ແຂວງໄຊສົມບູນ ໂຮມຊຸມນຸມ ສະເຫລີມສະຫລອງ ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 70 ປີ ( 22 ມີນາ ປີ 1955-22 ມີນາ 2025 ) ໃນຕອນເຊົ້າຂອງວັນທີ 22 ມີນາ ນີ້ ຢູ່ທີ່ສະໂມສອນເມືອງອະນຸວົງ ໂດຍການເຂົ້າຮ່ວມຂອງສະຫາຍ ພອຍຄຳ ຮຸ່ງບຸນຍວງ ເລຂາພັກແຂວງ, ເຈົ້າແຂວງໄຊສົມບູນ, ມີການນຳພັກ-ລັດແຂວງ, ພະແນກການ, ອົງການ, ກົມກອງອ້ອມຂ້າງແຂວງ, ພະນັກງານ-ລັດຖະກອນ, ສອງບ້ານເທດສະບານ ພ້ອມດ້ວຍ ຊາວໜຸ່ມ, ເຍົາວະຊົນ ເຂົ້າຮ່ວມ ຢ່າງຫຼວງ ຫຼາຍ.
ໃນພິທີ ໄດ້ຮັບຊົມການຖ່າຍທອດສົດ ການປາໄສຂອງສະຫາຍ ທອງລຸນ ສີສຸລິດ , ເລຂາທິການໃຫ່ຍ ພັກປະຊາຊົນປະຕິວັດລາວ, ປະທານປະເທດ ຊຶ່ງສະຫາຍ ໄດ້ຍົກໃຫ້ເຫັນເຖິງມູນເຊື້ອແຫ່ງການເຕີບໃຫຍ່ຂະຫຍາຍຕົວ, ມູນເຊື້ອແຫ່ງການຕໍ່ສູ່ປົດປ່ອຍປະເທດຊາດ ຂອງນັກຮົບປະຕິວັດ, ມູນເຊື້ອແຫ່ງການນຳພາ-ຊີ້ນຳ ອັນສະຫລາດສ່ອງໃສ ຂອງພັກ ປະຊາຊົນ ປະຕິວັດລາວ ໃນໄລຍະຜ່ານມາ ຮອດປັດຈຸບັນ ຊຶ່ງກ່ອນໜ້ານີ້ 70 ປີ ຄື ວັນທີ 22 ມີນາ 1955 “ພັກປະຊາຊົນລາວ” ປັດຈຸບັນ ແມ່ນ “ພັກປະຊາຊົນປະຕິວັດລາວ” ໄດ້ຮັບການສ້າງຕັ້ງຂຶ້ນ ຢູ່ເຂດຖານທີ່ໝັ້ນປະຕິວັດແຂວງຫົວພັນ ໂດຍແມ່ນ ປະທານ ໄກສອນ ພົມວິຫານ ເປັນຜູ້ປະກາດສ້າງຕັ້ງ, ທັງເປັນຜູ້ນໍາພາສູງສຸດ ຂອງພັກ, ການກໍາເນີດຂອງພັກປະຊາຊົນລາວ ຊຶ່ງເປັນພັກການເມືອງ ຂອງຊົນຊັ້ນກຳມະກອນ ແລະ ຊາວຜູ້ອອກແຮງງານລາວ ເພື່ອຕອບສະໜອງຄວາມຮຽກຮ້ອງຕ້ອງການ ຂອງຂະບວນການຕໍ່ສູ້ຕ້ານກັບຈັກກະພັດຜູ້ຮຸກຮານ.
ຕະຫລອດໄລຍະ 70 ປີຜ່ານມາ ພາຍໃຕ້ການນຳພາ-ຊີ້ນໍາອັນປີຊາສາມາດສະຫຼາດສ່ອງໃສຂອງພັກປະຊາຊົນປະຕິວັັດລາວ ຊຶ່ງເຫັນໄດ້ວ່າປະເທດຊາດ ໄດ້ຮັບການພັດທະນາຢ່າງຮອບດ້ານ ພັກປະຊາຊົນປະຕິວັດລາວ ໄດ້ນຳພາການປະຕິວັດຊາດ-ປະຊາທິປະໄຕ, ຕໍ່ສູ້ຕ້ານຈັກກະພັດລ່າເມືອງຂຶ້ນ ແລະ ພວກລູກມື ນຳເອົາຄວາມເປັນເອກະລາດ, ອິດສະຫຼະພາບ, ສິດເປັນເຈົ້າຂອງປະເທດຊາດອັນແທ້ຈິງມາສູ່ປະເທດຊາດ ແລະ ປະຊາຊົນບັນດາເຜົ່າ, ສາມາດລຶບລ້າງລະບອບສັກດີນາ ແລະ ສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນຢ່າງສະຫງ່າຜ່າເຜີຍ ໃນວັນທີ 2 ທັນວາ 1975. ນັບແຕ່ນັ້ນມາ ປະຊາຊົນລາວບັນດາເຜົ່າ ໄດ້ກາຍເປັນເຈົ້າຂອງທີ່ແທ້ຈິງ ຂອງປະເທດຊາດ ທີ່ມີເອກະລາດ, ອໍານາດອະທິປະໄຕ ແລະ ຜືນແຜ່ນດິນອັນຄົບຖ້ວນ, ພັກເຮົາໄດ້ກາຍເປັນພັກກໍາອໍານາດ, ເປັນແກນນໍາໃນລະບົບການເມືອງ ແລະ ນໍາພາທົ່ວສັງຄົມ ປະຕິບັດ 2 ໜ້າທີ່ຍຸດທະສາດ ຄື: ປົກປັກຮັກສາ ແລະ ສ້າງສາພັດທະນາປະເທດຊາດ ທີ່ມີຜົນສຳເລັດເປັນກ້າວໆ ຍາມໃດກໍຈົງຮັກພັກດີຢ່າງສຸດຊຶ້ງ ຕໍ່ຜົນປະໂຫຍດຂອງຊາດ ແລະ ຂອງປະຊາຊົນ, ສະໜິດຕິດພັນກັບມະຫາຊົນ, ເອົາມະຫາຊົນເປັນກຳລັງແຮງ, ມີຄວາມສາມັກຄີ, ເອກະພາບເປັນປຶກແຜ່ນແໜ້ນໜາ, ເຊີດຊູຄວາມເປັນເອກະລາດ, ເປັນເຈົ້າຕົນເອງ, ມີຄວາມຄິດປະດິດສ້າງ ໃນການວາງແນວທາງ, ແຜນນະໂຍບາຍ ແລະ ນໍາພາ-ຊີ້ນຳ ພາລະກິດປະຕິວັດ ຢ່າງຕໍ່ເນື່ອງຕະຫລອດມາ ເຮັດໃຫ້ປະເທດຊາດມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມເປັນລະບຽບຮຽບຮ້ອຍໂດຍພື້ນຖານ, ເສດຖະກິດຂະຫຍາຍຕົວຢ່າງຕໍ່ເນື່ອງ ແລະ ຖືກທິດ ດ້ວຍການຍູ້ແຮງການຫັນເປັນອຸດສາຫະກຳ ແລະ ທັນສະໄໝ ເຮັດໃຫ້ຊີວິດການເປັນຢູ່ ຂອງປະຊາຊົນ ໄດ້ຮັບການປັບປຸງ ຍົກລະດັບດີຂຶ້ນ, ການພົວພັນຮ່ວມມືກັບວົງຄະນາຍາດສາກົນ ໄດ້ຮັບການເປີດກວ້າງອອກ ແລະ ໄດ້ຮັບການເຊີດຊູສູງເດັ່ນຂຶ້ນໃນເວທີພາກພື້ນ ແລະ ສາກົນ.
ຫຼັງຈາກນັ້ນ ສະຫາຍ ພອຍຄຳ ຮຸ່ງບຸນຍວງ ກໍໄດ້ເລົ່າຄືນມູນເຊື້ອ ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 70 ປີ ແລະ ການນໍາພາ-ຊີ້ນໍາ ຂອງອົງຄະນະພັກ ແຂວງໄຊສົມບູນ ຕະຫຼອດໄລຍະ 11 ກວ່າປີ ຜ່ານມາ ພ້ອມທັງເຜີຍແຜ່ມະຕິກອງປະຊຸມຄົບຄະນະບໍລິຫານງານສູນກາງພັກ ສະໄໝວິສາມັນ ຕື່ມອີກ.
