ພິທີປະຖະກະຖາວັນສ້າງຕັ້ງລັດຖະທຳມະນູນ ຄົບຮອບ 34 ປີ, ວັນສ້າງຕັ້ງສື່ມວນຊົນ ແລະ ການພິມຈໍາໜ່າຍ ຄົບຮອບ 75 ປີ ແລະ ເຜີຍແຜ່ເຊື່ອມຊຶມ ເອກະສານ ລັດຖະທຳມະນູນ ສະບັບປີ 2025 ຢູ່ແຂວງໄຊສົມບູນ.
ແຂວງໄຊສົມບູນ ໄດ້ຈັດພິທີປາຖະກະຖາວັນສ້າງຕັ້ງລັດຖະທຳມະນູນ ແຫ່ງສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 34 ປີ ( ວັນທີ 15 ສິງຫາ 1991-15 ສິງຫາ 2025, ວັນສ້າງຕັ້ງສື່ມວນຊົນ ແລະ ການພິມຈໍາໜ່າຍ ຄົບຮອບ 75 ປີ ( 13 ສິງຫາ 1950-13 ສິງຫາ 2025 ) ແລະ ເຊື່ອມຊຶມເອກະສານກ່ຽວກັບລັດຖະທໍາມະນູນ ສະບັບ ປີ 2025 ໃນຕອນເຊົ້າຂອງວັນທີ 13 ສິງຫາ ນີ້ ທີ່ຫ້ອງປະຊຸມຫ້ອງວ່າການແຂວງ, ໂດຍການເຂົ້າຮ່ວມຂອງທ່ານ ພອຍຄໍາ ຮຸ່ງບຸນຍວງ ເລຂາພັກແຂວງ, ເຈົ້າແຂວງໄຊສົມບູນ, ມີຮອງເລຂາພັກແຂວງ, ມີພະແນກການ, ອົງການ, ກົມກອງອ້ອມຂ້າງແຂວງ ພ້ອມດ້ວຍບັນດາສື່ມວນຊົນ ພາຍໃນແຂວງເຂົ້າຮ່ວມ.
ໂອກາດນີ້ ທ່ານ ພອຍຄໍາ ຮຸ່ງບຸນຍວງ ປາຖະກະຖາຫວນຄືນມູນເຊື້ອວັນສ້າງຕັ້ງລັດຖະທຳມະນູນ ຄົບຮອບ 34 ປີ ທ່ານໄດ້ເລົ່າຄືນປະຫວັດການກໍາເນີດ, ຄວາມໝາຍ ຄວາມສໍາຄັນຂອງວັນລັດຖະທໍາມະນູນແຫ່ງຊາດ ຊຶ່ງແມ່ນກົດໝາຍພື້ນຖານຂອງຊາດ, ກົດໝາຍແມ່ ຫຼື ນິຕິກຳສູງສຸດ ຂອງລັດເຮົາ, ລັດຖະທຳມະນູນ ຖືກຮັບຮອງ ແລະ ປະກາດໃຊ້ຢ່າງເປັນທາງການ ໃນວັນທີ 15 ສິງຫາ ປີ 1991 ເປັນເຄື່ອງມືພື້ນຖານໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ, ແນໃສ່ສ້າງຄວາມຮັບຮູ້, ເຂົ້າໃຈຖືກຕ້ອງ, ຍົກສະຕິເຄົາລົບ ແລະ ປະຕິບັດລັດຖະທຳມະນູນ ແລະ ກົດໝາຍ ໃນທົ່ວສັງຄົມໃຫ້ສູງຂຶ້ນ, ແນໃສ່ເຮັດໃຫ້ປະເທດຊາດມີສະຖຽນລະພາຍທາງດ້ານການເມືອງຢ່າງໝັ້ນທ່ຽງ, ສັງຄົມມີຄວາມສະຫງົບປອດໄພ ແລະ ເປັນລະບຽບຮຽບຮ້ອຍ ຮັບປະກັນໃຫ້ແກ່ການປົກປັກຮັກສາ ແລະ ສ້າງສາປະເທດຊາດ, ສ້າງລັດເຮົາໃຫ້ເປັນລັດທີ່ປົກຄອງດ້ວຍກົດໝາຍ, ປະຊາຊົນຮັ່ງມີຜາສຸກ, ປະເທດຊາດມັ່ງຄັ້ງເຂັ້ມແຂງ, ສັງຄົມສາມັກຄີປອງດອງ, ມີອະທິປະໄຕ, ຍຸຕິທໍາ ແລະ ສີວິໄລ,
ຈາກນັ້ນ ທ່ານ ແດງ ປະທຸມທອງ ຮອງເລຂາພັກແຂວງ ປະທານສະພາປະຊາຊົນແຂວງ ໄດ້ປະຖະກະຖາຫວນຄືນປະຫວັດ, ມູນເຊື້ອວັນສ້າງຕັ້ງສື່ມວນຊົນ ແລະ ການພິມຈຳໜ່າຍ ທ່ານໄດ້ຍົກໃຫ້ເຫັນເຖິງຂະບວນວິວັດແຫ່ງການເຕີບໃຫຍ່ຂະຫຍາຍຕົວຂອງ ໃນແຕ່ລະໄລຍະ ນັບແຕ່ອະດີດຈົນຮອດປັດຈຸບັນ, ເຊິ່ງຕະຫລອດໄລຍະ 75 ປີຜ່ານມາ, ວຽກງານສື່ມວນຊົນ ແລະ ການພິມຈຳໜ່າຍ ແມ່ນວຽກງານໜຶ່ງທີ່ສໍາຄັນ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ທີ່ເປັນກະບອກສຽງອັນແຫຼມຄົມ ໃນການເຜີຍແຜ່ແນວທາງນະໂຍບາຍຂອງພັກ-ລັດ, ໃນໄລຍະແຫ່ງການນຳພາຂະບວນການຕໍ່ສູ້ປົດປ່ອຍຊາດ ພັກປະຊາຊົນປະຕິວັດລາວ ຍາມໃດກໍ່ຖືເອົາວຽກງານໂຄສະນາ, ສຶກສາອົບຮົມ, ປຸກລະດົມຂົນຂວາຍມວນຊົນ ເຂົ້າຮ່ວມປະກອບສ່ວນປົດປ່ອຍປະເທດຊາດ ມາຮອດປັດຈຸບັນ ສື່ມວນຊົນ ໄດ້ເຕີບໃຫຍ່ຂະຫຍາຍຕົວຢ່າງຕໍ່ເນື່ອງ ທັງທາງດ້ານປະລິມານ ແລະ ຄຸນນະພາບ ແລະ ໄດ້ຮັບການພັດທະນາເປັນກ້າວໆມາ ເປັນເຈົ້າການໃນການໂຄສະນາຕອບໂຕ້, ຕີຖອຍທຳນອງບິດເບືອນ ໃສ່ຮ້າຍປ້າຍສີຂອງກຸ່ມຄົນທີ່ບໍ່ຫວັງດີ ແລະ ອິດທິກຳລັງປໍລະປັກຕໍ່ການນຳພາຂອງພັກ-ລັດ ກໍຄືໝາກຜົນໃນການປົກປັກຮັກສາ ແລະ ພັດທະນາປະເທດຊາດ ພວກເຮົາສາມາດເວົ້າໄດ້ວ່າ ສື່ມວນຊົນ ແລະ ການພິມຈຳໜ່າຍລາວ ມີຜົນງານທີ່ພົ້ນເດັ່ນຫຼາຍດ້ານ ໃນການຮັບໃຊ້ໜ້າທີ່ການເມືອງ, ຮັບປະກັນເປັນກະບອກສຽງຂອງພັກ-ລັດ ເປັນຢ່າງດີ ແລະ ຍັງສາມາດຮັກສາມູນເຊື້ອອັນດີງາມຂອງຕົນ ໃນການເປັນຜູ້ນຳສະເໜີ, ແນະນຳ, ນຳພາຫາງສຽງ, ເປັນຂົວຕໍ່ໃຫ້ພັກ ກັບປະຊາຊົນ, ເປັນເວທີໃຫ້ມະຫາຊົນໃນການສະແດງຄໍາຄິດເຫັນທີ່ສ້າງສັນ ແລະ ສ້າງຄວາມຮັບຮູ້, ເຂົ້າໃຈທີ່ຖືກຕ້ອງ, ສາມາດສົ່ງຂໍ້ມູນ-ຂ່າວສານ ແລະ ເຜີຍແຜ່ອອກສູ່ສັງຄົມ ໄດ້ຢ່າງວ່ອງໄວທັນການ ແລະ ກວ້າງຂວາງກວ່າເກົ່າ.
