ໜ່ວຍພັກຄະນະໂຄສະນາອົບຮົມແຂວງ ໄຊສົມບູນ ໄດ້ຈັດພິທີຮັບເອົາມະຫາຊົນຜູ້ກ້າວໜ້າເຂົ້າເປັນສະມາຊິກພັກສຳຮອງ ໃນຕອນບ່າຍ ຂອງວັນທີ 4 ສິງຫາ 2025 ນີ້ ທີ ຫ້ອງປະຊຸມຂອງຕົນ ໂດຍການເປັນປະທານ ຂອງສະຫາຍ ພົຈວ ບົວພັນ ອິນທະປັນຍາ ຮອງເລຂາພັກແຂວງ, ພ້ອມດ້ວຍຕາງໜ້າຈາກໜ່ວຍພັກ ຂົງເຂດກຸ່ມການເມືອງ ຕະຫຼອດຮອດສະມາຊິກພັກສົມບູນ-ສຳຮອງ ພາຍໃນໜ່ວຍ ເຂົ້າຮ່ວມ.
ໂອກາດດັ່ງກ່າວ ໄດ້ຮັບຟັງການຜ່ານມະຕິຕົກລົງ ຂອງຄະນະປະຈຳພັກແຂວງ ວ່າດ້ວຍການອະນຸມັດຮັບເອົາມະຫາຊົນຜູ້ກ້າວໜ້າ ເຂົ້າເປັນສະມາຊິກພັກສຳຮອງ ສະບັບເລກທີ 0703/ຄປພ.ຊບ ລົງວັນທີ 28 ກໍລະກົດ 2025 ຊຶ່ງໜ່ວຍພັກຄະນະໂຄສະນາອົບຮົມແຂວງ ເຫັນດີອະນຸມັດຮັບເອົາມະຫາຊົນຜູ້ກ້າວໜ້າ ທີ່ຜ່ານການຮຽນສະໜັບສະໜູນ ແລະ ຮຽນກົດລະບຽບພັກແລ້ວ ເຂົ້າເປັນສະມາຊິກພັກສໍາຮອງ ຈຳນວນ 2 ສະຫາຍຄື: ສະຫາຍ ຕູ້ລໍ່ ໂຊຕູ້ກີ ແລະ ສະຫາຍ ນາງ ເບົ່າຊົ່ງ ຍົງມາ ຊຶ່ງທັງ 2 ສະຫາຍ ໄດ້ຜ່ານຂະບວນການຝຶກຝົນຫຼໍ່ຫຼອມຕົນເອງ ທັງໜ້າທີ່ວຽກງານຕົວຈິງ ມີຜົນສຳເລັດຫຼາຍດ້ານ ຊຶ່ງມີເງື່ອນໄຂເຂົ້າເປັນສະມາຊິກພັກປະຊາຊົນປະຕິວັດລາວ ຫຼັງຈາກນັ້ນ ສະຫາຍ ນາງ ສຸກຊົ່ງ ຕົ່ງສື ຮອງເລຂາໜ່ວຍພັກ ໄດ້ຂຶ້ນຮັບເອົາມະຫາຊົນກ້າວໜ້າເຂົ້າເປັນສະມາຊິກພັກສຳຮອງ ພ້ອມທັງມອບມະຕິຕົກລົງໃຫ້ແກ່ 2 ສະຫາຍ ເຂົ້າເປັນຊິກພັກສຳຮອງ ຢ່າງເປັນທາງການ.
ໂອກາດດັ່ງກ່າວ ສະຫາຍ ພົຈວ ບົວພັນ ອິນທະປັນຍາ ຮອງເລຂາພັກແຂວງ ໄດ້ມີຄຳເຫັນໂອ້ລົມຕໍ່ພິທີ ຊຶ່ງໄດ້ເນັ້ນໜັກໃຫ້ມະຫາຊົນກ້າວໜ້າທີ່ເລື່ອນຂຶ້ນເປັນສະມາຊິກພັກສຳຮອງ ຈົ່ງເອົາໃຈໃສ່ຝຶກຝົນຫຼໍ່ຫຼອມຕົນເອງ ໃຫ້ມີຄວາມຫ້າວຫັນຕໍ່ໜ້າທີວຽກງານໃນທຸກດ້ານ, ມີຄວາມໜັກແໜ້ນຕໍ່ອຸດົມການຂອງພັກ, ມີຄວາມຕື່ນຕົວ, ຫ້າວຫັນກຳໄດ້ແນວທາງນະໂຍບາຍຂອງພັກ ພ້ອມນັ້ນ ສະຫາຍຍັງໄດ້ເນັ້ນໜັກໃຫ້ໜ່ວຍພັກຕະຫຼອດຮອດສະມາຊິກພັກທຸກສະຫາຍ ຈົ່ງເອົາໃຈໃສ່ສຶກສາອົບຮົມການເມືອງ-ແນວຄິດ ເປັນປົກກະຕິ, ເປັນແບບຢ່າງນຳໜ້າໃຫ້ມະຫາຊົນຜູ້ກ້າວໜ້າ, ມີຄວາມຫ້າວຫັນຕໍ່ໜ້າທີວຽກງານພັກ-ລັດມອບໝາຍໃຫ້ ສາມາດໄດ້ຮັບຜົນສຳເລັດຕາມແຜນການທີ່ວາງໄວ້.