ແຂວງໄຊສົມບູນ ຈັດກອງປະຊຸມສ່ອງງານວຽກງານຮອບດ້ານຂອງພັກ ປະຈຳເດືອນຕຸລາ ປີ 2024 ໃນວັນທີ 30 ຕຸລາ ນີ້ ທີ່ຫ້ອງປະຊຸມຫ້ອງວ່າການແຂວງ ໂດຍການເປັນປະທານຂອງສະຫາຍ ແດງ ປະທຸມທອງ ຮອງເລຂາພັກແຂວງ, ປະທານສະພາປະຊາຊົນ ແຂວງໄຊສົມບູນ, ມີບັນດາຄະນະພັກຮາກຖານ-ໜ່ວຍພັກ ຈາກພະແນກການ, ອົງການ, ກົມກອງ ອ້ອມຂ້າງແຂວງ ແລະ ເມືອງອະນຸວົງ ເຂົ້າຮ່ວມ.
ໂອກາດນີ້ ສະຫາຍ ແດງ ປະທຸມທອງ ໄດ້ມີຄໍາເຫັນຊີ້ນໍາກອງປະຊຸມວ່າ: ກອງປະຊຸມໃນຄັ້ງນີ້ ເພື່ອເປັນການສ່ອງແສງລາຍງານວຽກງານຮອບດ້ານຂອງພັກ ໃນໄລຍະ 1 ເດືອນຜ່ານມາ ແລະ ວາງທິດທາງແຜນການໃນຕໍ່ໜ້າ ລວມທັງຂໍ້ສະດວກ ແລະ ຂໍ້ຫຍຸ້ງຍາກຕ່າງໆ ໃນການນໍາພາ-ຊີ້ນຳ ເພື່ອໃຫ້ການຈັດຕັ້ງປະຕິບັດວຽກງານໃນຕໍ່ໜ້າມີຜົນສຳເລັດ ແລະ ດີຂຶ້ນກວ່າເກົ່າ ເປັນຕົ້ນແມ່ນການຈັດຕັ້ງປະຕິບັດເນື້ອໃນມະຕິກອງປະຊຸມໃຫຍ່ ຄັ້ງທີ XI ຂອງສູນກາງພັກ, ມະຕິກອງປະຊຸມໃຫ່ຍ ຄັ້ງທີ l ຂອງອົງຄະນະພັກແຂວງ, ການເປີດທ່ອງທ່ຽວ ຕິດພັນກັບການສະເຫຼີມສະຫຼອງຮູບປັ້ນຫຼໍ່ເຈົ້າອະນຸວົງ ແລະ ຫໍຫຼັກເມືອງ ປີທີ 3, ການຈັດຕັ້ງປະຕິບັດດຳລັດ 414, ການກະກຽມດຳເນີນກອງປະຊຸມໃຫຍ່ຂອງຄະນະພັກຮາກຖານ-ໜ່ວຍພັກ ແລະ ອົງຄະນະພັກເມືອງ ແລະ ການນຳພາ-ຊີ້ນຳວຽກງານກໍ່ສ້າງຮາກຖານການເມືອງ ຕິດພັນກັບການພັດທະນາຊົນນະບົດແກ້ໄຂຄວາມທຸກຍາກ ແລະ ວຽກງານສາມສ້້າງ ລວມທັງ ການກະກຽມສະເຫຼີມສະຫຼອງ 3 ວັນປະຫວັດສາດຂອງພັກ ຂອງຊາດ, ການຈັດຕັ້ງປະຕິບັດວາລະແຫ່ງຊາດ ແລະ ບັນຫາອື່ນໆ.
ໃນກອງປະຊຸມ ບັນດາສະຫາຍເລຂາຄະນະພັກຮາກຖານ-ເລຂາໜ່ວຍພັກ ແຕ່ລະພາກສ່ວນ ກໍໄດ້ຜັດປ່ຽນກັນລາຍງານໃນການຈັດຕັ້ງປະຕິບັດວຽກງານທີ່ພົ້ນເດັ່ນຮອບດ້ານຂອງຄະນະພັກຮາກຖານ-ໜ່ວຍພັກຂອງຕົນ ໃນໄລຍະຜ່ານ1 ເດືອນຜ່ານມາ ຊຶ່ງເຫັນວ່າຄະນະພັກຮາກຖານ-ເລຂາໜ່ວຍພັກ ແຕ່ລະພາກສ່ວນ ໄດ້ເປັນເຈົ້າການນໍາພາ-ຊີ້ນຳ ເຄື່ອນໄຫວວຽກງານຕາມພາລະບົດບາດຂອງຕົນ ຈົນສາມາດເຮັດສຳເລັດໜ້າທີ່ການເມືອງທີ່ຂັ້ນເທິງມອບໝາຍໃຫ້ ໂດຍຖືວຽກງານສຶກສາອົບຮົມການເມືອງ-ແນວຄິດ ໃຫ້ສະມາຊິກພັກ-ພະນັກງານ ເປັນກົກ ເຮັດໃຫ້ສະມາຊິກພັກ, ພະນັກງານ ມີແນວຄິດອຸ່ນອ່ຽນທຸ່ນທ່ຽງ ເຊື່ອໝັ້ນຕໍ່ການນຳພາຂອງພັກ-ລັດ ພ້ອມກັນເອົາ ໃຈໃສ່ຈັດຕັ້ງປະຕິບັດວຽກງານວິຊາສະເພາະ ດ້ວຍຄວາມຮັບຜິດຊອບສູງ ແລະ ມີຜົນສຳເລັດເປັນກ້າວໆ ສ່ວນວຽກງານ ການກະກຽມດຳເນີນກອງປະຊຸມໃຫຍ່ຂອງຄະນະພັກຮາກຖານ ແລະ ໜ່ວຍພັກ ແລະ ບັນດາເມືອງ ແຕ່ລະພາກ ສ່ວນ ກໍໄດ້ສຳເລັດການກະກຽມບົດລາຍງານການເມືອງ, ບົດສຳຫຼວດການນຳພາລວມ ແລະ ການທາບທາມບຸກຄະລາກອນ ເປັນທີ່ຮຽບຮ້ອຍແລ້ວ ເພື່ອຮັບປະກັນໃຫ້ໃຫ້ການດຳເນີນກອງປະຊຸມຂັ້ນຂອງຕົນ ສຳເລັດຕາມຄາດ ໝາຍທີ່ວາງໄວ້.