ໃນຕອນບ່າຍຂອງວັນທີ 1 ພະຈິກ 2024 ນີ້ ທ່ານ ຕົ່ງມົວ ຊົວໂກ້ ຮອງເຈົ້າແຂວງໄຊສົມບູນ, ປະທານຄະນະກຳມະການຄຸ້ມຄອງ ເພື່ອແກ້ໄຂບັນຫາລະເບີດບໍ່ທັນແຕກ ຂັ້ນແຂວງ ພ້ອມດ້ວຍຄະນະ ເຂົ້າຮ່ວມ ກອງປະຊຸມການແກ້ໄຂບັນຫາ ລະເບີດບໍ່ທັນແຕກ ປະຈຳປີ 2024 ຜ່ານລະບົບວີດີໂອທາງໄກ ທີ່ຫ້ອງວ່າການແຂວງ ໂດຍການເປັນປະທານຂອງ ທ່ານ ໂພໄຊ ໄຂຄຳພິທູນ, ຮອງລັດຖະມົນຕີກະຊວງການຕ່າງປະເທດ, ຮອງປະທານຜູ້ປະຈຳການຄະນະກຳມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກ ( ຄຊກລ ) ທີ່ຕົກຄ້າງຢູ່ປະເທດລາວ ມີທ່ານ ນາງ Heather Variava, ເອກອັກຄະລັດຖະທູດ ສະຫະລັດ ອາເມລິກາ ປະຈໍາ ສປປ ລາວ ແລະ ທ່ານນາງ Martine Thérer ຜູ້ຕາງໜ້າຈາກ ອົງການສະຫະປະຊາຊາດເພື່ອການ ພັດທະນາ ປະຈຳ ສປປ ລາວຕະຫຼອດຮອດບັນດາຄະນະກຳມະການຄຸ້ມຄອງ ເພື່ອແກ້ໄຂບັນຫາລະເບີດບໍ່ທັນແຕກ ບັນດາແຂວງ ແລະ ເມືອງ ເຂົ້າຮ່ວມ.
ໃນກອງປະຊຸມ ໄດ້ຮັບຟັງການລາຍງານບົດສະຫຼຸບປະຈໍາປີ ຂອງການແກ້ໄຂບັນຫາ ລະເບີດບໍ່ທັນແຕກ ພ້ອມທັງປຶກສາຫາລືທິດທາງແຜນການໃນສົກປີ 2025 ຈາກທ່ານ ບຸນເພັງ ສີສະຫວັດ, ຮັກສາການ ຫົວໜ້າຫ້ອງການ ຄະນະກຳມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກ ( ຄຊກລ ) ທີ່ຕົກຄ້າງຢູ່ປະເທດລາວ ເຊິ່ງໄດ້ຍົກໃຫ້ເຫັນເຖິງຂໍ້ສະດວກ ແລະ ຂໍ້ຫຍຸ້ງຍາກ ໃນການຈັດຕັ້ງປະຕິບັດໃນໄລຍະຜ່ານມາເປັນຕົ້ນ ດ້ານງົບປະມານບໍ່ພຽງພໍໃນການຈັດຕັ້ງປະຕິບັດກິດຈະກຳສໍາລັບກຸ່ມທີ່ມີຄວາມສ່ຽງ ໂດຍສະເພາະຜູ້ທີ່ຕົກເປັນເຫຍື່ອຂອງລະເບີດບໍ່ທັນແຕກ, ຜູ້ປະຕິບັດງານຂາດທຶນເພື່ອຜະລິດເນື້ອຫາໂຄສະນາ ປະເພດຕ່າງໆທີ່ກ່ຽວຂ້ອງກັບກຸ່ມເປົ້າຫມາຍທີ່ແຕກຕ່າງກັນ ແລະ ບັນຫາອື່ນໆອີກຫຼາຍດ້ານ ທັງນີ້ ກໍ່ເພື່ອເປັນການປຶກສາຫາລືກ່ຽວກັບສິ່ງທ້າທາຍໃນປະຈຸບັນ ແລະ ປະກົດການຫຍໍ້ທໍ້ ພ້ອມທັງຊອກຫາວິທີການປັບປຸງ ແລະ ແກ້ໄຂບັນຫາລະເບີດບໍ່ທັນແຕກ ເພື່ອຮັບປະກັນໃຫ້ວຽກງານແກ້ໄຂບັນຫາລະເບີດບໍ່ທັນແຕກ ໄດ້ຕອບສະໜອງໃຫ້ແກ່ແຜນພັດທະນາເສດຖະກິດ-ສັງຄົມແຫ່ງຊາດ, ແຜນພັດທະນາຊົນນະບົດ, ລຶບລ້າງຄວາມທຸກຍາກ ແລະ ລົບລ້າງລະເບີດບໍ່ທັນແຕກໃຫ້ໝົດໄປໃນປີ 2030.
