ໃນຕອນເຊົ້າຂອງວັນທີ 15 ສິງຫາ 2025 ນີ້ ທ່ານ ພົວຈ ບົວພັນ ອິນທະປັນຍາ ຮອງເລຂາພັກແຂວງ ຜູ້ຊີ້ນໍາວຽກງານພັກ-ພະນັກງານ ແລະ ກໍ່ສ້າງຮາກຖານການເມືອງຂອງແຂວງ, ທ່ານ ທອງວັນ ທໍາມະວົງ ຄະນະປະຈໍາພັກແຂວງ ຫົວໜ້າຄະນະຈັດຕັ້ງແຂວງ ພ້ອມດ້ວຍຄະນະ ແລະ ທ່ານ ພັດທະນາ ສີສົມພອນ ຮອງເລຂາພັກເມືອງ ປະທານ ອົງການປົກຄອງເມືອງອະນຸວົງ ໄດ້ລົງຢ້ຽມຢາມ ເພື່ອຊຸກຍູ້ວຽກງານກໍ່ສ້າງຮາກຖານການເມືອງຢູ່ກຸ່ມບ້ານໂພນພະ ເມືອງອະນຸວົງ ໂດຍການຕ້ອນຮັບຂອງທ່ານ ບຸນເນືອງ ແພງວິໄລ ເລຂາຄະນະພັກຮາກຖານ ນາຍບ້ານໂພນພະ, ປກສ ກຸ່ມບ້ານ, ອົງການປົກຄອງບ້ານຂອງ 7 ບ້ານ ພ້ອມດ້ວຍພໍ່ແມ່ປະຊາຊົນບັນດາເຜົ່າ, ຫົວໜ້າຊິງຊາວ ຂອງ 7 ບ້ານຂອງກຸ່ມບ້ານໂພນພະເຂົ້າຮ່ວມ.
ໃນໂອກາດດັ່ງກ່າວ ທ່ານ ບຸນເນືອງ ແພງວິໄລ ເລຂາຄະນະພັກຮາກຖານ ນາຍບ້ານໂພນພະ ຕາງໜ້າ 7 ບ້ານຂອງກຸ່ມບ້ານໂພນພະ ກໍ່ໄດ້ລາຍງານຫຍໍ້ສະພາບວຽກງານຮອບດ້ານຂອງກຸ່ມບ້ານໂພນພະ ປະຈໍາ 6 ເດືອນຕົ້ນປີ 2025 ແລະ ທິດທາງແຜນການ 6 ເດືອນທ້າຍປີ 2025 ເຊິ່ງໄດ້ຕີລາຄາລວມ ຜົນງານທີ່ຍາດມາໄດ້ໃນໄລຍະຜ່ານມາ ພ້ອມດ້ວຍຜົນສໍາເລັດຂອງການຊີ້ນໍາໃນຕະຫຼອດໄລຍະຜ່ານມາ.ເຊິ່ງໄດຕີລາລວມ 4 ເນື້ອໃນ 4 ຄາດໝາຍ ໃນໄລຍະຜ່ານມາ, ຄະນະພັກຮາກຖານກໍ່ໄດ້ສົມທົບກັບອໍານາດການປົກຄອງບ້ານຂອງ 7 ບ້ານພາຍໃນກຸ່ມໂພນພະ ເປັນເຈົ້າການສ້າງລະບົບການເມືອງຂອງບ້ານໃຫ້ມີຄວາມເຂັ້ມແຂງ ເຊິ່ງມັນໄດ້ສະແດງອອກຄື: ໜ່ວຍພັກບ້ານໄດ້ຮັບນາມມະຍົດເປັນໜ່ວຍພັກປອດໃສ,ເຂັ້ມແຂງ ແລະ ໜັກແໜ້ນ, ນອກຈາກນີ້ຍັງໄດ້ສຶກສາອົບຮົມການເມືອງແນວຄິດໃຫ້ກັບພໍ່ແມ່ປະຊາຊົນບັນດາເຜົ່າ ໃຫ້ມີຄວາມຕື່ນຕົວ, ມີຄວາມຫ້າວຫັນເປັນເຈົ້າການເຂົ້າຮ່ວມໃນວຽກງານລວມ ຂອງບ້ານ ກໍ່ຄືການທໍາມາຫາກິນແກ້ໄຂຄວາມທຸກຍາກ, ສ້າງຄວາມຢູ່ດີ, ກິນດີ ແລະ ຄວາມຮັ່ງມີແກ່ຄອບຄົວທັງມີຄວາມສາມັກຄີປອງດອງ ແລະ ມີນໍ້າໃຈເອື້ອເຟື້ອຊ່ວຍເຫຼືອເຊິ່ງກັນ,ນອກຈາກນີ້ຍັງໄດ້ສ້າງແຜນການເຄື່ອນໄຫວວຽກງານຈຸດສຸມໂດຍສືບຕໍ່ສຸມໃສ່ 4 ເນື້ອໃນ 4 ຄາດໝາຍຂອງການສ້າງບ້ານ ແລະ ກຸ່ມບ້ານພັດທະນາ ເປັນຕົ້ນແມ່ນການສືບຕໍ່ຈັດຕັ້ງປະຕິບັດແຜນຮັບຮອງ,ແຜນການສ້າງກຸ່ມບ້ານ ໃຫ້ກາຍເປັນບ້ານໃຫ່ຍ ສີສັນຕົວເມືອງນ້ອຍໃນຊົນນະບົດ ໂດຍສືບຕໍ່ບັນດາມາດຖານສ້າງກຸ່ມບ້ານໃຫ່ຍໃຫ້ກາຍເປັນຕົວເມືອງນ້ອຍໃນຊົນນະບົດໃຫ້ບັນລຸ ແລະ ສືບຕໍ່ສຶກສາອົບຮົມການເມືອງແນວຄິດໃຫ້ພໍ່ແມ່ປະຊາຊົນບັນດາເຜົ່າ, ແກ້ໄຂບັນຫາໜໍ່ແໜງ ຄ້າຂາຍ ແລະ ເສບຢາເສບຕິດ ຕິດພັນກັບບັນດາປະກົດການຫຍໍ້ທໍ້ໃນສັງຄົມເຊັ່ນ: ຂີ້ລັກງັດແງະ ແລະ ອື່ນໆ ອີກດ້ວຍ.
ໂອກາດດຽວກັນນີ້ ທ່ານ ພົຈວ ບົວພັນ ອິນທະປັນຍາ ຮອງເລຂາພັກແຂວງ ກໍ່ໄດ້ຢື້ຢາມຖາມຂ່າວ, ຄວາມເປັນຫ່ວງເປັນໃຍ ແລະໂອ້ລົມ ເຊິ່ງທ່ານໄດ້ເນັ້ນໜັກໃຫ້ກຸ່ມບ້ານໂພນພະ ຈົ່ງສືບຕໍ່ເອົາໃຈໃສ່ດ້ານວຽກງານ ປ້ອງກັນຊາດ-ປ້ອງກັນຄວາມສະຫງົບ ເປັນບັນຫາສໍາຄັນອັນຕົ້ນຕໍ່ ເພື່ອຕີຖອຍດ້ານບັນຫາປະກົດການຫຍໍ້ທໍ້ຕ່າງໆ ພາຍໃນກຸ່ມບ້ານໃຫ້ໄດ້ຢ່າງຂາດຕົວ,ສືບຕໍ່ພັດທະນາເສດຖະກິດຂອງບ້ານໃຫ້ມີການຂະຫຍາຍຕົວຢ່າງແຂງແຮງ ສ້າງຄວາມຢູ່ດີກິນດີໃຫ້ພໍ່ແມ່ປະຊົນບັນດາເຜົ່າ, ສືບຕໍ່ປັບປຸງອົງການປົກຄອງບ້ານ ແລະ ຂະແໜງການຂອງບ້ານໃຫ້ແຂງແຮງ ຮັບປະກັນໄດ້ໃນການຮັບໃຊ້ໜ້າທີ່ວຽກງານຢ່າງມີປະສິດທິພາບ
ພ້ອມກັນນັ້ນກໍ່ໃຫ້ສືບຕໍ່ສຶກສາອົບຮົມການເມືອງແນວຄິດໃຫ້ພໍ່ແມ່ປະຊາຊົນບັນດາເຜົ່າ ໃຫ້ມີແນວຄິດອຸ່ນອ່ຽງທຸ່ນທ່ຽງຕໍ່ການນໍາພາຂອງພັກ-ລັດ, ສຸມໃສ່ນໍາພາອໍານາດການປົກຄອງບ້ານ,ພໍ່ແມ່ປະຊາຊົນ ໃຫ້ມີຄວາມສະຫງົບປອດໄພຈາກກຸ່ມຄົນປໍລະປັກຕໍ່ຊາດ,ສືບຕໍ່ແກ້ໄຂປະກົດການຫຍໍ້ທໍ້ຂອງສັງຄົມ ເພື່ອຮັບປະກັນຊີວິດການເປັນຢູ່ຂອງປະຊາຊົນໃຫ້ມີບາດກ້າວຂະຫຍາຍຕົວດີຂື້ນ, ສືບຕໍ່ແກ້ໄຂຊີວິດການເປັນຢູ່ຂອງປະຊາຊົນໃຫ້ຫຼຸດພົ້ນອອກຈາກຄວາມທຸກຍາກ ຕາມແຜນການທີ່ວາງໄວ້.ໂອກາດດັ່ງກ່າວ ການນໍາແຂວງໄຊສົມບູນ ຍັງໄດ້ ມອບລົດຈັກ ຈໍານວນ 2 ຄັນ ໃຫ້ ປກສ ກຸ່ມບ້ານໂພນພະ, ບ້ານ ໂຮມຈະເລີນ ເມືອງອະນຸວົງ ແລະ ລົງກວດກາເບິ່ງເສັ້ນທາງຈາກບ້ານຫຼັກ 24 ຫາ ບ້ານໂພນພະ ພ້ອມກັບຄະນະທິມງານຂອງແຂວງ ແລະ ເມືອງຕື່ມອີກ.