ສະຫະພັນແມ່ຍິງ ແຂວງໄຊສົມບູນ ໄດ້ຈັດພິທີ ປາຖະກະຖາ ວັນສ້າງຕັ້ງສະຫະພັນແມ່ຍິງລາວ ຄົບຮອບ 69 ປີ (20 ກໍລະກົດ 1955-20 ກໍລະກົດ 2024) ຂຶ້ນໃນຕອນເຊົ້າຂອງວັນທີ 18 ກໍລະກົດ 2024 ນີ້ ທີ່ສະໂມສອນເມືອງອະນຸວົງ ໂດຍການເຂົ້າຮ່ວມເປັນປະທານ ຂອງທ່ານ ສຸກສະຫວາດ ວົງພູມເຫຼັກ ຮອງເຈົ້າແຂວງໄຊສົມບູນ, ມີທ່ານ ນາງ ບຸນທະວີ ສິງວີໄລ ວ່າການປະທານສະຫະພັນແມ່ຍິງ ແຂວງ, ມີຄອບຄົວການນຳແຂວງ ຕະຫຼອດຮອດພະແນກການ, ອົງການ-ກົມກອງ ອ້ອມຂ້າງແຂວງ ແລະ ສະມາຊິກສະຫະພັນແມ່ຍິງ ພາຍໃນແຂວງ ພ້ອມດ້ວຍໜ່ວຍແມ່ຍິງພາຍໃນເມືອງ ອະນຸວົງ ເຂົ້າຮ່ວມ.
ໃນພິທີຜູ້ເຂົ້າຮ່ວມ ໄດ້ຮັບຊົມການສະແດງສີນລະປະ ແລະ ຮ້ອງເພັງລວມໝູ່ ຈາກຄອບຄົວການນຳ ແລະ ກອງບັນຊາການປ້ອງກັນຄວາມສະຫງົບ ແຂວງໄຊສົມບູນ ຫັຼງຈາກນັ້ນ ທ່ານສຸກສະຫວາດ ວົງພູມເຫຼັກ ໄດ້ປະຖະກາຖາ ວັນສ້າງຕັ້ງສະຫະພັນແມ່ຍິງລາວ ຊຶ່ງໄດ້ຍົກໃຫ້ເຫັນເຖິງມູນເຊື້ອ ປະຫວັດຄວາມເປັນມາ, ການເຕີບໃຫຍ່ຂະຫຍາຍຕົວ ແລະ ຜົນງານການເຄື່ອນໄຫວ ຂອງສະຫະພັນແມ່ຍິງລາວບັນດາເຜົ່າ ທີ່ໄດ້ອຸທິດຕົນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ, ກໍຄືການຕໍ່ສູ້ອັນພິລະອາດຫານ ແລະ ລະອິດລະອ້ຽວຍືດເຍື້ອຍາວນານບໍ່ຍອມຈຳນົນ ຄຽງບ່າຄຽງໄຫລ່ກັບເພດຊາຍ ໃນພາລະກິດປົດປ່ອຍຊາດ, ແມ່ຍິງລາວໄດ້ເປັນກຳລັງແຮງ ແລະ ມີບົດບາດທາງການເມືອງ, ເສດຖະກິດ, ວັດທະນະທຳ-ສັງຄົມ, ປະຕິບັດໜ້າທີ່ປົກປ້ອງສິດຜົນປະໂຫຍດອັນຊອບທຳ ຕິດພັນກັບການປະຕິບັດສິດສະເໝີພາບຍິງ-ຊາຍ ໃນຄອບຄົວ ແລະ ສັງຄົມ.
ການຈັດຕັ້ງພິທີ ໃນຄັ້ງນີ້ ແມ່ນມີຄວາມໝາຍສໍາຄັນເປັນຢ່າງຍິ່ງ ເພື່ອເປັນການສຶກສາອົບຮົມສະມາຊິກສະຫະພັນແມ່ຍິງ, ແມ່ຍິງລາວບັນດາເຜົ່າ ໃຫ້ມີຄວາມຮັບຮູ້ ແລະ ເຂົ້າໃຈກ່ຽວກັບປະຫວັດການກຳເນີດ ແລະ ເຕີບໃຫຍ່ຂະຫຍາຍຕົວ ຂອງອົງການຈັດຕັ້ງ ສະຫະພັນແມ່ຍິງລາວ ແລະ ປູກຈິດສຳນຶກໃນການອະນຸລັກຮັກສາ ແລະ ເສີມຂະຫຍາຍຄຸນ ລັກສະນະທີ່ເປັນມູນເຊື້ອ ຂອງແມ່ຍິງລາວບັນດາເຜົ່າ,ປຸກລະດົມສະມາຊິກສະຫະພັນແມ່ຍິງ ແລະ ແມ່ຍິງລາວບັນດາເຜົ່າ ເປັນເຈົ້າການເຂົ້າ ຮ່ວມປະຕິບັດ 2 ໜ້າທີ່ຍຸດທະສາດຄື: ການປົກປັກຮັກສາ ແລະ ສ້າງສາພັດທະນາປະເທດ ຊາດ ເວົ້າລວມ, ເວົ້າສະເພາະ ການພັດທະນາແມ່ຍິງໃຫ້ມີຄວາມກ້າວໜ້າ, ເປັນເຈົ້າການເຂົ້າຮ່ວມທຸກວຽກງານ ໂດຍສະເພາະ ແມ່ນການຈັດຕັ້ງປະຕິບັດຄາດໝາຍສູ້ຊົນ ໃນການພັດທະນາແມ່ຍິງ ກໍຄືການພັດທະນາຕົນເອງໃນແຕ່ລະໄລຍະຕິດພັນກັບການປະຕິບັດຂໍ້ແຂ່ງຂັນ 3 ດີ ຂອງສູນກາງສະຫະພັນແມ່ຍິງລາວ, ຂໍ້ແຂ່ງຂັນຮັກຊາດ ແລະ ພັດທະນາ. ພ້ອມດຽວກັນນີ້ ສະຫະພັນແມ່ຍິງແຂວງໄດ້ມອບຂອງຂັວນໃຫ້ແກ່ແມ່ປ້າອາວຸໂສບຳນານ ແລະ ຄອບຄົວການນຳແຂວງ ຕື່ມອີກ
ພາຍຫຼັງສໍາເລັດພິທີດັ່ງກ່າວ ຜູ້ເຂົ້າຮ່ວມຍັງພ້ອມກັນເຂົ້າຮ່ວມຂະບວນການ ບໍລິຈາກເລືອດ ເພື່ອເປັນການຊ່ວຍເຫຼືອສັງຄົມ ກໍຄືປະຊາຊົນລາວບັນດາເຜົ່າ ທີ່ພວມນອນປິ່ນປົວຢູ່ບັນດາໂຮງໝໍແຫ່ງຕ່າງໆ ທີ່ຍັງລໍຖ້າການຊ່ວຍເຫຼືອຈາກສັງຄົມ ເພື່ອກອບກູ້ເອົາຊີວິດໃຫ້ກັບມາເປັນປົກກະຕິ. ໂອກາດດຽວນີ້ຍັງໄດ້ມີການວາງຂາຍອາຫານ ແລະ ເຄື່ອງຫັດຖະກຳ ຈາກບັນດາພະແນກການ, ອົງການ- ກົມກອງອ້ອມຂ້າງ ແລະ ເມືອງອະນຸວົງຕື່ມອີກ. ທັງນີ້ ກໍເພື່ອເຮັດໃຫ້ການສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວ ຄົບຮອບ 69 ປີ ໃນຄັ້ງນີ້ ເຕັມໄປດ້ວຍບັນຍາກາດຟົດຟື້ນ, ເບີກບານມ່ວນຊື່ນ ແລະ ມີຄວາມໝາຍ-ຄວາມສຳຄັນ ຢ່າງເລິກເຊິ່ງ.
