ເນື່ອງໃນໂອກາດວັນຊາດທີ 2 ທັນວາ ຄົບຮອບ 49 ປີ (2 ທັນວາ 1975 – 2 ທັນວາ 2024) ແລະ ວັນຄ້າຍວັນເກີດ ຂອງປະທານ ໄກສອນ ພົມວິຫານ ຄົບຮອບ 104 ປີ (13 ທັນວາ 1920 – 13 ທັນວາ 2024) ແຂວງໄຊສົມບູນ ໄດ້ຈັດພິທີປະຖະກະຖາເລົ່າຄືນມູນເຊຶ້ອປະຫວັດຄວາມເປັນມາຂອງ 2 ວັນປະຫວັດສາດສໍາຄັນດັ່ງກ່າວ ຂຶ້ນໃນ ວັນທີ 27 ພະຈິກ 2024 ນີ້, ໂດຍການເປັນປະທານຂອງ ສະຫາຍ ພອຍຄຳ ຮຸ່ງບຸນຍວງ, ເລຂາພັກແຂວງ, ເຈົ້າແຂວງໄຊສົມບູນ ພ້ອມດ້ວຍຮອງເລຂາພັກແຂວງ, ຮອງເຈົ້າແຂວງ ຕະຫຼອດຮອດບັນດາຫົວໜ້າພະແນກການ, ອົງການ-ກົມກອງ ອ້ອມຂ້າງ ພະນັກງານອາວຸໂສບຳນານ, ບໍລິສັດ-ລັດວິສາຫະກິດ, ເຈົ້າເມືອງອະນຸວົງ, ນາຍບ້ານ 2 ບ້ານເທດສະບານ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.
ໃນໂອກາດນີ້, ສະຫາຍ ພອຍຄຳ ຮຸ່ງບູນຍວງ ໄດ້ໃຫ້ກຽດເຜີຍແຜ່ເຊື່ອມຊືມ ເອກະສານ ມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 9 ສະໄໝທີ XI ໄດ້ຍົກໃຫ້ເຫັນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ, ແຜນເງິນຕາ ປະຈຳປີ 2024 ແລະ ທິດທາງແຜນການ ປະຈຳປີ 2025 ຕິດພັນກັບການຈັດຕັ້ງປະຕິບັດ ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ, ການຕີລາຄາວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ວຽກງານການຕ່າງປະເທດ ປະຈຳປີ 2024 ແລະ ທິດທາງ ແຜນການ ປະຈຳປີ 2025, ການກະກຽມ ແລະ ການດໍາເນີນກອງປະຊຸມໃຫຍ່ 3 ຂັ້ນ ຂອງພັກ.
ໃນໂອກາດດຽວກັນນີ້ ຍັງໄດ້ຮັບຟັງການເຜີຍແຜ່ເຊື່ອມຊືມ ວັນຄ້າຍວັນເກີດ ປະທານ ໄກສອນ ພົມວິຫານ ຄົບຮອບ 104 ປີ ຈາກ ສະຫາຍ ພົຈວ ບົວພັນ ອິນທະປັນຍາ ຮອງເລຂາພັກແຂວງ ເຊິ່ງປະທານໄກສອນ ພົມວິຫານ ແມ່ນນັກຮັກຊາດຜູ້ຍິ່ງໃຫຍ່, ແມ່ນນັກປະຫວັດຜູ້ດີເລີດ, ເປັນຜູ້ນໍາສູງສຸດຂອງການປະຕິວັດລາວ ທີ່ມີຄວາມປີຊາສາມາດ, ມີຄວາມສະຫຼາດຫຼັກແຫຼມ, ມີໄຫວພິບອັນແຫຼມຄົມ ແລະ ມີນໍ້າໃຈຕໍ່ສູ້ເດັດດ່ຽວໜຽວແໜ້ນ, ເປັນຜູ້ນໍາທີ່ແສນເຄົາລົບຮັກຂອງພັກ-ລັດ ແລະ ປະຊາຊົນ, ປະທານໄກສອນ ພົມວິຫານ ໄດ້ຊີ້ນໍາຂະບວນການລຸກຮື້ຂອງປະຊາຊົນ ໃນການໂຄ່ນລົ້ມອໍານາດການປົກຄອງແບບເກົ່າ ແລະ ສ້າງຕັ້ງອໍານາດການປົກຄອງປະຕິວັດຂຶ້ນໃນຂອບເຂດທົ່ວປະເທດ ດ້ວຍ 3 ບາດຄ້ອນຍຸດທະສາດ ທັງນີ້ ກໍ່ພື່ອເປັນການສຶກສາອົບຮົມ, ປຸກລະດົມມະຫາຊົນ ປະຊາຊົນເປັນເຈົ້າການ ເສີມຂະຫຍາຍມູນເຊື້ອອັນດີງາມຂອງ 2 ວັນປະຫວັດສາດ ໃຫ້ຄົນຮຸ່ນໃໝ່ໄດ້ສືບທອດ, ຮຽນຮູ້ເອົາແບບຢ່າງ ທີ່ດີໄປໜູນໃຊ້ເຂົ້າໃນຊີວິດຂອງຕົນ ພ້ອມນັ້ນກໍຕ້ອງຝຶກຝົນຫຼໍ່ຫຼອມຕົນເອງໃຫ້ມີນໍ້າໃຈຮັບໃຊ້ຊາດ-ຮັບໃຊ້ປະຊາຊົນ ດ້ວຍຄວາມບໍລິສຸດຜຸດຜ່ອງ.
ສະຫາຍ ຕົ່ງມົວ ຊົວໂກ້ ຄະນະປະຈຳພັກແຂວງ, ຮອງເຈົ້າແຂວງໄຊສົມບູນ ໄດ້ເຊື່ອຊືມເອກະສານວັນຊາດ ທີ 2 ທັນວາ ຄົບຮອບ 49 ປີ ໂດຍໄດ້ຍົກໃຫ້ເຫັນເນື້ອໃນທີ່ສຳຄັນຂອງວັນຊາດ ທີ 2 ທັນວ່າ ແມ່ນວັນທີ່ມີຄວາມໝາຍສໍາຄັນ ທົ່ວພັກ, ທົ່ວລັດ ແລະ ທົ່ວປວງຊົນລາວທັງຊາດ, ແມ່ນວັນແຫ່ງໄຊຊະນະອັນຍິ່ງໃຫຍ່ ໃນປະຫວັດສາດແຫ່ງການຕໍ່ສູ້ຂອງຊາດລາວເຮົາແລະ ມູນເຊື້ອທີ່ສະຫງ່າອົງອາດແຫ່ງການຕໍ່ສູ້ຕ້ານການຮຸກຮານຂອງສັດຕູ ແລະ ສ້າງສາພັດທະນາ ໂດຍສືບທອດມູນເຊື້ອອັນອົງອາດຂອງບັນພະບູລຸດ, ປະຊາຊົນລາວບັນດາເຜົ່າ ພາຍໃຕ້ການນໍາພາຂອງພັກ ປະຊາຊົນປະຕິວັດລາວ ໄດ້ສາມັກຄີກັນຕໍ່ສູ້ຢ່າງພິລະອາດຫານຕ້ານການຮຸກຮານ ແລະ ການຄອບຄອງ ຂອງພວກຈັກກະພັດລ່າເມືອງຂຶ້ນແບບເກົ່າ ແລະ ແບບໃໝ່ ສາມາດປົດປ່ອຍປະເທດຊາດ ຢ່າງມີໄຊ ແລະ ໄດ້ສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວຂຶ້ນຢ່າງສະຫງ່າຜ່າເຜີຍໃນທີ 2 ທັນວ່າ 1975.
ໂອກາດນີ້ຍັງໄດ້ມອບໃບຍ້ອງຍໍ ໃຫ້ກັບບັນດາບໍລິສັດ ທີ່ມີຜົນງານ ໃນການປົກປັກຮັກສາ ແລະ ພັດທະນາ ແຂວງໄຊສົມບູນ ອີກດ້ວຍ.
