ກອງປະຊຸມປຶກສາຫາລືການກະກຽມຄວາມພ້ອມຮອບດ້ານ ຂອງອະນຸກຳມະການຮັບຜິດຊອບຂະບວນການ, ໂຄສະນາຂ່າວສານ ແລະ ປະຊາສຳພັນ ເພື່ອກ່ຽວກັບການກະກຽມສະເຫຼີມສະຫຼອງ 3 ວັນປະຫວັດສາດ ຂອງຊາດລາວເຮົາ ຢູ່ແຂວງ ໄຊສົມບູນ ໄດ້ຈັດຂຶ້ນໃນວັນທີ 17 ກຸມພາ ນີ້ ທີ່ຫ້ອງປະຊຸມພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງ ໂດຍການເປັນປະທານຂອງທ່ານ ທົງສະຫວັນ ໂພສະລາດ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງ, ຫົວໜ້າອະນຸກຳມະການຮັບຜິດຊອບຂະບວນການ, ໂຄສະນາ ຂ່າວສານ ແລະ ປະຊາສຳພັນ, ມີບັນດາຄະນະອະນຸກຳມະການ ເຂົ້າຮ່ວມ.
ໂອກາດນີ້ ທ່ານ ທົງສະຫວັນ ໂພສະລາດ ໄດ້ມີຄຳເຫັນຊີ້ນຳຕໍ່ກອງປະຊຸມ ໂດຍສະເພາະແມ່ນບັນດາໜ້າວຽກຕ່າງໆ ຊຶ່ງທ່ານໄດ້ຮຽກຮ້ອງໃຫ້ຜູ້ເຂົ້າຮ່ວມມ ຈົ່ງພ້ອມກັນເອົາໃຈໃສ່ປຶກສາຫາລື, ຄົ້ນຄວ້າປະກອບຄຳຄິດ ຄຳເຫັນ ເພື່ອກະກຽມຄວາມພ້ອມຮອບດ້ານ ໂດຍໄດ້ປຶກສາຫາລືແບ່ງວຽກ ແລະ ຄວາມຮັບຜິດຊອບພາຍໃນຄະນະໃຫ້ລະອຽດຈະແຈ້ງ ທັງນີ້ ເພື່ອໃຫ້ການສະເຫຼີມສະຫຼອງ 3 ວັນປະຫວັດສາດ ຂອງຊາດລາວເຮົາ ຄື: (ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 70 ປີ, ວັນສາຖາປະນາ ສປປ ລາວ ຄົບຮອບ 50 ປີ ແລະ ວັນເກີດປະທານ ໄກສອນ ພົມວິຫານ ຄົບຮອບ 105 ປີ ທີ່ຈະມາເຖິງໃນຕໍ່ໜ້ານີ້້ ໃຫ້ດຳເນີນໄປດ້ວຍດີ, ມີຜົນສຳເລັດ ໄປຕາມແຜນການທີ່ວາງໄວ້.
ຈາກນັ້ນ ບັນດາຜູ້ເຂົ້າຮ່ວມ ໄດ້ພ້ອມກັນປະກອບຄຳ ຄິດຄຳເຫັນ ແລະ ລາຍງານບັນດາໜ້າວຽກທີ່ຕົນເອງຮັບຜິດຊອບ ໂດຍຍົກໃຫ້ເຫັນບັນດາຂໍ້ສະດ ວກ, ຂໍ້ຫຍຸ້ງຍາກ ເພື່ອພ້ອມກັນຊອກຫາວິທີທາງແກ້ໄຂ ມາຮອດປັດ ຈຸບັນເຫັນວ່າແຕ່ລະພາກສ່ວນແມ່ນໄດ້ເອົາໃຈໃສ່ໃນການກະກຽມບັນດາໜ້າວຽກຕ່າງໆ ຕາມທີ່ໄດ້ຮັບມອບໝາຍ ດ້ວຍຄວາມຮັບຜິດຊອບສູງ ເປັນຕົ້ນ: ໄດ້ກະກຽມປ້າຍຄຳຂວັນ, ສ້າງສາລະຄະດີກ່ຽວກັບການສ້າງສາ ແລະ ພັດທະນາ ແຂວງໄຊສົມບູນ ພາຍໃຕ້ການນຳພາ ຂອງອົງຄະນະພັກແຂວງ ໃນໄລຍະ 10 ກວ່າປີ, ການປະຊາສຳພັນ, ກະກຽມຮູບພາບການເຄື່ອນໄຫວຂອງຄະນະບໍລິຫານງານພັກແຂວງແຕ່ລະຊຸດ ເພື່ອຕິດກະດານຂ່າວ ພ້ອມທັງກະກຽມແຜນປະດັບປະດາຕົວເມືອງ, ປັກທຸງຊາດ, ທຸງພັກ, ທຸງທິວ ຢູ່ບັນດາເສັ້ນທາງ ແລະ ຈຸດສຳຄັນຕ່າງໆ ລວມທັງຂະບວນການແຂ່ງຂັນສິນລະປະ-ວັນນະຄະດີ, ການແຂ່ງຂັນກິລາປະເພດຕ່າງໆ ແລະ ການອອກແຮງງານອະນາໄມ ໃຫ້ເປັນຂະບວນການຟົດຟື້ນ ແລະ ມີຄວາມໝາຍ ຄວາມສຳຄັນ.
