ແຂວງໄຊສົມບູນ ໄດ້ຈັດພິທີສູດປະລິຕະມຸງຄຸນ ແລະ ສົມໂພດຫໍຫຼັກເມືອງ ປີທີ 3 ໃນລະຫວ່າງ ວັນທີ 2 ຫາ 3 ທັນວາ 2024 ນີ້ ຢູ່ທີ່ຫໍຫຼັກເມືອງ ໂດຍຝ່າຍຄະນະສົງ ມີ ພຣະອາຈານໃຫຍ່ ຄໍາໝັ້ນ ສີສະຫວັດ, ກໍາມະການສູນກາງອົງການພຸດທະສາສະໜາສຳພັນລາວ (ອພສ) ແລະ ຄະນະສົງ ຈາກສູນກາງອົງການພຸດທະສາສະໜາສຳພັນລາວ (ອພສ) ພ້ອມດ້ວຍຄະນະສົງ ພາຍໃນອົງການພຸດທະສາສະໜາສຳພັນລາວ (ອພສ) ແຂວງໄຊສົມບູນ ແລະ ຝ່າຍຄະລາວາດ ມີ ທ່ານ ພອຍຄຳ ຮຸ່ງບຸນຍວງ, ເຈົ້າແຂວງໄຊສົມບູນ ພ້ອມດ້ວຍການນຳແຂວງ, ຄອບຄົວການນຳ, ບັນດາບໍລິສັດ ຕະຫຼອດຮອດອອກຕົນຍາດໂຍມ ຊາວແຂວງໄຊສົມບູນ ເຂົ້າຮ່ວມ ຢ່າງຫຼວງຫຼາຍ.
ຊຶ່ງໃນຕອນເຊົ້າຂອງວັນທີ 2 ທັນວາ ໄດ້ມີພິທີບວງສວງ ແລະ ບູຊາຫໍຫຼັກເມືອງ ເພື່ອເປັນສິລິມຸງຄຸນ ໃຫ້ແກ່ການສະເຫຼີມສະຫຼອງງານຫໍຫຼັກເມືອງປີທີ 3 ເພາະວ່າຫໍຫຼັກເມືອງ ເປັນສະຖານທີ່ສັກສິດ ແລະ ສັກກາລະບູຊາ ຂອງປວງຊົນລາວ ເວົ້າສະເພາະ ກໍຄືຊາວແຂວງໄຊສົມບູນ ຈາກນັ້ນ ທ່ານ ພອຍຄຳ ຮຸ່ງບຸນຍວງ ໄດ້ໄຕ້ທູບທຽນບູຊາພຣະລັດຕະນະໄຕຣ ແລະ ຄະນະນໍາແຂວງ ໄດ້ໄຕ້ທຽນສີ່ທິດ ເພື່ອເປັນສິລິມຸງຄຸນ ແລະ ເສີມປາລະມີ ໃຫ້ແກ່ຄະນະນໍາພັກ-ລັດຂອງແຂວງ ແລະ ພໍ່ແມ່ປະຊາຊົນ ຊາວແຂວງໄຊສົມບູນ ຫຼັງຈາກນັ້ນ ໃນຕອນແລງຂອງວັນດຽວກັນ ໄດ້ມີພິທີສູດປະລິຕະມຸງຄຸນ ແລະ ສົມໂພດຫໍຫຼັກເມືອງ ຊຶ່ງທ່ານເຈົ້າແຂວງ ໄດ້ໄຕ້ທູບທຽນບູຊາພຣະລັດຕະນະໄຕຣ ແລະ ລັ່ນຄອງ 3 ບາດ
ພ້ອມນັ້ນ ຄະນະນໍາ ໄດ້ໄຕ້ທຽນໄຊຢູ່ເທິງຫໍຫຼັກເມືອງ ຈາກນັ້ນ ກໍໄດ້ໄຫວ້ພຣະຮັບສິນ, ຟັງສູດປະຣິຕະມຸງຄຸນ, ສູດຊາຕາເສີມປາລະມີ, ຟັງທັມມະເທສະໜາປັນຍາປາລະມີ 1 ກັນ, ຖວາຍປັດໄຈໃຫ້ແກ່ພຣະສົງ, ຄາລະວະຮັບພອນ ແລະ ຢາດນໍ້າ. ການສະເຫຼີມສະຫຼອງຫໍຫຼັກເມືອງ ປີທີ 3 ນີ້ ກໍເພື່ອເປັນສິລິມຸງຄຸນ ແລະ ເສີມປາລະມີ, ເປັນສູນລວມທາງດ້ານຈິດໃຈຂອງປະຊາຊົນ ຊາວແຂວງໄຊສົມບູນ ເປັນມູນເຊື້ອວັດທະນະທໍາ, ຮີດຄອງປະເພນີອັນດີງາມຂອງຊາດ, ຂອງເຜົ່າ ທັງເປັນສັນຍາລັກແຫ່ງການພັດທະນາ, ເປັນບ່ອນເຕົ້າໂຮມຄວາມສາມັກຄີ ແລະ ເປັນສະຖານທີ່ສັກສິດປະຈໍາແຂວງ ເປັນບ່ອນກາບໄຫວ້ບູຊາ ຂອງແຂກຄົນ ທີ່ເດີນທາງເຂົ້າມາທ່ຽວຊົມ ແຂວງໄຊສົມບູນ ແລະ ຍັງເປັນສະຖານທີ່ທ່ອງທ່ຽວ ທາງດ້ານວັດທະນະທໍາຂອງແຂວງນໍາອີກ.
ຈາກນັ້ນ ໃນຕອນເຊົ້າຂອງ ວັນທີ 3 ທັນວາ ນີ້ ( ກົງກັບມື້ຂຶ້ນ 3 ຄໍ່າ ເດືອນ 1 ລາວ ປີມະໂຣງ ພສ 2567 ) ໄດ້ມີພິທີ ໃສ່ບາດຖວາຍສັງຄະທານໃຫ້ແກ່ພຣະສົງ ຈຳນວນ 33 ອົງ ຊຶ່ງການໃສ່ບາດຖວາຍສັງຄະທານໃຫ້ແກ່ພະສົງ ຄັ້ງນີ້ ກໍແມ່ນຮີດຄອງປະເພນີ ທີ່ດີງາມຂອງຄົນລາວ ທີ່ເຄີຍປະຕິບັດມາແຕ່ດຶກດຳບັນ ກໍເພື່ອອຸທິດບຸນກຸສົນໃຫ້ແກ່ບັນພະບຸລຸດ ທີ່ໄດ້ອຸທິດຕົນໃນ ພາລະກິດຕໍ່ສູ້ກູ້ຊາດ ທັງເປັນການສ້າງບຸນກຸສົນ ແລະ ແຜ່ສ່ວນກຸສົນ ໃຫ້ກັບຍາດຕິພີ່ນ້ອງຜູ້ທີ່ລ່ວງລັບໄປແລ້ວ ໃຫ້ຮັບຮູ້ ແລະ ມາຕ້ອນຮັບຈັບໂຈມເອົາ ພ້ອມນີ້ ກໍເພື່ອເປັນການປົກປັກຮັກສາ ແລະ ເສີມຂະຫຍາຍຮີດຄອງປະເພນີ ທີ່ເຄີຍສືບທອດກັນມາແຕ່ບູຮານນະການ ທັງເປັນການເຕົ້າໂຮມຄວາມສາມັກຄີ ໃຫ້ເປັນປຶກແຜ່ນ ຮັກສາໄດ້ວັດທະນະທຳ-ຮີດຄອງປະເພນີອັນດີງາມ ຂອງຊາດລາວເຮົາ ທີ່ເຄີຍສືບທອດກັນມາ ໃຫ້ຢູ່ຄຽງຄູ່ກັບຊາວລາວທີ່ເກີດໃໝ່ໃຫຍ່ລຸນ ໄດ້ສືບທອດ ແລະ ເສີມຂະຫາຍມູນເຊື້ອດັ່ງກ່າວ ໃຫ້ມີຄວາມຍືນຍົງຕະຫຼອດໄປ ທັງສະແດງໃຫ້ເຫັນເຖິງເອກະລັກ-ຮີດຄອງປະເພນີ ມູນເຊື້ອວັດທະນະທຳອັນດີງາມຂອງຊາດລາວ ເພາະວ່າ ຫໍຫຼັກເມືອງ ເປັນສູນລວມທາງດ້ານຈິດໃຈ ເປັນສະຖານທີ່ທ່ອງທ່ຽວ ທາງດ້ານວັດທະນະທຳ ແລະ ຈະກາຍເປັນປູຊະນີຍະສະຖານ ເປັນມິ່ງຂວັນຢູ່ຄູ່ກັບ ຊາວແຂວງໄຊສົມບູນ ຊົ່ວກາລະນານ.
