄະນະພັກຈາກພະແນກການ, ອົງການ, ກົມກອງ ເຂົ້າຮ່ວມ.
ໂອກາດນີ້ ສະຫາຍ ລາວປາວຊົ່ງ ນະວົງໄຊ ໄດ້ມີຄໍາເຫັນຊີ້ນໍາໃຫ້ຜູ້ເຂົ້າຮ່ວມ ຈົ່ງພ້ອມກັນຕີລາຄາການຈັດຕັ້ງເຄື່ອນໄຫວວຽກງານ ໃນໄລຍະຜ່ານມາ ໂດຍຍົກເອົາບັນຫາສະພາບການຫາງສຽງຈາກສັງຄົມ ແລະ ຈາກກຸ່ມຄົນບໍ່ດີ ທີ່ເປັນການໂຄ່ນລົ້ມໂຈມຕີ, ໃສ່ຮ້າຍປ້າຍສີ ພັກ-ລັດ, ການຫາງສຽງ ທີ່ກະທົບເຖິງແນວຄິດຈິດໃຈ ແລະ ສິດທິມະນຸດອື່ນໆ ມາປະກອບຄໍາຄິດ-ຄໍາເຫັນ, ປຶກສາຫາລື ເພື່ອຮັບປະກັນໃຫ້ກອງປະຊຸມດໍາເນີນໄປດ້ວຍຜົນສໍາເລັດ ແລະ ມີເນື້ອໃນຄົບຖ້ວນ. ຈາກນັ້ນ, ສະຫາຍ ນາງ ຄຳສີ ສິດທິວໍລະດາ, ກຳມະການພັກແຂວງ, ຫົວໜ້າຄະນະໂຄສະນາອົບຮົມແຂວງ ໄດ້ຜ່ານບົດລາຍງານກ່ຽວກັບສະພາບແນວຄິດ-ຫາງສຽງສັງຄົມ ປະຈຳປີ 2024 ໂດຍຫຍໍ້.
ຊຶ່ງຕະຫຼອດໄລຍະຜ່ານມາ ຄະນະໂຄສະນາອົບຮົມແຂວງ, ເມືອງ ແລະ ຄະນະພັກແຕ່ລະຂັ້ນ ໄດ້ເອົາໃຈໃສ່ເປັນເສນາທິການໃຫ້ແກ່ຄະນະປະຈໍາພັກແຂວງ, ຄະນະໂຄສະນາອົບຮົມສູນກາງພັກ ໃນການຕິດຕາມ, ເກັບກຳສະພາບແນວຄິດ-ຫາງສຽງສັງຄົມ ທີ່ເກີດຂຶ້ນຢູ່ໃນຂອບເຂດຄວາມຮັບຜິດຊອບຂອງຕົນ ແລະ ການບິດເບືອນໃສ່ຮ້າຍປ້າຍສີ ຈາກກຸ່ມຄົນບໍ່ຫວັງດີຕໍ່ປະເທດຊາດ, ຕໍ່ການນໍາພາຂອງພັກ-ລັດ ກໍຄືຕໍ່ການນໍາພາ-ຊີ້ນໍາຂອງຄະນະບໍລິຫານງານພັກ ແຂວງໄຊສົມບູນ ເປັນຕົ້ນແມ່ນສະພາບແນວຄິດ-ຫາງສຽງສັງຄົມ ທີ່ເປັນດ້ານຕັ້ງໜ້າ ແລະ ດ້ານຫຍໍ້ທໍ້ຄື ໃນໄລຍະຜ່ານມາ ຍັງເຫັນວ່າມີສະມາຊິກພັກ, ພະນັກງານ-ລັດຖະກອນ ແລະ ປະຊາຊົນຈໍານວນໜຶ່ງ ຍັງໃຫ້ຄວາມຮ່ວມມື ແລະ ອຳນວຍຄວາມສະດວກໃຫ້ແກ່ການເຄື່ອນໄຫວສິ່ງທີ່ຜິດກົດໝາຍ, ຍັງມີການຈັບຈອງທີ່ດິນຂອງລັດ ໂດຍທີ່ບໍ່ໄດ້ຮັບອະນຸຍາດ, ການຫາງສຽງຕໍ່ຄວາມຫຍຸ້ງຍາກ ໃນການນໍາໃຊ້ເສັ້ນທາງສັນຈອນໄປມາ ແລະ ອື່ນໆ.
ຊຶ່ງຕໍ່ກັບບັນຫາດັ່ງກ່າວ ພາກສ່ວນທີ່ກ່ຽວຂ້ອງ ໄດ້ວາງທິດທາງແຜນການໃນຕໍ່ໜ້າຄືຈະສືບຕໍ່ຕິດຕາມ, ເກັບກຳສະພາບແນວຄິດ-ຫາງສຽງສັງຄົມ ຢູ່ຂັ້ນແຂວງ ແລະ ເມືອງ ເພື່ອຂໍທິດຊີ້ນໍາແກ້ໄຂຈາກຂັ້ນເທິງ ໃຫ້ທັນກັບເວລາ, ສືບຕໍ່ໂຄສະນາ ສຶກສາອົບຮົມການເມືອງ-ແນວຄິດ ໃຫ້ທຸກເປົ້າໝາຍ ແນໃສ່ຕ້ານການໂຄສະນາໃສ່ຮ້າຍປ້າຍສີ, ທັບຖົມໂຈມຕີ ຂອງກຸ່ມຄົນບໍ່ຫວັງດີ ແລະ ສືບຕໍ່ແກ້ໄຂບັນຫາຫາງສຽງສັງຄົມ ໃນໄລຍະຜ່ານມາ ໃຫ້ສອດຄ່ອງກັບສະພາບ ໃນແຕ່ລະໄລຍະ. ຫຼັງຈາກນັ້ນ ຜູ້ເຂົ້າຮ່ວມກອງປະຊຸມ ໄດ້ພ້ອມກັນລາຍງານສະພາບແນວຄິດ-ຫາງສຽງສັງຄົມ ທີ່ເກີດຂຶ້ນຢູ່ໃນຂອບເຂດຄວາມຮັບຜິດຊອບຂອງຕົນ ພ້ອມທັງປະກອບຄໍາຄິດ-ຄໍາເຫັນ ແລກປ່ຽນບົດຮຽນຊຶ່ງກັນ ແລະ ກັນ ຕື່ມອີກ.