ເນື່ອງໃນໂອກາດ ທີ່ນໍາພາທິມງານສະຫະພັນກຳມະບານ ກະຊວງສາທາລະນະສຸກ ມາເຄື່ອນໄຫວທັດສະນະສຶກສາ ຮ່ວມກັບສະຫະພັນກຳມະບານ ແຂວງໄຊສົມບູນ ທ່ານ ດຣ ໄພວັນ ແກ້ວປະເສີດ, ຄະນະປະຈຳພັກກະຊວງ, ຮອງລັດຖະມົນຕີກະຊວງສາທາລະນະສຸກ ໄດ້ຖືເອົາໂອກາດນີ້ເຂົ້າພົບປະການນໍາແຂວງໄຊສົມບູນ ໃນຕອນບ່າຍຂອງວັນທີ 1 ພະຈິກ 2024 ນີ້ ທີ່ຫ້ອງຮັບຮອງຫ້ອງວ່າການແຂວງ ເພື່ອຢ້ຽມຢາມຖາມຂ່າວ ແລະ ລາຍງານຈຸດປະສົງ ຂອງການມາເຄື່ອນໄຫວວຽກງານໃນຄັ້ງນີ້. ໂດຍໂອກາດນີ້ ທ່ານ ພ້ອມດ້ວຍຄະນະ ຍັງໄດ້ຮັບຟັງລາຍງານສະພາບວຽກງານພົ້ນເດັ່ນຂອງແຂວງ ເປັນຕົ້ນແມ່ນສະພາບເສດຖະກິດ-ສັງຄົມ, ວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ວຽກງານວັດທະນະທໍາ-ສັງຄົມ ຈາກທ່ານ ຕົ່ງມົວ ຊົວໂກ້, ຄະນະປະຈໍາພັກແຂວງ, ຮອງເຈົ້າແຂວງໄຊສົມບູນ. ຈາກນັ້ນ ທ່ານ ດຣ ໄພວັນ ແກ້ວປະເສີດ ພ້ອມດ້ວຍຄະນະ ໄດ້ໄປຢ້ຽມຢາມ ແລະ ພົບປະໂອ້ລົມພະນັກງານແພດໝໍ ຢູ່ຫ້ອງປະຊຸມໂຮງໝໍແຂວງໄຊສົມບູນ ໂດຍມີ ທ່ານ ເນັ້ງຢ່າງ ໃຈຫວັງໝັ້ນ, ຫົວໜ້າພະແນກສາທາລະນະສຸກແຂວງ ແລະ ທ່ານ ດຣ ເຕີຢີນ ບ່າວວົງໄຊ, ຜູ້ອຳນວຍການໂຮງໝໍ ແຂວງໄຊສົມບູນ ພ້ອມດ້ວຍຮອງຜູ້ນໍານວຍການໂຮງໝໍ ຕະຫຼອດຮອດພະນັກງານພະແນກສາທາລະນະສຸກແຂວງ ແລະ ພະນັກງານແພດໝໍ ເຂົ້າຮ່ວມຕ້ອນຮັບ.
ໂອກາດດັ່ງກ່າວ ທ່ານ ດຣ ເຕີຢີນ ບ່າວວົງໄຊ ໄດ້ລາຍງານການເຄື່ອນໄຫວວຽກງານໃນໄລຍະຜ່ານມາ ໂດຍສະເພາະແມ່ນຂໍ້ສະດວກ ແລະ ຂໍ້ຫຍຸ້ງຍາກ ໃນການບໍລິການຄົນເຈັບ ຕ່າງໆ ລວມທັງຂໍ້ສະເໜີທີ່ທາງໂຮງໝໍຍັງຂາດເຂີນ ເປັນຕົ້ນແມ່ນອຸປະກອນການແພດ, ບຸກຄະລາກອນ ແລະ ງົບປະມານ ເພື່ອໃຫ້ທ່ານຮອງລັດຖະມົນຕີກະຊວງສາທາລະນະສຸກ ໄດ້ຮັບຊາບ ແລະ ຄົ້ນຄວ້າພິຈາລະນາຊ່ວຍແຂວງ. ຈາກນັ້ນ ທ່ານ ດຣ ໄພວັນ ແກ້ວປະເສີດ ໄດ້ມີຄໍາເຫັນໂອ້ລົມໃຫ້ຄະນະອໍານວຍການໂຮງໝໍ ຕະຫຼອດຮອດພະນັກງານແພດໝໍ ຈົ່ງສືບຕໍ່ເຮັດວຽກງານການເມືອງ-ແນວຄິດ ຕິດພັນກັບວຽກງານກໍາມະບານ, ສືບຕໍ່ຍົກສູງຄຸນນະພາບດ້ານການບໍລິການ ຕິດພັນກັບນະໂຍບາຍ 5 ດີ 1 ພໍໃຈ, ສຸມໃສ່ການຈັດຕັ້ງປະຕິບັດບັນດາໜ້າວຽກທີ່ຍັງຄ້າງຄາ ຕິດພັນການສ້າງບຸກຄະລາກອນທີ່ເປັນແພດຊ່ຽວຊານ ເພື່ອຫັນເປັນມືອາຊີບ ແລະ ການນໍາໃຊ້ອຸປະກອນການແພດຕ່າງໆ ຕ້ອງຫັນເປັນລະບົບທັນສະໄໝ ພ້ອມທັງເອົາໃຈໃສ່ບໍາບຸງຮັກສາຕຶກອາຄານ, ສະພາບແວດລ້ອມທັງພາຍໃນ ແລະ ພາຍນອກ ໃຫ້ມີຄວາມສະອາດຈົບງາມ. ສ່ວນບັນຫາບຸກຄະລາກອນ ແລະ ງົບປະມານທີ່ຍັງບໍ່ພຽງພໍ ໃຫ້ຫັນເປັນກຸ້ມຕົນເອງ ຕາມດໍາລັດຂອງລັດຖະ ບານ. ທັງນີ້ ກໍເພື່ອຮັບປະກັນ ໃຫ້ການບໍລິການສຸຂະພາບຂອງປະຊາຊົນ ໄດ້ຮັບການຍົກສູງດີຂຶ້ນກ່ວາເກົ່າ. ໂອກາດດັ່ງກ່າວ ທ່ານ ຍັງໄດ້ນໍາເອົາອຸປະກອນການແພດຈໍານວນໜຶ່ງມາມອບໃຫ້ໂຮງໝໍ ແຂວງໄຊສົມບູນ ແລະ ໄດ້ນໍາພາທິມງານທັດສະນະສຶກສາ ສ້າງຂະບວນການເຕະບານມິດຕະພາບ ຮ່ວມກັບການນໍາ ແລະ ສະຫະພັນກໍາມະບານ ແຂວງໄຊສົມບູນ ເພື່ອຮັດແໜ້ນຄວາມສາມັກຄີ ຕື່ມອີກ.
