ທ່ານ ວັນໄຊ ຊົ່ງຊາຢູ ຮອງປະທານ ຄະນະກວດກາສູນກາງພັກ ໄດ້ເຂົ້າພົບປະ ແລະຢ້ຽມຢາມການນຳ ແຂວງໄຊສົມບູນ ໃນຕອນບ່າຍຂອງວັນທີ່ 23 ກໍລະກົດ 2024 ນີ້ ຢູ່ທີ່ຫ້ອງຮັບຮອງຫ້ອງວ່າການ ແຂວງໄຊສົມບູນ ໂດຍການຕ້ອນຮັບຂອງທ່ານ ພອຍຄໍາ ຮຸ່ງບຸນຍ່ວງ ເຈົ້າແຂວງໄຊສົມບູນ ພ້ອມດ້ວຍພາກສ່ວນທີ່ກ່ຽວຂ້ອງ ເຂົ້າຮ່ວມ.
ຊຶ່ງຈຸດປະສົງການເຂົ້າພົບປະໃນຄັ້ງນີ້ ເພື່ອສ້າງຄວາມຮັບຮູ້, ຄວາມເຂົ້າໃຈທີ່ຖືກຕ້ອງຕໍ່ກັບວຽກງານຕິດຕາມ, ກວດກາຂອງພັກ ຕາມທັດສະນະຂອງພັກ ທີ່ວ່າ: ວຽກງານຕິດຕາມ, ກວດກາພັກ ແມ່ນໜຶ່ງໃນພາລະບົດບາດການນໍາພາຂອງພັກ ຂອງຄະນະພັກແຕ່ລະຂັ້ນ ທັງເປັນການປັບປຸງພາຍໃນພັກ ໃຫ້ມີຄວາມເປັນເອກະພາບທາງດ້ານການເມືອງ-ແນວຄິດ, ການຈັດຕັ້ງ, ແບບແຜນວິທີນຳພາ-ວິທີເຮັດວຽກຕາມຫຼັກການຂອງພັກ ບົນພື້ນຖານກົດລະບຽບຂອງພັກ ແລະ ກົດໝາຍຂອງລັດ ຄຽງຄູ່ກັບການຊອກໃຫ້ເຫັນດ້ານດີ ເພື່ອສົ່ງເສີມ, ດ້ານອ່ອນ-ຂໍ້ຄົງຄ້າງ ເພື່ອຈຳກັດ ແລະ ແກ້ໄຂໃຫ້ທັນການ, ບໍ່ໃຫ້ມີປະກົດການ ຫຍໍ້ທໍ້ຕ່າງໆເກີດຂຶ້ນໃນການຈັດຕັ້ງພັກ ກໍ່ຄືຖັນແຖວສະມາຊິກພັກ-ພະນັກງານ, ທັງເປັນການປ້ອງກັນພັກ-ພະນັກງານ, ສ້າງໃຫ້ພັກມີຄວາມປອດໃສ, ເຂັ້ມແຂງ, ໜັກແໜ້ນ ພ້ອມດຽວກັນນີ້ ກໍເພື່ອກະກຽມຂໍ້ມູນ ກ່ຽວກັບການນໍາພາລວມ ກໍ່ຄືບຸກຄົນຄະນະບໍລິຫານງານພັກແຂວງ ໃຫ້ແກ່ການດໍາເນີນຊີວິດ ການເມືອງທ້າຍສະໄໝ ແລະ ກະກຽມຄົ້ນຄວ້າ, ເລືອກເຟັ້ນບຸກຄະລາກອນໃຫ້ແກ່ກອງປະຊຸມໃຫຍ່ 03 ຂັ້ນຂອງພັກ. ໂອກາດນີ້ ທ່ານ ພອຍຄໍາ ຮຸ່ງບຸນຍວງ ໄດ້ກ່າວຕ້ອນຮັບ ແລະ ລາຍງານສະພາບລວມໂດຍຫຍໍ້ໃນການຈັດຕັ້ງປະຕິບັດວຽກງານຕ່າງໆ ຂອງແຂວງໄຊສົມບູນ ໃຫ້ທ່ານ ຮອງປະທານຄະນະກວດກາສູນກາງພັກ ພ້ອມດ້ວຍຄະນະ ໄດ້ຮັບຊາບ ຕື່ມອີກ.
