ຕອນເຊົ້າວັນທີ 12 ພະຈິກ 2024 ນີ້ ສະຫາຍ ລາວປາວຊົ່ງ ນະວົງໄຊ ກໍາມະການສູນກາງພັກ, ຮອງເລຂາຄະນະພັກ,ຮອງຫົວໜ້າຄະນະໂຄສະນາອົບຮົມສູນກາງພັກພ້ອມດ້ວຍຄະນະໄດ້ລົງມາເຄື່ອນໄຫວຕິດຕາມຊຸກຍູ້ວຽກງານຮອບດ້ານຂອງຄະນະໂຄສະນາອົບຮົມສູນກາງພັກຢູ່ເມືອງຮົ່ມ ແຂວງ ໄຊສົມບູນ, ໂດຍການຕ້ອນຮັບຂອງ ສະຫາຍ ຈຸນດາ ຄໍາບຸນມີ ກໍາມະການພັກແຂວງ, ເລຂາຄະນະບໍລິຫາງານພັກເມືອງ ເຈົ້າເມືອງ ເມືອງຮົ່ມ.
ໃນໂອກາດທີມີຄວາມໝາຍຄວາມສໍາຄັນນີ້ສະຫາຍ ເລຂາຄະນະບໍລິຫາງານພັກເມືອງ ໄດ້ລາຍງານສະພາບລວມຂອງເມືອງ ຈາກນັ້ນ ສະຫາຍ ນາງ ມະນີວັນ ຢ່າທໍ່ຕູ້ ກໍາມະການພັກເມືອງ, ຫົວໜ້າຄະນະໂຄສະນາອົບຮົມເມືອງໄດ້ລາຍງານສະພາບລວມຂອງວຽກງານໂຄສະນາອົບຮົມເມືອງໂດຍຫຍໍ້ເປັນຕົ້ນແມ່ນໄດ້ເອົາໃຈໃສ່ສຶກສາອົບຮົມການເມືອງແນວຄິດ, ເຜິຍແຜ່ເຊື່ອມຊືມບັນດາ ມະຕິ, ຄໍາສັ່ງ, ຄໍາແນະນໍາຂອງສູນກາງພັກໃຫ້ຖັນແຖວສະມາຊິກພັກ-ພະນັກງານລັດຖະກອນ ແລະ ພໍ່ແມ່ປະຊາຊົນບັນດາເຜົ່າໃນທົ່ວເມືອງຮົ່ມ, ຫຼັງຈາກນັ້ນບັນດາສະຫາຍຄະນະປະຈໍາພັກເມືອງກໍ່ໄດ້ມີຄໍາເຫັນລາຍງານສະພາບການຈັດຕັ້ງປະຕິບັດວຽກງານໃນໄລຍະຜ່ານມາທີ່ມີຂໍ້ຫຍຸ້ງຍາກ ແລະ ຂໍ້ຄົງຄ້າງໂດຍຫຍໍ້ເພື່ອຍົກບັນຫາຂື້ນມາແລກປ່ຽນຈາກການຈັດຕັ້ງປະຕິບັດວຽກງານຕົວຈິງຢູ່ພາຍໃນເມືອງຮົ່ມ.
ໃນຕອນທ້າຍ ສະຫາຍ ລາວປາວຊົ່ງ ນະວົງໄຊ ກໍາມະການສູນກາງພັກ, ຮອງເລຂາຄະນະພັກ,ຮອງຫົວໜ້າຄະນະໂຄສະນາອົບຮົມສູນກາງພັກໄດ້ນໍາເອົາເຄື່ອງຄອມພິວເຕີຕັ້ງໂຕະຈໍານວນ 1 ຊຸດ ມາມອບໃຫ້ຄະນະໂຄສະນາອົບຮົມເມືອງເພື່ອນໍາໃຊ້ເຂົ້າໃນວຽກງານຕົວຈິງ.