ກອງປະຊູມ ເຜີຍແຜ່ເຊື່ອມຊຶມມະຕິ, ຄໍາສັ່ງ ຢູ່ເມືອງອະນຸວົງ ແຂວງໄຊສົມບູນ

ກອງປະຊຸມ ສະຫາຍ ໄພທູນ ມັດທຸວົງ ຮອງຄະນະກໍາມະການອົງການປົກຄອງເມືອງອະນຸວົງ, ໄດ້ເຊື່ອມຊຶມ ເອກະສານ ຄໍາແນະນໍາຂອງຄະນະເລຂາທິການສູນກາງພັກ ກ່ຽວກັບ ການປັບປຸງກົງຈັກການຈັດຕັ້ງ ເພື່ອໃຫ້ຮັບປະກັນ ແກ່ການປັບປຸງການຈັດຕັ່້ງຢູ່ແຕ່ລະຂັ້ນມີຄວາມຖຶກຕ້ອງຕາມທິດຊີ້ນໍາ, ມີຄວາມເອກະພາບ, ມີປະສິດທິພາບ ແລະ ທັນຕາມເວລາທີກໍານົດໄວ້. ຈາກນັ້ນ, ສະຫາຍ ພັດທະນາ ສີສົມພອນ ຮອງເລຂາພັກເມືອງ ວ່າການປະທານຄະນະກໍາມະການອົງການປົກຄອງເມືອງ ເຊື່ອມຊຶມກ່ຽວກັບ ມະຕິ ສະບັບເລກທີ 03/ຄບສພ, ລົງວັນທີ 12 ມີນາ 2025 ວ່າດ້ວຍການປັບປຸງກົງຈັກການຈັດຕັ້ງ ແລະ ຄໍາແນະນໍາຂອງຄະນະເລຂາທິການສູນກາງພັກກ່ຽວກັບການປັບປຸງກົງຈັກການຈັດຕັ້ງ ແລະ ສະຫາຍ ຮືທໍ່ ເພຍຫຫຼວງ ກໍາມະການພັກແຂວງ, ເລຂາພັກເມືອງອະນຸວົງ ໄດ້ເຊື່ອມຊຶມ ມະຕິກອງປະຊຸມຄົບຄະນະສະໄໝວິສາມັນຂອງຄະນະບໍລິຫານງານສູນກາງພັກສະໄໝທີ XI ສະບັບເລກທີ 02/ຄບສພ, ລົງວັນທີ 07 ມີນາ 2025, ເຊິ່ງໃຫ້ຮູ້ວ່າ: ຍາມໃດ ພັກ ແລະ ລັດ ກໍຖືວຽກງານປັບປຸງກົງຈັກການຈັດຕັ້ງ ເປັນວຽກງານໜຶ່ງທີ່ສໍາຄັນໃນການນໍາພາ-ຊີ້ນໍາ ເພື່ອຂັບເຄື່ອນການພັດທະນາ ຕາມແນວທາງ, ນະໂຍບາຍຂອງພັກ-ລັດ ໃນແຕ່ລະໄລຍະ ໃຫ້ມີປະສິດທິຜົນສູງ ສອດຄ່ອງກັບການຂະຫຍາຍຕົວ ຂອງເສດຖະກິດ, ຜ່ານການປຶກສາຫາລືຢ່າງເລິກເຊິ່ງ, ຮອບດ້ານກ່ຽວກັບສະພາບກົງຈັກການຈັດຕັ້ງ, ເຫດຜົນ ແລະ ຄວາມຈໍາເປັນໃນການປັບປຸງກົງຈັກການຈັດຕັ້ງຂອງກະຊວງ, ອົງການຂັ້ນສູນກາງ ແລະ ທ້ອງຖິ່ນ, ໂດຍໂຮມ ແລະ ສັບຊ້ອນວຽກງານຂອງກະຊວງຈໍານວນໜຶ່ງເຂົ້າກັນ ແລະ ໂອນວຽກຈໍານວນໜຶ່ງໄປຂຶ້ນກັບບາງກະຊວງ, ອົງການ ໃຫ້ສອດຄ່ອງກັບພາລະບົດບາດ ແລະ ສະພາບຄວາມເປັນຈິງ ໃນປະຈຸບັນ. ພ້ອມນີ້, ກອງປະຊຸມໄດ້ຊີ້ນໍາມາດຕະການຈໍານວນໜຶ່ງ ເພື່ອເຮັດໃຫ້ການປັບປຸງກົງຈັກການຈັດຕັ້ງຄັ້ງນີ້ ດໍາເນີນໄປຖືກທິດທາງ, ມີລະດັັບຄາດໝາຍຢ່າງຈະແຈ້ງ ແລະ ໄດ້ຮັບຜົນດີຄື: ຕ້ອງເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ພະນັກງານ, ສະມາຊິກພັກ ມີຄວາມຮັບຮູ້ ແລະ ເຂົ້າໃຈ, ມີຄວາມເປັນເອກະພາບສູງ, ມີຄວາມອຸ່ນອ່ຽນ, ທຸ່ນທ່ຽງ ບໍ່ທໍ້ຖອຍຄອນແຄນ, ເປັນເຈົ້າການຜັນຂະຫຍາຍຢ່າງຕັ້ງໜ້າ, ຍົກສູງສະຕິລະວັງຕົວ ຕໍ່ບັນດາໜໍ່ແໜງປັດໄຈທີ່ຈະສົ່ງຜົນສະທ້ອນ ເຖິງຄວາມສາມັກຄີພາຍໃນ ກໍ່ຄືສົ່ງຜົນກະທົບຕໍ່ການປັບປຸງກົງຈັກການຈັດຕັ້ງເປັນຕົ້ນແມ່ນລັດທິເອກະຊົນ, ກຸ່ມກ້ອນທ້ອງຖິ່ນຄັບແຄບ ເຫັນແກ່ຜົນປະໂຫຍດສ່ວນຕົວ ແລະ ອື່ນໆ. ຈາກນັ້ນ, ກໍ່ໃຫ້ຮູ້ວ່າ ການໂຮມພະແນກ, ຫ້ອງການ ແຜນການ ແລະ ການລົງທຶນ ເຂົ້າກັບພະແນກ, ຫ້ອງການ-ການເງິນເປັນພະແນກການເງິນ ແລະ ຫ້ອງການການເງິນ, ໂຮມພະແນກ, ຫ້ອງການພະລັງງານ ແລະ ບໍ່ແຮ່ເຂົ້າກັບພະແພກ, ຫ້ອງການອຸດສາຫະກໍາ ແລະ ການຄ້າເປັນພະແນກ, ຫ້ອງການອຸດສາຫະກໍາ ແລະ ການຄ້າ, ໂຮມພະແນກ, ຫ້ອງການຊັບພະຍາກອນ ທໍາມະຊາດ ແລະ ສິ່ງແວດລ້ອມເຂົ້າກັບພະແນກ, ຫ້ອງການກະສີກໍາ ແລະ ປ່າໄມ້ເປັນພະແນກ, ຫ້ອງການກະສີກໍາ ແລະ ສິ່ງແວດລ້ອມ, ໂຮມພະແນກ, ຫ້ອງການພາຍໃນ ພ້ອມທັງຍົກຍ້າຍບຸກຄະກອນ ທີ່ສອດຄ່ອງກັບພາລະບົດບາດໄປເຂົ້າກັບຄະນະຈັດຕັ້ງແຂວງ-ເມືອງ, ຫ້ອງວ່າການແຂວງ-ຫ້ອງວ່າການເມືອງ ແລະ ຫ້ອງການທີ່ກ່ຽວຂ້ອງຕາມຂະ ແໜງສາຍຕັ້ງທີ່ມີການປັບປຸງ, ໂອນວຽກງານຖະແຫລງຂ່າວ ພ້ອມທັງຍົກຍ້າຍບຸກຄະກອນອອກຈາກຂະແໜງ, ໜ່ວຍງານຖະແຫລງຂ່າວ ໄປຂຶ້ນກັບຄະນະໂຄສະນາອົບຮົມແຂວງ-ເມືອງ, ປ່ຽນຊື່ພະແນກ, ຫ້ອງການຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ເປັນພະແນກ, ຫ້ອງການວັດທະນະທໍາ ແລະ ທ່ອງທ່ຽວ ແລະ ສໍາລັບກົງຈັກຂອງສະພາປະຊາຊົນແຂວງ ແມ່ນໃຫ້ປະຕິບັດຕາມການປັບປຸງກົງຈັກຂອງສະພາແຫ່ງຊາດຊຸດທີ 10 ໃຫ້ບັນດາສະຫາຍຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າ-ຄະນະຫ້ອງການ,ກົມກອງ, ສະມາຊິກພັກ, ທະຫານ, ຕໍາຫຼວດເຂົ້າຮ່ວມກອງປະຊຸມຄັ້ງນີ້ໄດ້ຮັບຮູ້ເຂົ້າໃຈ ແລະ ພ້ອມກັນນໍາໄປຈັດຕັ້ງປະຕິບັດໃຫ້ຖືກຕ້ອງທັນກັບເວລາທີ່ກໍານົດໄວ້.