ສານປະຊາຊົນ ແຂວງໄຊສົມບູນ ຈັດພິທີ ປາຖະກະຖາ ເລົ່າມູນເຊື້ອວັນສ້າງຕັ້ງສານປະຊາຊົນ ຄົບຮອບ 43 ປີ ຄື(ວັນທີ 15 ສິງຫາ 1982- 15 ສິງຫາ 2025) ຂຶ້ນໃນຕອນເຊົ້າຂອງວັນທີ 14 ສິງຫາ 2025 ນີ້ ທີ່ຫ້ອງປະຊຸມຂອງຕົນ ໂດຍການປາຖະກະຖາ ຂອງທ່ານ ຕົ່ງມົວ ຊົວໂກ້ ຮອງເຈົ້າແຂວງໄຊສົມບູນ, ມີ ທ່ານ ຄໍາໄພ ໄຊຍະສຸກ ຮັກສາການປະທານສານປະຊາຊົນແຂວງ ພ້ອມດ້ວຍ ຫົວໜ້າ, ຮອງຫົວໜ້າພະແນກການ, ອົງການ, ກົມກອງ ອ້ອມຂ້າງແຂວງ, ຕາງໜ້າຈາກອົງການປົກຄອງເມືອງອະນຸວົງ ຕະຫຼອດຮອດພະນັກງານລັດຖະກອນພາຍໃນສານປະຊາຊົນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ໂອກາດນີ້ ທ່ານ ຕົ່ງມົວ ຊົວໂກ້ ໄດ້ເລົ່າຄືນມູນເຊື້ອວັນສ້າງຕັ້ງສານປະຊາຊົນ ຊຶ່ງທ່ານໄດ້ໃຫ້ຮູ້ວ່າ: ວັນທີ 15 ສິງຫາ 1982 ຖືເປັນວັນສ້າງຕັ້ງສານປະຊາຊົນ ຊຶ່ງປີ 2025 ນີ້ໄດ້ໝູນວຽນມາຄົບຮອບ 43 ປີ ວັນທີ 15 ສິງຫາ 1982-15 ສິງຫາ 2025 ບົນເສັ້ນທາງແຫ່ງການກໍາເກີດ ແລະ ເຕີບໃຫຍ່ຂະຫຍາຍຕົວຂອງສານປະຊາຊົນ ແມ່ນໄດ້ຜ່ານຜ່າຄວາມຫຍຸ້ງຍາກສັບສົນ, ລະອິດລະອ້ຽວ ແລະ ສິ່ງທ້າທາຍຫຼາຍປະການໃນການຈັດຕັ້ງປະຕິບັດວຽກງານ ເພື່ອປະກອບສ່ວນເຂົ້າໃນການຄຸ້ມຄອງສັງຄົມ ດ້ວຍລະບຽບກົດໝາຍ ເຮັດໃຫ້ປະເທດຊາດມີສະຖຽນລະພາບທາງດ້ານການເມືອງ, ເສດຖະກິດມີການຂະຫຍາຍຕົວ, ສັງຄົມມີຄວາມສາມັກຄີປອງດອງ ແລະ ຍຸຕິທໍາ ພາຍຫຼັງປະເທດຊາດສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນໃນວັນທີ 2 ທັນວາ 1975 ພັກ-ລັດໄດ້ນໍາພາປະຊາຊົນລາວທັງຊາດປະຕິບັດສອງໜ້າທີຍຸດທະສາດ ຄື: ປົກປັກຮັກສາ ແລະ ສ້າງສາພັດທະນາປະເທດຊາດ ຈຶ່ງພາໃຫ້ມີການກໍາເນີດ ແລະ ເຕີບໃຫຍ່ຂະຫຍາຍຕົວ ຂອງສານປະຊາຊົນມາເຖິງທຸກວັນນີ້ ໂດຍລວມແລ້ວແມ່ນອີງໃສ່ສະພາບການຂະຫຍາຍຕົວທາງດ້ານເສດຖະກິດ-ສັງຄົມ ທີ່ຕ້ອງເພີ່ມທະວີການຄຸ້ມຄອງລັດ-ຄຸ້ມຄອງສັງຄົມ ດ້ວຍລະບຽບກົດໝາຍ ໃຫ້ມີຄວາມໜັກແໜ້ນເຂັ້ມແຂງ ຂຶ້ນເທື້ອລະກ້າວ ດັ່ງນັ້ນຄະນະຄົ້ນຄວ້າວຽກງານວິຊາສະເພາະກະຊວງຍຸຕິທໍາ ຈຶ່ງໄດ້ລາຍງານຕໍ່ສູນກາງພັກ ຈາກນັ້ນ ສະພາປະຊາຊົນສູງສຸດ ຊຸດທີ I ຈຶ່ງໄດ້ຕົກລົງສ້າງສານປະຊາຊົນຂຶ້ນຢ່າງເປັນຮູບປະທໍາ ໃນວັນທີ 15 ສິງຫາ 1982 ຊຶ່ງເອີ້ນວ່າສານສູງສຸດ ພ້ອມດຽວກັນນີ້ ກໍໄດ້ແຕ່ງຕັ້ງ ທ່ານ ອຸ່ນເນຶ້ອ ພິມມະສອນ ເປັນປະທານສານສູງສຸດ ພ້ອມທັງມອບໜ້າທີ່ ໃຫ້ເປັນຜູ້ຮ່າງໂຄງປະກອບການຈັດຕັ້ງ ແລະ ລະບຽບກົດໝາຍ ພາຍໃນສານສູງສຸດ ເພື່ອນໍາສະເໜີຕໍ່ສະພາປະຊາຊົນສູງສຸດ ພິຈາລະນາ ແລະ ໄດ້ມີມະຕິຕົກລົງ ປ່ຽນຊື່ ສານສູງສຸດ ມາເປັນສານປະຊາຊົນສູງສຸດ ຈົນເຖິງທຸກວັນນີ້
ໃນແຕ່ລະໄລຍະແຫ່ງການເຕີບໃຫຍ່ຂະຫຍາຍຕົວຂອງສານປະຊາຊົນ ແມ່ນສາມາດສະຫຼຸບສັງລວມ ອອກເປັນ 5 ໄລຍະຄື ໄລຍະແຫ່ງການກໍາເນີດສານປະຊາຊົນແຕ່ປີ (1975-1982), ໄລຍະແຫ່ງການສ້າງຕັ້ງສານປະຊາຊົນປີ (1982-1989), ໄລຍະແຫ່ງການກໍ່ສ້າງ ແລະ ພັດທະນາລະບົບສານປະຊາຊົນ (1989-2003), ໄລຍະແຫ່ງການປັບປຸງລະບົບສານປະຊາຊົນ ແລະ ພັດທະນາລະບົບສານປະຊາຊົນ (2003-2009) ແລະ ໄລຍະແຫ່ງການພັດທະນາສານລະບົບສານປະຊາຊົນ 2009 ເຖິງປັດຈຸບັນ. ນັບແຕ່ໄດ້ຮັບການສ້າງຕັ້ງຂຶ້ນ ກໍໄດ້ມີການປັບປຸງກໍ່ສ້າງນັບມື້ເຕີບໃຫຍ່, ເຂັ້ມແຂງ ຢ່າງບໍ່ຢຸດຢັ້ງ ແລະ ເຄື່ອນໄຫວຢ່າງຕັ້ງໜ້າ ໃນການພິຈາລະນາຕັດສິນຄະດີຕ່າງໆ ໃຫ້ມີຄວາມຖືກຕ້ອງ ແລະ ເປັນທໍາ ແນ່ໃສ່ປົກປັກຮັກສາມາກຜົນຂອງການປະຕິວັດ ໃນການປົກປ້ອງສິດຜົນປະໂຫຍດອັນຊອບທໍາຂອງລັດ ແລະ ຂອງປະຊາຊົນບັນດາເຜົ່າ ພ້ອມທັງສຶກສາອົບຮົມການເມືອງ-ແນວຄິດຂອງພະນັກງານສານປະຊາຊົນ ເພີ່ມທະວີຄວາມຮັບຜິດຊອບໃຫ້ຫຼາຍຂຶ້ນ, ມີຄວາມສາມັກຕີປອງດອງເປັນຈິດໜຶ່ງໃຈດຽວ ໂດຍຍົກສູງນໍ້າໃຈຮັກຊາດ ພ້ອມທັງປະຕິບັດແກ້ໄຂຂໍ້ຂັດແຍ່ງການລະເມີດລະບຽບກົດໝາຍ ແລະ ບັນຫາຕ່າງໆ ທີ່ເກີດຂຶ້ນ ໃຫ້ຫຼຸດນອຍຖອຍລົງເທື້ອລະກ້າວ ເຮັດໃຫ້ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ ແລະ ມີຜົນສໍາເລັດເປັນກ້າວໆມາ.