ພິທີ ປະກາດການແຕ່ງຕັ້ງ ແລະ ຍົກຍ້າຍຫົວໜ້າ ແລະ ຮອງຫົວໜ້າ ກອງບັນຊາການປ້ອງກັນຄວາມສະຫງົບ ແຂວງໄຊສົມບູນໄດ້ຈັດຂຶ້ນໃນຕອນບ່າຍ ຂອງວັນທີ 12 ທັນວາ 2024 ນີ້ ທີ່ຫ້ອງປະຊຸມຫ້ອງວ່າການແຂວງ ໂດຍການເຂົ້າຮ່ວມເປັນປະທານຂອງ ທ່ານ ພົອ ວິໄລ ຫຼ້າຄໍາຟອງ, ກໍາມະການກົມການເມືອງສູນກາງພັກ, ຄະນະເລຂາທິການສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບ, ມີ ທ່ານ ພົຈວ ບົວພັນ, ອິນທະປັນຍາ, ຮອງເລຂາພັກແຂວງ ພ້ອມດ້ວຍຄະນະປະຈຳພັກແຂວງ, ກຳມະການພັກແຂວງ ຕະຫຼອດຮອດຫົວໜ້າ, ຮອງຫົວໜ້າພະແນກການ, ອົງການ, ກົມກອງ ອ້ອມຂ້າງແຂວງ, ພະນັກງານຫຼັກແຫຼ່ງພາຍໃນກອງບັນຊາປ້ອງກັນຄວາມສະຫງົບແຂວງ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.
ໃນພີທີ ໄດ້ຮັບຟັງການຜ່ານ ມະຕິຕົກລົງ ຂອງຄະນະປະຈໍາພັກແຂວງ ວ່າດ້ວຍການບົ່ງຕົວແຕ່ງຕັ້ງ ເລຂາຄະນະພັກ ກອງບັນຊາການ ປ້ອງກັນຄວາມສະຫງົບແຂວງ ຄື: ບົ່ງຕົວແຕ່ງຕັ້ງ ສະຫາຍ ອຸໄດ ອິນສຸວັນ ເປັນເລຂາຄະນະພັກ ກອງບັນຊາການປ້ອງກັນຄວາມສະຫງົບ ແຂວງໄຊສົມບູນ, ດໍາລັດວ່າດ້ວຍການແຕ່ງຕັ້ງຫົວໜ້າກອງບັນຊາການປ້ອງກັນຄວາມສະຫງົບ ແຂວງໄຊສົມບູນ ໂດຍແຕ່ງຕັ້ງ ທ່ານ ພັອ ອຸໄດ ອິນສຸວັນ ເປັນຫົວໜ້າກອງບັນຊາການປ້ອງກັນຄວາມສະຫງົບ ແຂວງ ແລະ ມະຕິຕົກລົງຂອງກະຊວງປ້ອງກັນຄວາມສະຫງົບ ວ່າດ້ວຍການຍົກຍ້າຍນາຍຕໍາຫຼວດ ທີ່ຂຶ້ນກັບກອງບັນຊາການ ປ້ອງກັນຄວາມສະຫງົບ ແຂວງໄຊສົມບູນ ຄື: ຍົກຍ້າຍ ທ່ານ ພັອ ອິນປັນ ຍາດຕິວົງ ຮອງຫົວໜ້າກອງບັນຊາການປ້ອງກັນຄວາມໝາຍງົບແຂວງໄຊສົມບູນ ໄປຮັບໜ້າທີ່ໃໝ່ຢູ່ກົມໃຫຍ່ການເມືອງກະຊວງປ້ອງກັນຄວາມສະຫງົບ.
ໂອກາດດັ່ງກ່າວ ທ່ານ ພົອ ວິໄລ ຫຼ້າຄໍາຟອງ ໄດ້ມີຄໍາເຫັນໂອ້ລົມຕໍ່ພິທີ ກ່ອນອື່ນທ່ານ ໄດ້ສະແດງຄວາມຍ້ອງຍໍຊົມເຊີຍ ຕໍ່ນາຍຕໍາຫຼວດທີ່ຖືກຊັບຊ້ອນ, ແຕ່ງຕັ້ງ ແລະ ຍົກຍ້າຍໃນຄັ້ງນີ້ ທີ່ໄດ້ສຸມທຸກເຫື່ອແຮງ ແລະ ສະຕິປັນຍາ ເຂົ້າໃນການຈັດຕັ້ງປະຕິບັດວຽກງານຂອງຕົນ ທີ່ຂັ້ນເທິງມອບໝາຍໃຫ້ ດ້ວຍຄວາມຮັບຜິດຊອບສູງ ພ້ອມນີ້ ທ່ານ ໄດ້ເນັ້ນໜັກໃຫ້ນາຍຕໍາຫຼວດ ທີ່ໄດ້ຖືກແຕ່ງຕັ້ງຮັບໜ້າທີ່ໃໝ່ ຢູ່ກອງບັນຊາການປ້ອງກັນຄວາມສະຫງົບແຂວງ ຈົ່ງເອົາໃຈໃສ່ນໍາພາ-ຊີ້ນໍາ ແລະ ຍົກສູງຄວາມຮັບຜິດຊອບຕໍ່ໜ້າທີ່ການເມືອງຂອງພັກ ແລະ ຈັດຕັ້ງປະຕິບັດໜ້າທີ່ວຽກງານຂອງຕົນ ຕາມການມອບໝາຍໃຫ້ສໍາເລັດ, ມີແບບແຜນວິທີເຮັດວຽກທີ່ທັນສະໄໝ ແລະ ວິທະຍາສາດຫຼາຍຂຶ້ນ, ມີຄວາມສາມັກຄີເປັນເອກະພາບພາຍໃນ, ມີຄວາມເດັດດ່ຽວໜຽວແໜ້ນເຮັດສຸດກົກສຸດປາຍ, ມີທັດສະນະຊົນຊັ້ນທີ່ຈະແຈ້ງ, ມີຄວາມເປັນເອກະພາບຕໍ່ອຸດົມການຂອງພັກ, ຍົກສູງສະຕິຊາດເປັນເຈົ້າຕົນເອງ, ມີນໍ້າໃຈເສຍສະຫຼະຢ່າງບໍ່ມີຂອບເຂດເພື່ອປະເທດຊາດ ແລະ ປະຊາຊົນ, ເດັດດ່ຽວຕ້ານ, ສະກັດກັ້ນໜໍ່ແໜງຄວາມບໍ່ສະຫງົບທີ່ຈະເກີດຂຶ້ນໃນສັງຄົມ ໃຫ້ທັນການ, ປຸກລະດົມຂົນຂວາຍພໍ່ແມ່ປະຊາຊົນ ໃຫ້ປະກອບສ່ວນວຽກງານປ້ອງກັນຄວາມສະຫງົບ ຢ່າງແຂງແຮງ ໂດຍຕິດພັນກັບການລົງກໍ່ສ້າງຮາກຖານການເມືອງ ພັດທະນາຊົນນະບົດ ເພື່ອແກ້ໄຂຊີວິດການເປັນຢູ່ຂອງປະຊາຊົນ ໃຫ້ດີຂຶ້ນ, ເອົາໃສ່ສ້າງກົມກອງປ້ອງກັນຄວາມສະຫງົບ ໃຫ້ມີຄວາມເຂັ້ມແຂງ, ບໍລິສຸດສັດຊື່ ແລະ ມີລະບຽບຫຼັກການ, ມີນໍ້າໃຈຮັບໃຊ້ຊາດ-ຮັບໃຊ້ປະຊາຊົນຢ່າງສຸດໃຈ ຮັບປະກັນໃຫ້ແຂວງໄຊສົມບູນ ມີຄວາມສະຫງົບປອດໄພໜັກແໜ້ນ ແລະ ພ້ອມກັນນໍາພາກອງບັນຊາການປ້ອງກັນຄວາມສະຫງົບ ຂອງແຂວງ ໃຫ້ເຕີມໃຫຍ່ຂະຫຍາຍຕົວຂຶ້ນຢ່າງບໍ່ຢຸດຢັ້ງ.
