ໜ່ວຍພັກຄະນະໂຄສະນາອົບຮົມ ແຂວງໄຊສົມບູນ ຈັດກອງປະຊຸມ ປະເມີນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2024 ຂຶ້ນ ໃນຕອນເຊົ້າຂອງວັນທີ 26 ພະຈິກ 2024 ນີ້ ທີ່ຫ້ອງປະຊຸມ ຂອງຕົນ ໂດຍການເປັນປະທານ ຂອງ ສະຫາຍ ນາງ ຄໍາສີ ສິດທິວໍລະດາ, ກໍາມະການພັກແຂວງ, ຫົວໜ້າ ຄະນະໂຄສະນາອົບຮົມແຂວງ, ພ້ອມດ້ວຍຄະນະຮັບຜິດຊອບປະເມີນໜ່ວຍພັກປອດໃສ, ເຂັ້ມແຂງ, ໜັກແໜ້ນ ຂັ້ນແຂວງ ແລະ ສະມາຊິກພັກພາຍໃນໜ່ວຍ ເຂົ້າຮ່ວມ.
ໂອກາດທີ່ມີຄໍາເຫັນຊີ້ນໍາຕໍ່ກອງປະຊຸມ ປະທານກອງປະຊຸມ ໄດ້ຍົກໃຫ້ເຫັນເຖິງຄວາມສໍາຄັນຂອງການປະເມີນໜ່ວຍພັກປອດໃສ, ເຂັ້ມແຂງ, ໜັກແໜ້ນ ເພື່ອພ້ອມກັນສະຫຼຸບຕີລາຄາຄືນການຈັດຕັ້ງປະຕິບັດໜ້າທີ່ວຽກງານການກໍ່ສ້າງໜ່ວຍພັກປອດໃສ, ເຂັ້ມແຂງໜັກແໜ້ນ ໃນໄລຍະ 1 ປີຜ່ານມາ ໂດຍຍົກໃຫ້ເຫັນບັນດາຈຸດດີ, ຈຸດອ່ອນ ແລະ ຂໍ້ຄົງຄ້າງຕ່າງໆ ທີ່ຈະໄດ້ພ້ອມຊອກຫາວີທີແກ້ໄຂໃຫ້ດີຂຶ້ນກວ່າເກົ່າ ແນໃສ່ເຊີດຊູບົດບາດຄວາມສາມາດການນຳພາຂອງພັກ ຍົກສູງຄວາມເປັນແບບຢ່າງນຳໜ້າຂອງຖັນແຖວພະນັກງານ ສະມາຊິກພັກ ເພື່ອສ້າງການຫັນປ່ຽນຢ່າງຕັ້ງໜ້າ ພ້ອມນີ້ກໍຈະໄດ້ພ້ອມຄົ້ນຄວ້າປະກອບຄໍາຄິດ-ຄໍາເຫັນຕໍາໜິຕິຊົມ ກໍ່ສ້າງຊ່ວຍເຫຼືອເຊິ່ງກັນ ແລະ ກັນ ດ້ວຍຄວາມຈິງໃຈ ບົນຫຼັກການລວມສູນປະຊາທິປະໄຕ ຮັກສາໄດ້ຄວາມສາມັກຄີ. ຊຶ່ງການປະເມີນໃນຄັ້ງນີ້ ແມ່ນໃຫ້ຄະແນນຕາມ 5 ດ້ານຄື: ດ້ານການເມືອງ, ດ້ານແນວຄິດ, ດ້ານການຈັດຕັ້ງ, ດ້ານແບບແຜນການນໍາພາ ແລະ ການນໍາພາປະຕິບັດໜ້າທີການເມືອງ.
ຈາກນັ້ນ ບັນດາສະມາຊິກພັກ ແຕ່ລະສະຫາຍ ໄດ້ຜັດປ່ຽນກັນຜ່ານໃບສໍາຫຼວດຕົນເອງ ພ້ອມທັງໃຫ້ໝູ່ຄະນະ ໄດ້ປະກອບຄໍາຄິດ-ຄໍາເຫັນ ຕໍາໜິກໍ່ສ້າງຊ່ວຍເຫຼືອເຊິ່ງກັນ ແລະ ກັນ ເພື່ອປັບປຸງດ້ານອ່ອນ ຂໍ້ຂາດຕົກບົກຜ່ອງ ໃຫ້ດີຂຶ້ນກວ່າເກົ່າ
ຈາກນັ້ນ ປະທານກອງປະຊຸມ ໄດ້ຜ່ານບົດສະຫຼຸບການກໍ່ສ້າງໜ່ວຍພັກປອດໃສ່, ເຂັ້ມແຂງ, ໜັກແໜ້ນ ປະຈໍາປີ 2024 ແລະ ທິດທາງແຜນການກໍ່ສ້າງ ປະຈໍາປີ 2025 ຊຶ່ງໜ່ວຍພັກຄະນະໂຄສະນາອົບຮົມແຂວງ ມີສະມາຊິກພັກທັງໝົດ ຈໍານວນ 10 ສະຫາຍ, ຍິງ 2 ສະຫາຍ ຕະຫຼອດໄລຍະ 1 ປີ ຜ່ານມາ ຄະນະພັກ ໄດ້ເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ແກ່ສະມາຊິກພັກ ໃຫ້ມີຄຸນທາດການເມືອງໜັກແໜ້ນ, ມີຄວາມເຊື່ອໝັ້ນຕໍ່ການນຳພາຂອງພັກພ້ອມທັງຈັດຕັ້ງປະຕິບັດໜ້າທີ່ວິຊາສະເພາະຕາມພາລະບົດບາດ, ສິດ ແລະ ໜ້າທີ່ ຂອງຕົນຕາມທີ່ໄດ້ກຳນົດໄວ້.
ນອກນັ້ນກໍໄດ້ເອົາໃຈໃສ່ ຈັດຕັ້ງປະຕິບັດຕາມຫຼັກການລວມຂອງພັກ, ນຳພາເປັນໝູ່ຄະນະ, ແບ່ງຄວາມຮັບຜິດຊອບໃຫ້ບຸກຄົນ ຢ່າງຈະແຈ້ງ ໂດຍກໍ່ສ້າງປັບປຸງຕົນເອງໄປຕາມ 5 ຫຼັກການ 3 ທິດນຳ ໃນການກໍ່ສ້າງພັກ ແລະ ປະຕິບັດໜ້າທີ່ວຽກງານອື່ນໆ ກໍມີຜົນສຳເລັດຕາມລະດັບຄາດໝາຍທີວາງໄວ້.