ພິທີມອບ-ໂອນ ວຽກງານສື່ມວນຊົນ ( ຖະແຫຼງຂ່າວ )ໄປຂຶກັບຄະນະໂຄສະນາອົບຮົມແຂວງ ໃນຕອນເຊົ້າຂອງວັນທີ 14 ສິງຫາ ນີ້ ທີ່ຫ້ອງປະຊຸມພະແນກຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ແຂວງ, ໂດຍການເປັນປະທານຂອງສະຫາຍ ທອງວັນ ທໍາມະວົງ ຄະນະປະຈໍາພັກແຂວງ, ຫົວໜ້າຄະນະຈັດຕັ້ງແຂວງ, ມີສະຫາຍ ເລັ່ງຊົ່ງ ຕົ່ງສີ ຄະນະປະຈຳພັກແຂວງ, ຄະນະຮັບຜິດຊອບເຮັດວຽກງານການເມືອງ-ແນວຄິດ, ມີຫົວໜ້າ-ຮອງຫົວໜ້າ ພ້ອມດ້ວຍ ພະນັກງານ-ລັດຖະກອນ ທັງສອງພາກສ່ວນ ເຂົ້າຮ່ວມ.
ໂອກາດນີ້ ສະຫາຍ ທົງສະຫວັນ ໂພສະລາດ ຫົວໜ້າພະແນກຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ແຂວງ ໄດ້ຜ່ານບົດບັນທຶກມອບ-ຮັບ ວຽກງານສື່ມວນຊົນ ລະຫວ່າງ ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ ກັບຄະນະໂຄສະນາອົບຮົມແຂວງ ສໍາລັບຂະແໜງການ ແລະ ກອງວິຊາການ ທີ່ມອບ-ໂອນ ປະກອບມີ: ຂະແໜງຖະແຫຼງຂ່າວ, ກອງວິຊາການວິທະຍຸ-ໂທລະພາບ ແລະ ສື່ສິ່ງພິມ ພ້ອມດ້ວຍ ພະນັກງານ-ລັດຖະກອນ, ພາຫະນະ ແລະ ວັດຖຸອຸປະກອນຮັບໃຊ້ວຽກງານວິຊາສະເພາະທັງໝົດ ໄປຂຶ້ນກັບຄະນະໂຄສະນາອົບຮົມ ແຂວງໄຊສົມບູນ.
ຈາກນັ້ນ, ກໍໄດ້ເຊັນບົດບັນທຶກການ ມອບ-ໂອນ ວຽກສື່ມວນຊົນ ( ຖະແຫຼງຂ່າວ ) ລະຫວ່າງ ສະຫາຍ ທົງສະຫວັນ ໂພສະລາດ ຫົວໜ້າພະແນກຖະແຫຼງຂ່າວ ວັດທະນະທໍາ ແລະ ທ່ອງທ່ຽວແຂວງ ແລະ ສະຫາຍ ນາງ ສຸກຊົ່ງ ຕົ່ງສື ຮອງຫົວໜ້າຄະນະໂຄສະນາອົບຮົມແຂວງ.
ຈາກນັ້ນ ສະຫາຍ ພອນໄຊ ພອນມະນີ ຮອງຫົວໜ້າຂະແໜງບໍລິຫານ ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງ ໄດ້ຜ່ານມະຕິຕົກລົງຂອງຄະນະປະຈໍາພັກແຂວງ ວ່າດ້ວຍການຍຸບເລີກໜ່ວຍພັກພະແນກຖະແຫຼງຂ່າວ, ວັດທະນາທໍາ ແລະ ທ່ອງທຽວ ແຂວງ ແລະ ສ້າງຕັ້ງໜ່ວຍພັກພະແນກວັດທະນາທຳ ແລະ ການທ່ອງທ່ຽວ ແຂວງໄຊສົມບູນໃໝ່ ຊຶ່ງໄດ້ບົ່ງຕົວແຕ່ງຕັ້ງຄະນະໜ່ວຍພັກຈໍານວນ 3 ສະຫາຍຄື: ສະຫາຍ ທົງສະຫວັນ ໂພສະລາດ ເປັນເລຂາໜ່ວຍພັກ, ສະຫາຍ ນາງ ເພັດນິຍົມ ພົມມະລິນ, ເປັນຮອງເລຂາ, ທັງເປັນຜູ້ກວດກາໝວຍພັກ, ສະຫາຍ ຊົ່ງໄຊຮົ່ວ ເປັນກຳມະການຄະນະໜ່ວຍພັກ ແລະ ມະຕິຕົກລົງ ວ່າດ້ວຍການແຕ່ງຕັ້ງ ສະຫາຍ ກິ່ງເພັດ ເພັດມະຈັນ ເປັນຮອງຫົວໜ້າຄະນະໂຄສະນາອົບຮົມ ແຂວງໄຊສົມບູນ.
ໃນໂອກາດນີ້ ສະຫາຍ ທອງວັນ ທໍາມະວົງ ໄດ້ມີຄໍາເຫັນໂອ້ລົມ ສະຫາຍ ໄດ້ເນັ້ນໝັກໃຫ້ຄະນະພັກ ທັງສອງພາກສ່ວນ ຈົ່ງເປັນຄັນທຸງແຫ່ງການ ນໍາພາ-ຊີ້ນໍາວຽກງານຮອບດ້ານ ພາຍຫຼັງທີ່ໂຮມເຂົ້າກັນແລ້ວ ໃຫ້ສືບຕໍ່ເປັນເຈົ້າການນໍາພາການເມືອງ-ແນວຄິດ ໃຫ້ແກ່ສະມາຊິກພັກ-ພະນັກງານ ໃຫ້ມີແນວອຸ່ນອ່ຽນ ທຸ່ນທ່ຽງ ເຊື່ອໝັ້ນຕໍ່ການນໍາພາຂອງພັກ-ລັດ, ເພີ່ມທະວີຄວາມສາມັກຄີໃຫ້ເປັນປຶກແຜ່ນແໜ້ນໜາ, ມີຄວາມເປັນເອກະພາບໃນຄະນະພັກ ແບ່ງວຽກງານ, ແບ່ງຄວາມຮັບຜິດຊອບຢ່າງລະອຽດຈະແຈ້ງ ຄຽງຄູ່ກັນນັ້ນໃຫ້ປັບປຸງພາລະບົດບາດ, ປັບປຸງກົງຈັກການຈັດຕັ້ງ ແລະ ເອົາໃຈໃສ່ສ້າງໜ່ວຍພັກໃຫ້ເປັນໜ່ວຍພັກປອດໃສ, ເຂັ້ມແຂງ ໜັກແໜ້ນ ພ້ອມທັງ ພັດທະນາບຸກຄະລາກອນໃຫ້ມີຄວາມຮູ້ ຄວາມສາມາດ ເພື່ອໃຫ້ການຈັດຕັ້ງປະຕິບັດວຽກງານວິຊາສະເພາະ ດີຂຶ້ນເລື່ອຍໆ ແລະ ມີຜົນສໍາເລັດ.