ເນື່ອງໃນໂອກາດ ທີ່ສະຫາຍ ຫງຽວນ ຫງ໋ອກ ແຂງ ຫົວໜ້າຄະນະ ສົມທົບກັບກະຊວງກະສິກຳ ແລະ ພັດທະນາຊົນນະບົດ ສສ ຫວຽດນາມ, ສູນຮ່ວມມື ແລະ ພົວພັນ ສສ ຫວຽດນາມ ພ້ອມດ້ວຍຄະນະ ໄດ້ມາເຄື່ອນໄຫວ ແລະ ເຮັດວຽກ ຢູ່ແຂວງໄຊສົມບູນ ໂດຍສະຫາຍໄດ້ຖືເອົາໂອກາດດັ່ງກ່າວ ເຂົ້າພົບປະ ສະຫາຍ ພອຍຄຳ ຮຸ່ງບຸນຍວງ ເລຂາພັກແຂວງ ເຈົ້າແຂວງໄຊສົມບູນ,
ໃນຕອນເຊົ້າຂອງວັນທີ 25 ພະຈິກ 2024 ນີ້ ຢູ່ທີ່ຫ້ອງຮັບຮອງຫ້ອງວ່າການແຂວງ ເພື່ອລາຍງານຈຸດປະສົງ ໃຫ້ສະຫາຍເລຂາພັກແຂວງໄດ້ຮັບຊາບ ຊຶ່ງຈຸດປະສົງໃນການມາເຄື່ອນໄຫວໃນຄັ້ງນີ້ ກໍເພື່ອມາວິໄຈກ່ຽວກັບດິນ, ນໍ້າ, ພັນລ້ຽງ ແລະ ພັນປູກ ເພື່ອເປັນການສ້າງເງື່ອນໄຂ ໃຫ້ແກ່ຄະນະ ສສ ຫວຽດນາມ ທີ່ກຳລັງຈະມາເຄື່ອນໄຫວດຳເນີນທຸລະກິດ ປູກຝັງ ຢູ່ພາຍໃນແຂວງໄຊສົມບູນ ແລະ ຂໍອະນຸມັດບັນດາໂຄງການດັ່ງກ່າວ ເພື່ອຂໍແຫຼ່ງທຶນຈາກລັດຖະບານ ສສ ຫວຽດນາມ ມາຈັດຕັ້ງຜັນຂະຫຍາຍ, ແນວທາງນະໂຍບາຍ, ກົນໄກ, ໃນການເຮັດທຸລະກິດດັ່ງກ່າວ ຢູ່ພາຍໃນແຂວງໄຊສົມບູນ
ພ້ອມດຽວກັນນັ້ນ ທັງສອງຝ່າຍ ໄດ້ມີການສົນທະນາ ແລກປ່ຽນຄຳຄິດ-ຄຳເຫັນ ເຊິ່ງກັນ ແລະ ກັນ ໃຫ້ມີຄວາມເປັນເອກະພາບໃນການຈັດຕັ້ງປະຕິບັດວຽກງານ ພ້ອມນັ້ນ ທາງແຂວງໄຊສົມບູນ ໄດ້ມີການແນະນຳໃຫ້ທາງຄະນະ ສສ ຫວຽດນາມ ເສີມຂະຫຍາຍລ້ຽງສັດທີ່ຕິດພັນກັບມູນເຊື້ອຂອງຊົນເຜົ່າ ພ້ອມທັງລົງສຳຫຼວດພື້ນທີ່ດິນ ທີ່ຕິດພັນກັບພືດຜັກທີ່ເຫັນວ່າເໝາະສົມແກ່ການຜະລິດຜົນ ທັງນີ້ ເພື່ອຮັບປະກັນໃຫ້ວຽກງານການວິໄຈກຽວກັບດິນ, ນໍ້າ, ພືດພັນປູກຝັງ ອຸດົມສົມບູນ ແລະ ເກີດດອກອອກຜົນຕາມຄາດຫມາຍທີ່ວາງໄວ້ ທັງເປັນການປະກອບສ່ວນເຂົ້າໃນການພັດທະນາ ແຂວງໄຊສົມບູນ ແລະ, ເສີມຂະຫຍາຍ, ສ້າງສາຍພົວພັນມິດຕະພາບລະຫວ່າງ ສອງຊາດລາວ-ຫວຽດນາມ ໃຫ້ໝັ້ນຄົງຕະຫລອດໄປ ນອກນີ້ ຄະນະຜູ້ແທນ ສສ ຫວຽດນາມ ໄດ້ມອບເຄື່ອງທີ່ລະນຶກໃຫ້ກັບ ແຂວງໄຊສົມບູນ ອີກດ້ວຍ.
