ເນື່ອງໃນໂອກາດ ສະເຫຼີມສະຫຼອງປີທ່ອງທ່ຽວລາວ 2024 ຢູ່ແຂວງໄຊສົມບູນ ຄະນະກໍາມະການງານເທດສະການອາຫານ ແລະ ຕະຫຼາດນັດວາງສະແດງສິນຄ້າ ໄດ້ຈັດງານແຂ່ງຂັນເທດສະການອາຫານຂຶ້ນ ໃນຕອນບ່າຍຂອງວັນທີ 30 ພະຈິກ 2024 ນີ້ ຢູ່ທີ່ເດີ່ນສະໂມສອນເມືອງອະນຸວົງ ໂດຍການເຂົ້າຮ່ວມຂອງທ່ານ ນາງ ເພັດສະໄໝ ໂພໄຊຍະວົງ ປະທານອົງການກວດກາພັກ-ລັດ ແຂວງ, ທ່ານ ນາງ ສາຄອນ ຮຸ່ງບຸນຍວງ ຄອບຄົວການນຳແຂວງ, ທ່ານ ນາງ ບຸນທະວີ ສິງວິໄລ ວ່າການປະທານສະຫະພັນແມ່ຍິງ ແຂວງໄຊສົມບູນ ພ້ອມດ້ວຍຄະນະກຳມະການແຂ່ງຂັນ ຕະຫຼອດຮອດໜ່ວຍສະຫະພັນແມ່ຍິງ ບັນດາພະແນກການອ້ອມຂ້າງແຂວງ, ໜ່ວຍສະຫະພັນແມ່ຍິງ ເມືອງອະນຸວົງ ແລະ ຕົວແທນຈາກຮ້ານອາຫານ ເຂົ້າຮ່ວມ.
ໃນພິທີ ໄດ້ຮັບຟັງລາຍງານການຈັດງານແຂ່ງຂັນ ເທດສະການອາຫານ ປະຈຳປີ 2024 ເພື່ອເປັນການສົ່ງເສີມອາຫານທີ່ເປັນເອກະລັກ ຂອງຊາວແຂວງໄຊສົມບູນ ຊຶ່ງການແຂ່ງຂັນປຸງແຕ່ງອາຫານໃນຄັ້ງນີ້ ມີຕົວແທນເຂົ້າຮ່ວມແຂ່ງຂັນ 18 ພາກສ່ວນ ທີ່ມີອາຫານເປັນເອກະລັກ ຄື: ສະຫະພັນແມ່ຍິງ ເມືອງອະນຸວົງ ຫຼາມໄກ່ດໍາໃສ່ບັ້ງໄມ້ໄຜ່, ໜ່ວຍສະຫະພັນແມ່ຍິງ ຫ້ອງການ-ການເງິນເມືອງ ເອາະປູ, ໜ່ວຍສະຫະພັນແມ່ຍິງ ສຶກສາເມືອງ ໝົກໄຄ 3 ສະຫາຍນໍ້າໃຈພາລຸຍສວນໄຊສົມບູນ, ໜ່ວຍສະຫະພັນແມ່ຍິງ ໂຍທາທິການ ແລະ ຂົນສົ່ງ ເມືອງ ລາບໝາກຈອງ, ໜ່ວຍສະຫະພັນແມ່ຍິງ ໂຮງຮຽນປະຖົມພູຫົວຊ້າງ ຫຼາມປາຜັ້ນໃສ່ບັ້ງໄມ້ໄຜ່, ໜ່ວຍສະຫະພັນແມ່ຍິງ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງ ຕົ້ມໄກ່ໃສ່ຢາເຜົ່າມົ້ງ, ໜ່ວຍສະຫະພັນແມ່ຍິງ ອົງການໄອຍະການປະຊາຊົນ ແຂວງ ອ່ອມຂີ້ເຫຼັກ, ໜ່ວຍສະຫະພັນແມ່ຍິງ ຫ້ອງວ່າການແຂວງ ອອມບອນ, ໜ່ວຍສະຫະພັນແມ່ຍິງອົງການຈັດຕັ້ງມະຫາຊົນ ກວນຜັກກາດລະດູໜາວ, ໜ່ວຍສະຫະພັນແມ່ຍິງ ເຕັກໂນໂລຊີ ແລະ ການສື່ສານ ແຂວງ ແຈ່ວບອງລວກຜັກ, ໜ່ວຍສະຫະພັນແມ່ຍິງ ຄະນະຈັດຕັ້ງແຂວງ ເອາະຫຼາມນົກ, ໜ່ວຍສະຫະພັນແມ່ຍິງ ພະແນກກະສິກຳ ແລະ ປ່າໄມ້ ແຂວງ ເອາະຫຼາມຊີ້ນໝູປ່າ, ຮ້ານອາຫານໄຊສົມບູນ ເອາະນົກຊີດໃສ່ໄມ້ປ່ອງ ແລະ ແຈ່ວໝາກແຄນແດນເໜືອ, ຮ້ານອາຫານລາວ ແກງໜໍ່ໄມ້, ປີ້ງໄກ່, ຕຳໝາກຫຸ່ງ, ຮ້ານອາຫານໄອລິນ ແໜບກົບ, ຮ້ານອາຫານຜາເຢັນ ທອດປາສອງໃຈ, ຮ້ານອາຫານສົມວິໄລ ແນບປານ້ອຍ ແລະ ຮ້ານອາຫານນາງນ້ອຍ ລາບນົກກາງແກ, ທັງ 18 ພາກສ່ວນ ຈະໄດ້ປຸງແຕ່ງອາຫານ ໃຫ້ແກ່ຄະນະກໍາມະການຊີມ ພ້ອມທັງຕັດສິນຈາກຄວາມແຊບ, ຄວາມສະອາດ ທີ່ຖືກຫຼັກອະນາໄມ ແລະ ຄວາມສວຍງາມໃນການແຕ່ງຈານ.
ພ້ອມດຽວກັນນີ້ ຄະນະກຳມະການ ໄດ້ຮັບຊີມອາຫານ ແລະ ລົງຄະແນນໃຫ້ແຕ່ລະພາກສ່ວນ ເພື່ອຄັດເລືອກເອົາຜູ້ທີ່ຊະນະເລີດ, ຊຶ່ງຜົນການຕັດສິນລາງວັນທີ 1 ໄດ້ແກ່ສະຫະພັນແມ່ຍິງໜ່ວຍ ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງ ເມນູຕົ້້ມໄກ່ໃສ່ຢາເຜົ່າມົ້ງ ຊຶ່ງໃຫ້ກຽດມອບລາງວັນໂດຍທ່ານ ນາງ ສາຄອນ ຮຸ່ງບຸນຍວງ ຄອບຄົວການນຳແຂວງ ໄດ້ຮັບເງິນຈຳນວນ 3,500,000 ກີບ, ລາງວັນທີ 2 ໄດ້ແກ່ສະຫະພັນແມ່ຍິງເມືອງອະນຸວົງ ຫຼາມໄກ່ດຳໃສ່ບັ້ງໄມ້ໄຜ່ ໃຫ້ກຽດມອບໂດຍທ່ານ ນາງ ຄຳສີ ສິດທິວໍລະດາ ຫົວໜ້າຄະນະໂຄສະນາອົບຮົມແຂວງ ໄດ້ຮັບເງິນຈຳນວນ 2,500,000 ກີບ, ລາງວັນທີ 3 ໄດ້ແກ່ຮ້ານອາຫານໄອລິນ ໃຫ້ກຽດມອບໂດຍທ່ານ ນາງ ບຸນທະວີ ສິງວິໄລ ວ່າການປະທານສະຫະພັນແມ່ຍິງແຂວງ ໄດ້ຮັບເງິນຈຳນວນ 1,500,000 ກີບ ແລະ ອີກ 15 ພາກສ່ວນ ແມ່ນໄດ້ຮັບລາງວັນຊົມເຊີຍ ໃຫ້ກຽດມອບໂດຍ ທ່ານ ນາງ ຊ່ວງ ສີວິໄລ ຕາງໜ້າຄອບຄົວການນຳແຂວງ ໄດ້ຮັບເງິນຈຳນວນ 800,000 ກີບ. ພ້ອມດຽວກັນນີ້ ງານວາງສະແດງສິນຄ້າຕະຫຼາດນັດ ໄດ້ນໍາເອົາສິນຄ້າທີ່ເປັນທ່າແຮງຂອງຕົນຜະລິດໄດ້ ມາວາງສະແດງ ແລະ ຈຳໜ່າຍ ໃຫ້ແກ່ຜູ້ທີ່ມາທ່ຽວຊົມ ຊື້ສິນຄ້າ ຕະຫຼອດຮອດປະຊາຊົນບັນດາເຜົ່າ ພາຍໃນແຂວງ. ໃນງານວາງສະແດງສິນຄ້າມີ 7 ພາກສ່ວນທີ່ເຂົ້າຮ່ວມຄື: ສະຫະພັນແມ່ຍິງແຂວງ, ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງ ແລະ ບັນດາ 5 ເມືອງ ຊຶ່ງມີສິນຄ້າປະເພດເຄື່ອງຫັດຖະກຳຈັກສານ ( ໂຕະ, ຕັ່ງ, ຕິບເຂົ້າ, ເຄື່ອງໃຊ້ຄົວເຮືອນ ແລະ ອື່ນໆ), ຫັດຖະກຳຕໍ່າຫູກ, ໜາກກ້ຽງນໍ້າຊານ, ສາລີແຂງ, ກາເຟພູທາດ, ໝາກນັດ, ໄຂ່ໄກ່, ເຂົ້າພັນເຂົ້າໄກ່ນ້ອຍ, ເຄື່ອງປ່າຂອງດົງ, ລ້ອນມັນສາຄູ, ເສັ້ນເຂົ້າປຽກ, ສົ້ມປາ ແລະ ພືດຜັກພື້ນບ້ານຈຳນວນໜຶ່ງ. ທັງນີ້ກໍເພື່ອເປັນການສະເຫຼີມສະຫຼອງປີທ່ອງທ່ຽວລາວ 2024 ຢູ່ແຂວງໄຊສົມບູນ ແລະ ເປັນການສົ່ງເສີມການທ່ອງທ່ຽວ ໃຫ້ມີຂະບວນການຟົດຟື້ນ. ຊຶ່ງງານວາງສະແດງສິນຄ້າ ແລະ ເທດສະການອາຫານ ຈະໄດ້ດຳເນີນເປັນເວລາ 6 ວັນ, ເລີ່ມແຕ່ວັນທີ 28 ພະຈິກ ຫາ ວັນທີ 3 ທັນວາ 2024.
