ຄະນະໂຄສະນາອົບຮົມ ແຂວງໄຊສົມບູນ ຈັດພິທີປາຖະກະຖາ ວັນປະກາດເອກະ ລາດ ຄົບຮອບ 79 ປີ ແລະ ຂຶ້ນໃນຕອນເຊົ້າຂອງວັນທີ 10 ຕຸລາ ນີ້ ທີ່ຫ້ອງປະຊຸມຫ້ອງວ່າການແຂວງ ໂດຍການເປັນປະທານຂອງ ທ່ານ ພອຍຄໍາ ຮຸ່ງບຸນຍວງ ເລຂາພັກແຂວງ, ເຈົ້າແຂວງໄຊສົມບູນ, ມີຄະນະປະຈຳພັກແຂວງ, ກຳມະການພັກແຂວງ, ປະທານສະພາປະຊາຊົນແຂວງ, ຫົວໜ້າພະແນກການ, ແຂກທີ່ຖືກເຊີນ ຕະຫຼອດຮອດສະມາຊິກພັກ ພະນັກງານຫຼັກແຫຼ່ງ, ຜູ້ຕາງໜ້າບໍລິສັດ, ລັດວິສາຫະກິດ ແລະ ກຳລັງປະກອບອາວຸດປະຈຳ ແຂວງ ເຂົ້າຮ່ວມ.
ໂອກາດດັ່ງກ່າວ ທ່ານ ພອຍຄໍາ ຮຸ່ງບຸນຍວງ ໄດ້ປະຖະກະຖາ ວັນປະກາດເອກະລາດ ຄົບຮອບ 79 ປີ ກໍຄືວັນທີ 12 ຕຸລາ ປີ 1945-12 ຕຸລາ 2024 ຊຶ່ງຈຸດປະສົງຂອງການປາຖະກະຖາໃນຄັ້ງນີ້ ກໍເພື່ອທົບທວນຫວນຄືນມູນເຊື້ອ ແລະ ໄຊຊະນະປະຫວັດສາດໃນພາລະກິດແຫ່ງການຕໍ່ສູ້ປົດປ່ອຍຊາດ ກໍຄືຜົນສຳເລັດໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ສະມາຊິກພັກ, ພະນັກງານ, ທະຫານ, ຕຳຫຼວດ ແລະ ປະຊາຊົນ ໃນສັງຄົມໄດ້ຮັບຮູ້, ເຂົ້າໃຈ ເຖິງຄວາມໝາຍຄວາມສຳຄັນ ຂອງວັນດັ່ງກ່າວ ແລະ ເຂົ້າໃຈກ່ຽວກັບມູນເຊື້ອແຫ່ງການຕໍ່ສູ້ອັນພິລະອາດຫານ, ມູນເຊື້ອຄວາມສາມັກຄີເປັນອັນໜຶ່ງອັນດຽວຂອງປະຊາຊົນບັນດາເຜົ່າ ພ້ອມທັງເປັນການສຶກສາອົບຮົມ, ປຸກລະດົມມະຫາຊົນ, ປະຊາຊົນເປັນເຈົ້າການເສີມຂະຫຍາຍມູນເຊື້ອອັນດີງາມຂອງທ່ານຜູ້ນຳ ຕິດພັນກັບການຝຶກຝົນຫຼໍ່ຫຼອມຄຸນສົມບັດສິນທຳປະຕິວັດ ຂອງສະມາຊິກພັກ, ພະນັກງານ, ຍົກສູງນໍ້າໃຈເສຍສະຫຼະ, ເຮັດທຸກສິ່ງທຸກຢ່າງເພື່ອຜົນປະໂຫຍດສ່ວນລວມຂອງຊາດ ແລະ ຄວາມຢູ່ດີກິນດີຂອງປະຊາຊົນ
