ໃນຕອນເຊົ້າຂອງວັນທີ 14 ສິງຫາ 2025 ນີ້ ຫ້ອງການສຶກສາທິການ ແລະ ກິລາ ເມືອງຮົ່ມ ແຂວງໄຊສົມບູນ ໄດ້ຈັດກອງປະຊຸມຜູ້ບໍລິຫານການສຶກສາທົ່ວເມືອງ ປະຈຳສົກຮຽນ 2024-2025, ຢູ່ທີ່ສະໂມສອນຂອງເມືອງ, ໂດຍການເປັນປະທານຂອງທ່ານ ບູນເຕັງ ລັດຕະນະໄຕ ຄະນະປະຈຳພັກເມືອງ ຜູ້ຊິ້ນຳວຽກງານວັດທະນະທຳ-ສັງຄົມເມືອງ ແລະ ເຂົ້າຮ່ວມເປັນຄະນະປະທານຂອງທ່ານ ສຸລັງ ພົມມະຈັນ ຮອງຫົວໜ້າພະແນກສຶກສາທິການ ແລະ ກິລາແຂວງ, ມີບັນດາອຳນວຍການໂຮງຮຽນອະນຸບານ, ປະຖົມ, ມຸນລະປະຖົມ, ມັດທະຍົມຕົ້ນ, ມັດຖະຍົມປາຍ, ພະນັກງານຫ້ອງການສຶກສາທິການ ແລະ ກິລາເມືອງ ແລະ ນາຍບ້ານ 3 ບ້ານເທດສະບານ ເຂົ້າຮ່ວມ.
ໃນປະຊຸມ ທ່ານ ວຽງຄຳເຮີ່ ຈະເລີນເຍ່ຍປາວ ວ່າການຫົວໜ້າຫ້ອງການສຶກສາທິການ ແລະ ກິລາ ເມືອງ ໄດ້ກ່າວເປີດກອງປະຊຸມຢ່າງເປັນທາງການ ພ້ອມນັ້ນ ຍັງໄດ້ຮັບຟັງການລາຍງານຜົນສຳເລັດຂອງການຈັດຕັ້ງປະຕິບັດແຜນພັດທະນາການສຶກສາ-ກິລາ ປະຈຳສົກຮຽນ 2024-2025 ແລະ ທິດທາງແຜນພັດທະນາການສຶກສາ-ກິລາ ປະຈຳສົກຮຽນ 2025-2026 ຈາກທ່ານ ວຽງໄຊ ເຕັ້ງເຮີ່ຊົວເຢີ ຫົວໜ້າໜ່ວຍງານບໍລິຫານ ຫ້ອງການສຶກສາທິການ ແລະ ກິລາເມືອງ ເຊິ່ງໃນໄລຍະ 1 ປີ ຜ່ານມາ ບັນດາໂຮງຮຽນໃນທົ່ວເມືອງ ໄດ້ເອົາໃຈໃສ່ເປັນເຈົ້າການສຸມສະຕິປັນຍາ, ຄວາມຮູ້ຄວາມສາມາດ ເຂົ້າໃນໜ້າທີ່ວຽກງານວິຊາສະເພາະ ດ້ວຍຄວາມຮັບຜິດຊອບສູງ ເຮັດໃຫ້ວຽກງານມີຄວາມຄືບໜ້າຫຼາຍດ້ານເປັນຕົ້ນ: ອັດຕາເຂົ້າຮຽນລວມຂອງເດັກອາຍຸ 3-5 ປີ ແມ່ນ 88,2%, ອັດຕາເຂົ້າຮຽນຂອງເດັກຊັ້ນປະຖົມສຶກສາແມ່ນ 83,8%, ອັດຕາເລື່ອນຂັ້ນປະຖົມແມ່ນ 89,1%, ອັດຕາປະລະການຮຽນຊັ້ນປະຖົມແມ່ນ 7,7%, ອັດຕາຄ້າງຫ້ອງຊັ້ນປະຖົມແມ່ນ 3,2%, ອັດຕາເຂົ້າຮຽນຊັ້ນມັດຖະຍົມຕົ້ນແມ່ນ 52,3%, ອັດຕາເລື່ອນຊັ້ນ-ຈົບຊັ້ນມັດທະຍົມຕົ້ນແມ່ນ 88,6%, ອັດຕາຄ້າງຫ້ອງຂອງຊັ້ນມັດທະຍົມຕົ້ນແມ່ນ 2,5%, ອັດຕາປະລະການຮຽນຊັ້ນມັດທະຍົມຕົ້ນແມ່ນ 9%, ອັດຕາການເຂົ້າຮຽນຊັ້ນມັດທະຍົມປາຍແມ່ນ 23,2%, ອັດຕາເລື່ອນຊັ້ນ-ຈົບຊັ້ນມັດທະຍົມປາຍແມ່ນ 67,5%, ອັດຕາຄ້າງຫ້ອງຊັ້ນມັດທະຍົມປາຍແມ່ນ 1,6%, ອັດຕາປະລະການຮຽນຊັ້ນມັດທະຍົມປາຍແມ່ນ 30,9%, ກຸ່ມເປົ້າໝາຍຂອງປະຊາຊົນອາຍຸ 15-35 ປີ ທີ່ຍັງບໍ່ທັນຈົບມັດທະຍົມ ໄປຝຶກອົມຮົມວິຊາອາຊີບຂັ້ນພື້ນຖານຈຳນວນ 37 ຄົນ, ຍິງ 36 ຄົນ, ສໍາເລັດການຝຶກອົບຮົມຄູການຝຶກເວົ້າພາສາລາວຊັ້ນປະຖົມ ປ1 ທົ່ວເມືອງ, ສຳເລັດການນຳສົ່ງອຳນວຍການໂຮງຮຽນ ແລະ ຄູສອນເຂົ້າຮ່ວມຝຶກອົບຮົມການສ້າງຂີດໝາຍຄວາມສາມາດໃນການຈັດການຮຽນ-ການສອນ ແລະ ການບໍລິຫານທີ່ ສປ ຈີນ, ຜູ້ອຳນວຍການໂຮງຮຽນປະຖົມ, ມັດຖະຍົມຕົ້ນ ເຂົ້າຮ່ວມສ້າງຂີດໝາຍຄວາມສາມາດໃນການຈັດການຮຽນ-ການສອນ ແລະ ການບໍລິຫານທີ່ນະຄອນຫຼວງວຽງຈັນໄດ້ 3 ຊຸດ, ຈັດສົ່ງຄູຝີຊິກສາດ ເຂົ້າຮ່ວມຝຶກອົບຮົມໄລຍະສັ້ນ 3 ເດືອນ ທີ່ ສສ ຫວຽດນາມ,
ຫຼັງຈາກນັ້ນ ຜູ້ແທນກອງປະຊຸມໄດ້ຜັດປ່ຽນກັນຂຶ້ນປະກອບຄຳຄິດຄຳເຫັນໃສ່ບົດດັ່ງກ່າວຢ່າງກົງໄປກົງມາ ເພື່ອຊອກໃຫ້ເຫັນບັນຫາຈຸດອ່ອນ, ຂໍ້ຄົງຄ້າງທີ່ຈະນຳໄປແກ້ໄຂໃຫ້ໄດ້ຮັບຜົນດີໃນຕໍ່ໜ້າ ແລະ ບັນດາທ່ານອຳນວຍການໂຮງຮຽນແຕ່ລະແຫ່ງ ໄດ້ລາຍງານສະພາບການຈັດຕັ້ງປະຕິດບັດໜ້າທີ່ວຽກງານຂອງຕົນໃນໄລຍະ 1 ປີຜ່ານມາກ່ຽວກັບຂໍ້ສະດວກ, ຂໍ້ຍຸງຍາກ, ບົດຮຽນຖອດຖອນໄດ້ ແລະ ວິທີແກ້ໄຂໃນຕໍ່ໜ້າ ເພື່ອຫາທິດຊິ້ນຳທີ່ຈະນຳໄປປັບປຸງແກ້ໄຂໃນຕໍ່ໜ້າໃຫ້ໄດ້ຮັບປະສິດທິພົນດີຂຶ້ນກວ່າເກົ່າ.