ເນື່ອງໃນໂອກາດສະເຫຼີມສະຫຼອງວັນຊາດ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 49 ປີ ທີ 2 ທັນວາ 1975 ຫາ ທີ 2 ທັນວາ 2024 ທີ່ໄດ້ໜູນວຽນມາບັນຈົບຄົບຮອບອີກວາລະໜຶ່ງ ໃນຕອນເຊົ້າຂອງວັນທີ 2 ທັນວາ 2024 ນີ້ ສະຫາຍ ພອຍຄໍາ ຮຸ່ງບຸນຍວງ, ເລຂາຄະນະບໍລິຫານງານພັກແຂວງ, ເຈົ້າແຂວງໄຊສົມບູນ ພ້ອມດ້ວຍ ຮອງເລຂາພັກແຂວງ, ຮອງເຈົ້າແຂວງ, ຄະນະປະຈໍາພັກແຂວງ, ກໍາມະການພັກແຂວງ, ຫົວໜ້າພະແນກການ, ອົງການ-ກົມກອງ ອ້ອມຂ້າງແຂວງ ໄດ້ເຂົ້າວາງກະຕ່າດອກໄມ້ ຢູ່ອະນຸສອນສະຖານ ປະທານ ໄກສອນ ພົມວິຫານ ແລະ ອະນຸສາວະລີ ຮ່ວມສໍາພັນສູ້ຮົບ ລາວ – ຫວຽດນາມ ເພື່ອຈົດຈໍາ ແລະ ຈາລຶກເຖິງຄຸນງາມຄວາມດີ ທີ່ມີຕໍ່ປະເທດຊາດຢ່າງລົ້ນເຫຼືອ ທີ່ບັນດາສະຫາຍນັກຮົບ ໄດ້ຄຽງບ່າຄຽງໄຫຼ່ ບົນເສັ້ນທາງປະຫວັດສາດ ທີ່ໄດ້ເສຍສະຫຼະເລືອດເນື້ອ, ເຫື່ອແຮງ ແລະ ອຸທິດຕົນ ເຂົ້າໃນພາລະກິດຕໍ່ສູ້ປົກປັກຮັກສາ ແລະ ປົດປ່ອຍຊາດ,
ກູ້ຊາດ ຈົນສາມາດຍາດໄດ້ໄຊຊະນະ ແລະ ສະຖາປະນາປະເທດ ສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນ ໃນວັນທີ 2 ທັນວາ 1975 ພ້ອມນີ້ ພວກລູກຫຼານປວງຊົນລາວທັງຊາດ ເວົ້າລວມ, ເວົ້າສະເພາະ ກໍຄືຄະນະບໍລິຫານງານພັກແຂວງ ແລະ ພໍ່ແມ່ປະຊາຊົນບັນດາເຜົ່າ ຊາວແຂວງໄຊສົມບູນ ຂໍປະຕິຍານວ່າ ຈະສືບຕໍ່ເສີມຂະຫຍາຍມູນເຊື້ອອັນດີງາມດັ່ງກ່າວ ໄປໝູນໃຊ້ດ້ວຍຄວາມຈົງຮັກພັກດີ ຕໍ່ອຸດົມການ ແລະ ຈະພ້ອມກັນເພີ່ມພູນຄູນສ້າງ ໝາກຜົນຂອງການປະຕິວັດ ແລະ ຍຶດໝັ້ນລັດທິມາກ-ເລນິນ, ແນວຄິດ ປະທານ ໄກສອນ ພົມວິຫານ ໄວ້ໃນອຸດົມການຂອງພັກ ຂອງພວກເຮົາຕະຫຼອດການ ນອກນີ້ ກໍຈະສືບຕໍ່ເສີມຂະຫຍາຍມູນເຊື້ອອັນດີງາມ ແລະ ເພີ່ມພູນຄູນສ້າງມູນເຊື້ອມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ-ສອງລັດ ແລະ ປະຊາຊົນ ສອງຊາດ ລາວ-ຫວຽດນາມ ໃຫ້ໝັ້ນຄົງທະນົງແກ່ນຕະຫຼອດໄປ.
