ແຂວງໄຊສົມບູນ ຈັດກອງປະຊຸມ ປຶກສາຫາລືກະກຽມຄວາມພ້ອມພິທີສະຫຼອງປີທ່ອງທ່ຽວລາວ 2024 ຢູ່ແຂວງໄຊສົມບູນ ຕິດພັນກັບການສະເຫຼີມສະຫຼອງຫໍຫຼັກເມືອງ ແລະ ພຸດທະພິເສກຮູບປັ້ນຫຼໍ່່ເຈົ້າອະນຸວົງ ປີທີ 3 ຂຶ້ນທີ່ຫ້ອງປະຊຸມຫ້ອງວ່າການແຂວງ ໃນວັນທີ່ 11 ພະຈິກ 2024 ນີ້ໂດຍການເປັນປະທານຂອງທ່ານ ພອຍຄຳ ຮຸ່ງບຸນຍວງ, ເລຂາພັກແຂວງ, ເຈົ້າແຂວງໄຊສົມບູນ ພ້ອມດ້ວຍຄະນະຮັບຜິດຊອບກະກຽມພິທີດັ່ງກ່າວ ເຂົ້າຮ່ວມ.
ເພື່ອເປັນການປຶກສາຫາລືກະກຽມພິທີສະເຫຼີມສະຫຼອງປີທ່ອງທ່ຽວລາວ 2024 ຢູ່ແຂວງໄຊສົມບູນ ຕິດພັນກັບການສະເຫຼີມສະຫຼອງຫໍຫຼັກເມືອງ ແລະ ພຸດທະພິເສກຮູບປັ້ນຫຼໍ່ເຈົ້າອະນຸວົງ ປີທີ 3 ທັງເປັນການຄົ້ນຄວ້າປຶກສາຫາລືຄວາມເປັນເອກະພາບ ເພື່ອນຳໄປຈັດຕັ້ງປະຕິບັດຕາມພາລະບົດບາດຂອງແຕ່ລະອະນຸກຳມະການ ຈາກນັ້ນ, ແຕ່ລະອະນຸກຳມະການກໍໄດ້ຜັດປ່ຽນກັນລາຍງານ ເປັນຕົ້ນ ອະນຸກຳມະການເທດສະການອາຫານ ແລະ ຕະຫລາດນັດ, ການສະແດງສິນລະປະ, ເສດຖະກິດ-ການເງິນ, ປ້ອງກັນຊາດ-ປ້ອງກັນຄວາມສະຫງົບ, ກອງເລຂາ, ສະຖານທີ່, ພິທີການ ແລະ ຮັບແຂກ, ພິທີທາງສາສະໜາ, ໂຄສະນາປະຊາສຳພັນ ແລະ ອື່ນໆ ພ້ອມດຽວກັນນີ້ ປະທານກອງປະຊຸມໄດ້ມີຄຳຖາມເຈາະຈິ້ມ ໃຫ້ແກ່ບັນດາອະນຸກຳມະການໄດ້ຊີ້ແຈງລາຍລະອຽດ ແລະ ເພື່ອພ້ອມກັນປຶກສາຫາລືແກ້ໄຂຄວາມຫຍຸ້ງຍາກ, ຂໍ້ຄົງຄ້າງຕ່າງໆ ໃຫ້ເປັນເອກະພາບກັນ ແລະ ໄປລວງດຽວກັນໃນການຈັດຕັ້ງປະຕິບັດວຽກງານໃຫ້ໄດ້ຮັບຜົນດີ ຊຶ່ງພິທີດັ່ງກ່າວຈະຈັດຂຶ້ນໃນລະຫວ່າງວັນທີ 28 ພະຈິກ ຫາວັນທີ 4 ທັນວາ 2024 ນີ້
