ແຂວງໄຊສົມບູນ ສະເຫຼີມສະຫຼອງປີທ່ອງທ່ຽວລາວ 2024 ພາຍໃຕ້ຄໍາຂວັນ “ທ່ອງທ່ຽວລາວປອດໄພ, ຊື່ນໃຈໃນວັດທະນະທຳ, ທຳມະຊາດ ແລະ ປະຫວັດສາດ” ໃນຕອນບ່າຍຂອງວັນທີ 30 ພະຈິກ ນີ້ ທີ່ສະໂມສອນເມືອງອະນຸວົງ ໂດຍການເຂົ້າຮ່ວມຂອງ ທ່ານ ພົນເອກ ຈັນສະໝອນ ຈັນຍາລາດ, ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ມີ ທ່ານ ພອຍຄໍາ ຮຸ່ງບຸນຍວງ, ເລຂາພັກແຂວງ, ເຈົ້າແຂວງໄຊສົມບູນ ພ້ອມດ້ວຍການນໍາພັກ-ລັດ ຈາກສູນກາງ, ການນໍາ ຈາກ 6 ແຂວງ ໃກ້ຄຽງ ຄື: ນະຄອນຫຼວງວຽງຈັນ, ບໍລິຄຳໄຊ, ຄຳມ່ວນ, ສະຫວັນນະເຂດ, ຊຽງຂວາງ, ຫຼວງພະບາງ ແລະ ແຂວງຫົວພັນ, ການນໍາແຂວງ ແລະ ບັນດາເມືອງ, ອະດີດການນໍາແຂວງ, ພະນັກງານບຳນານປະຕິວັດອາວຸໂສ ຕະຫຼອດຮອດແຂກຖືກເຊີນ ແລະ ມວນຊົນ ຊາວແຂວງໄຊສົມບູນ ເຂົ້າຮ່ວມ.
ໃນໂອກາດກ່າວປາໄສເປີດພິທີ ທ່ານ ພອຍຄຳ ຮຸ່ງບຸນຮວງ ໄດ້ກ່າວວ່າ: ແຂວງໄຊສົມບູນ ເປັນແຂວງໜຶ່ງທີ່ມີທີ່ຕັ້ງພູມສັນຖານເໝາະສົມ ຕັ້ງຢູ່ໃຈກາງຂອງປະເທດ, ມີທິວທັດທໍາມະຊາດທີ່ສວຍງາມ, ອາກາດເຢັນຕະຫຼອດປີ, ປະຊາຊົນມີມູນເຊື້ອວັດທະນະທໍາ, ຮີດຄອງປະເພນີອັນດີງາມ, ມີແຫຼ່ງທ່ອງທ່ຽວທາງທໍາມະຊາດ, ປະຫວັດສາດ ແລະ ວັດທະນະທໍາຫຼາຍແຫ່ງ ຊຶ່ງທົ່ວແຂວງ ມີແຫຼ່ງທ່ອງທ່ຽວ ທີ່ໄດ້ຂຶ້ນບັນຊີທັງໝົດ 75 ແຫ່ງ, ແຫຼ່ງທ່ອງທ່ຽວທໍາມະຊາດ 59 ແຫ່ງ, ແຫຼ່ງທ່ອງທ່ຽວປະຫວັດສາດ 10 ແຫ່ງ ແລະ ແຫຼ່ງທ່ອງທ່ຽວວັດທະນະທໍາ 6 ແຫ່ງ ຊຶ່ງເປັນເງື່ອນໄຂເອື້ອອໍານວຍ ໃຫ້ແກ່ການພັດທະນາເປັນແຂວງທ່ອງທ່ຽວ ຕິດພັນກັບການບໍລິການ ແລະ ເຊື່ອມຈອດເຊື່ອມໂຍງ ເພື່ອກໍານົດນະໂຍບາຍການພັດທະນາເສດຖະກິດ ຕາມ 5 ທ່າແຮງ ຂອງແຂວງ ຄື: ດ້ານກະສິກໍາ, ການທ່ອງທ່ຽວ, ພະລັງງານໄຟຟ້າ, ບໍ່ແຮ່ ແລະ ການບໍລິການເຊື່ອມຈອດ-ເຊື່ອມໂຍງ ໃນນີ້ ວຽກງານທ່ອງທ່ຽວ ເປັນຂະແໜງບຸລິມະສິດໜຶ່ງຂອງແຂວງ ທີ່ພັກ ແລະ ລັດຖະບານ ໄດ້ສ້າງເງື່ອນໄຂອໍານວຍຄວາມສະດວກ, ຂົນຂວາຍ ແລະ ຍາດແຍ່ງການລົງທຶນ ໃຫ້ແກ່ການພັດທະນາການທ່ອງທ່ຽວ ມາຮອດປັດຈຸບັນ ເຫັນວ່າວຽກງານການທ່ອງທ່ຽວ ມີທ່າອຽງເຕີບໃຫຍ່ຂະຫຍາຍຕົວດີຂຶ້ນເປັນກ້າວໆ ສາມາດດຶງດູດການລົງທຶນພາຍໃນ ແລະ ຕ່າງປະເທດ ເຂົ້າມາສຶກສາສໍາຫຼວດ ແລະ ພັດທະນາແຫຼ່ງທ່ອງທ່ຽວ ໄດ້ຈໍານວນ 9 ໂຄງການ ໃນນີ້ ໂຄງການພັດທະນາແຫຼ່ງທ່ອງທ່ຽວສະຫວັນທະເລໝອກພູເບ້ຍ ເປັນໂຄງການໃຫຍ່ທີ່ສໍາຄັນລະດັບປະເທດ ປັດຈຸບັນ ພວມດໍາເນີນການພັດທະນາ ພາຍຫຼັງສໍາເລັດຄາດຄະເນວ່າຈະສາມາດດຶງດູດ ນັກທ່ອງທ່ຽວ ທັງພາຍໃນ ແລະ ຕ່າງປະເທດ ເຂົ້າມາທ່ຽວຊົມເປັນຈໍານວນຫຼວງຫຼາຍ ນອກຈາກນີ້ ພື້ນຖານໂຄງລ່າງເພື່ອຮອງຮັບການທ່ອງທ່ຽວ ເຫັນວ່າ ໄດ້ຮັບການປັບປຸງ-ກໍ່ສ້າງ ນັບມື້ນັບຂະຫຍາຍຕົວເພີ່ມຂຶ້ນ ເປັນຕົ້ນໂຮງແຮມ, ເຮືອນພັກ, ຮ້ານອາຫານ, ຮ້ານກິນດື່ມ ແລະ ອື່ນໆ ມາຮອດປັດຈຸບັນຈໍານວນນັກທ່ອງທ່ຽວ ທີ່ເຂົ້າມາທ່ຽວ ກໍມີທ່າອຽງເພີ່ມຂຶ້ນເລື້ອຍໆ.
ການຈັດງານໃນຄັ້ງນີ້ ຈະກາຍເປັນບາດລ້ຽວສໍາຄັນ ໃນການຍົກລະດັບວຽກງານການໂຄສະນາ ແລະ ສົ່ງເສີມການທ່ອງທ່ຽວ ໃຫ້ກວ້າງຂວາງ ແລະ ສາມາດດຶງດູດນັກທ່ອງທ່ຽວພາຍໃນ ແລະ ຕ່າງປະເທດ ເຂົ້າມາທ່ອງທ່ຽວ ນັບມື້ຫຼາຍຂຶ້ນ ແລະ ຈະສາມາດກະຈາຍລາຍໄດ້ສູ່ທ້ອງຖິ່ນ, ສ້າງວຽກເຮັດງານທໍາໃຫ້ປະຊາຊົນບັນດາເຜົ່າ ພ້ອມທັງປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງແຂວງ ໄດ້ຢ່າງຕັ້ງໜ້າ ແລະ ຂໍຖືເອົາໂອກາດນີ້ ເປີດປະຕູຕ້ອນຮັບເອົານັກທ່ອງທ່ຽວພາຍໃນ ແລະ ຕ່າງປະເທດ ເຂົ້າມາທ່ອງທ່ຽວ ຢູ່ແຂວງໄຊສົມບູນ ດ້ວຍຄວາມອົບອຸ່ນ ແລະ ເປັນກັນເອງ ພາຍໃຕ້ຄໍາຂວັນ: “ໄຊສົມບູນ ທ່ອງທ່ຽວປອດໄພ, ຊື່ນໃຈໃນວັດທະນະທໍາ, ທໍາມະຊາດ ແລະ ປະຫວັດສາດ”.
ຫຼັງຈາກນັ້ນ ທ່ານ ພົນເອກ ຈັນສະໝອນ ຈັນຍາລາດ ພ້ອມດ້ວຍການນຳພັກ-ລັດ ຈາກສູນກາງ ແລະ ແຂວງໄຊສົມບູນ ກໍໄດ້ພ້ອມກັນຕັດແຖບຜ້າ, ລັ່ນຄ້ອງ 9 ບາດ ເພື່ອເປັນສິລິມຸງຄຸນ ພ້ອມທັງປ່ອຍປຸມເປົ້າ ແລະ ປ້າຍພິທີສະເຫຼີມສະຫຼອງປີທ່ອງທ່ຽວລາວ 2024 ຂຶ້ນສູ່ທ້ອງຟ້າ ຢ່າງເປັນທາງການ ຈາກນັ້ນ ກໍໄດ້ທ່ຽວຊົມງານວາງສະແດງສິນຄ້າ ແລະ ເທດສະການອາຫານ ຕື່ມອີກ.
