ພະແນກເຕັກໂນໂລຊີ ແລະ ການສື່ສານ ແຂວງໄຊສົມບູນ ໄດ້ຈັດພິທີ ປາຖະກະຖາ ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70 ປີ ແລະ ວັນໄປສະນີ-ໂທລະຄົມແຫ່ງຊາດ (ວັນທີ 13 ມີນາ 1965 – 13 ມີນາ 2025) ຄົບຮອບ 60 ປີ ຂຶ້ນໃນຕອນບ່າຍຂອງວັນທີ 27 ມີນາ 2025 ນີ້ ຢູ່ທີ່ຫ້ອງປະຊຸມຂອງຕົນ ໂດຍການເປັນປະທານຂອງສະຫາຍ ສຸກສະຫວາດ ວົງພູມເຫລັກ ຮອງເຈົ້າແຂວງໄຊສົມບູນ, ຜູ້ຊີ້ນຳວຽກງານເສດຖະກິດ, ມີສະຫາຍ ດົວຊົ່ງ ເລ່ຍໂກ້ ຫົວໜ້າພະແນກເຕັກໂນໂລຊີ ແລະ ການສື່ສານແຂວງ ພ້ອມດ້ວຍຕາງໜ້າບໍລິສັດວິສາຫະກິດ ທີ່ໃຫ້ບໍລິການທາງດ້ານໄປສະນີໂທລະຄົມ ຕະຫລອດຮອດພະນັກງານພາຍໃນພະແນກ ເຂົ້າຮ່ວມ.
ໃນພິທີ ສະຫາຍ ສຸກສະຫວາດ ວົງພູມເຫລັກ ໄດ້ປາຖະກະຖາ ຫວນຄືນມູນເຊື້ອ ວັນສ້າງຕັ້ງພັກປະຊາຊົນ ປະຕິວັດລາວ ຊຶ່ງພັກປະຊາຊົນປະຕິວັດລາວແມ່ນພັກທີ່ເດີນຕາມລັດທິມາກ-ເລນິນ ເປັນພັກທີ່ສືບທອດພາລະກິດຂອງພັກກອມມູນິດອິນດູຈີນ ເປັນຕົວແທນຂອງຊົນຊັ້ນກຳມະກອນ ແລະ ຊາວຜູ້ອອກແຮງງານຢ່າງແທ້ຈິງ ພັກຖືເອົາການຮັບໃຊ້ຊາດ ຮັບໃຊ້ປະຊາຊົນ ເປັນທິດນຳພື້ນຖານໃນການເຄື່ອນໄຫວຂອງຕົນ, ພັກປະຊາຊົນປະຕິວັດລາວ ໄດ້ຮັບການສ້າງຕັ້ງຂື້ນ ໃນວັນທີ 22 ມີນາ 1955 ໂດຍແມ່ນປະທານ ໄກສອນ ພົມວິຫານ ເປັນເລຂາທິການໃຫຍ່ ພັກປະຊາຊົນປະຕິວັດລາວໃນເວລານັ້ນ. ຕະຫຼອດໄລຍະ 70 ປີ ຜ່ານມາ ພາຍໃຕ້ການນຳພາ-ຊີ້ນຳ ອັນປິຊາສາມາດ ສະຫລາດສ່ອງໃສຂອງພັກປະຊາຊົນປະຕິວັັດລາວ ຊຶ່ງເຫັນໄດ້ວ່າປະເທດຊາດໄດ້ຮັບການພັດທະນາຢ່າງຮອບດ້ານ ດ້ວຍບາດກ້າວທີ່ໜັກແໜ້ນ ພາຍຫຼັງພັກປະຊາຊົນປະຕິວັດລາວ ໄດ້ຮັບການສ້າງຕັ້ງຂຶ້ນ ກໍໄດ້ແບກຫາບພາລະກຳປະຫວັດສາດອັນແສນຫຍຸ້ງຍາກລຳບາກ ຊຶ່ງເຕັມໄປດ້ວຍການທົດສອບທີ່ລະອິດລະອ້ຽວ ແລະ ການເສຍສະຫຼະອັນໃຫຍ່ຫຼວງ ນຳພາປວງຊົນລາວທັງຊາດຕໍ່ສູ້ປົດປ່ອຍ ອອກຈາກແອກປົກຄອງຂອງຕ່າງຊາດ, ນຳເອົາຄວາມເປັນເອກະລາດ, ອິດສະຫຼະພາບ, ສິດເປັນເຈົ້າຂອງປະເທດຊາດອັນແທ້ຈິງ ມາສູ່ປະເທດຊາດ ແລະ ປະຊາຊົນບັນດາເຜົ່າ.
ທັງນີ້ກໍເພື່ອທົບທວນຫວນຄືນມູນເຊື້ອ ແລະ ໄຊຊະນະປະຫວັດສາດໃນພາລະກິດແຫ່ງການຕໍ່ສູ້ປົດປ່ອຍຊາດກໍ່ ຄືຜົນສໍາເລັດໃນ ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ພາຍໃຕ້ການນໍາພາຂອງພັກປະຊາຊົນປະຕິວັດລາວ ໃນໄລຍະ 70 ປີ ຜ່ານມາ ແລະ ວັນໄປສະນີ-ໂທລະຄົມແຫ່ງຊາດ ຄົບຮອບ 60 ປີ ຄຽງຄູ່ກັບການປູກຈິດສໍານຶກໃຫ້ສະມາຊິກພັກ, ພະນັກງານ ໄດ້ຮັບຮູ້, ເຂົ້າໃຈເຖິງຄວາມໝາຍຄວາມສຳຄັນຂອງວັນດັ່ງກ່າວ ແລະ ເຂົ້າໃຈກ່ຽວກັບມູນເຊື້ອເເຫ່ງການຕໍ່ສູ້ພິລະອາດຫານ, ມູນເຊື້ອຄວາມສາມັກຄີເປັນອັນໜຶ່ງອັນດຽວຂອງປະຊາຊົນບັນດາເຜົ່າ ແລະ ມູນເຊື້ອຄວາມສາມັກຄີ ແນ່ໃສ່ຖືເອົາວັນສ້າງຕັ້ງພັກປະຊາຊົນປະຕິວັດລາວ ປັບປຸງກໍ່ສ້າງພັກທຸກດ້ານ ດ້ວຍມາດຕະການສືບຕໍ່ດໍາເນີນຊີວິດການເມືອງ, ປົວແປງພັກໃຫ້ເລິກເຊິ່ງ, ເຮັດໃຫ້ພັກມີຄວາມປອດໃສ, ເຂັ້ມແຂງ ແລະ ໜັກແໜ້ນ, ເພີ່ມທະວີ ຄວາມສາມາດນໍາພາ ລັກສະນະນໍາໜ້າຂອງພັກໃຫ້ສູງຂຶ້ນຢ່າງບໍ່ຢຸດຢັ້ງ. ພ້ອມດຽວກັນນັ້ນ ໄດ້ມີການມອບ-ຮັບໃບຍ້ອງຍໍຂັ້ນແຂວງ, ຂັ້ນພະແນກ, ຂັ້ນກົມກອງ ແລະ ບຸກຄົນຜູ້ທີ່ມີຜົນງານດີເດັ່ນ ຊຶ່ງໃຫ້ກຽດຂຶ້ນມອບໂດຍສະຫາຍ ສຸກສະຫວາດ ວົງພູມເຫລັກ ອີກດ້ວຍ.
