ຫົວໜ້າຄະນະໂຄສະນາອົບຮົມສູງການພັກ ລົງເຄື່ອນໄຫວຢ້ຽມຢາມ ແລະ ພົບປະໂອ້ລົມພະນັກງານຫຼັກແຫຼ່ງ ຢູ່ແຂວງໄຊສົມບູນ

ໂອກາດນີ້ ສະຫາຍ ພອຍຄຳ ຮຸ່ງບຸນຍວງ, ເຈົ້າແຂວງໄຊສົມບູນ ໄດ້ຂຶ້ນລາຍງານໂດຍສັງເຂບວຽກທີ່ພົ້ນເດັ່ນຂອງ ແຂວງໄຊສົມບູນ ໃນໄລຍະ 9 ເດືອນຜ່ານມາ ແລະ ທິດທາງແຜນການ 3 ເດືອນທ້າຍປີ 2024 ເຊິ່ງຕະຫຼອດໄລຍະທີ່ຜ່ານມາໄດ້ເອົາໃຈໃສ່ຈັດຕັ້ງປະຕິບັດແຜນພັດທະນາເສດຖະ ກິດ, ແຜນງົບປະມານ-ການເງິນ ປະຈຳປີ 2024 ຕິດພັນກັບການຈັດຕັ້ງປະຕິບັດດຳລັດ 414/ລບ ແລະ 2 ວາລະແຫ່ງຊາດ ເຮັດໃຫ້ເສດຖະກິດມະຫາພາກຂອງແຂວງ ສືບຕໍ່ຂະຫຍາຍຕົວຢ່າງຕໍ່ເນື່ອງ ການຈັດເກັບລາຍຮັບເຂົ້າງົບ ປະມານໄດ້ປະຕິບັດໄດ້ 1,390.02 ຕື້ກີບ, ເທົ່າກັບ 197,45% ຂອງແຜນການປີ ສໍາລັບໂຄງການລົງທຶນເອກະຊົນພາຍໃນ ແລະ ຕ່າງປະເທດ ມີທັງໝົດ 131 ໂຄງການ ໃນນັ້ນ ຂັ້ນສູນກາງຄຸ້ມຄອງ 36 ໂຄງການ ຂັ້ນແຂວງຄຸ້ມຄອງ 95 ໂຄງການ ມູນຄ່າການລົງທຶນທັງໝົດ 1,854 ກວ່າ ຕື້ກີບ ແລະ 797,6 ລ້ານກວ່າໂດລາສະຫະລັດ, ດ້ານວຽກງານວັດທະນະທໍາ-ສັງຄົມ ໄດ້ເອົາໃຈໃສ່ຈັດຕັ້ງປະຕິບັດເປົ້າໝາຍການພັດທະນາແບບ ຍືນຍົງ (SDG) ຂອງຂະແໜງສຶກສາ, ຂະແໜງສາທາ ເຊິ່ງຫຼາຍເປົ້າໝາຍ ສາມາດບັນລຸຕາມ ຄາດໝາຍທີ່ວາງໄວ້ ແຂວງໄຊສົມບູນ ເປັນແຂວງຢຸດຕິການຖ່າຍຊະຊາຍ ແລະ ມີບ້ານວັດທະນະທໍາ 71 ບ້ານ ນອກນີ້ ຍັງໄດ້ກະກຽມດໍາເນີນກອງປະຊຸມໃຫ່ຍ 3 ຂັ້ນທົ່ວແຂວງ, ກະກຽມດໍາເນີນກອງປະຊຸມໃຫຍ່ ຄັ້ງທີ II ຂອງອົງຄະນະພັກແຂວງ, ກະກຽມ ແລະ ສະເຫຼີມສະຫຼອງ 3 ວັນປະຫວັດສາດ ແລະ ສ້າງຂະບວນການແຂ່ງຂັນຮັກຊາດ ແລະ ພັດທະນາ ໃຫ້ເປັນຂະບວນຟົດຟື້ນ, ກວ້າງຂວາງ ແລະ ແຂງແຮງ ເຊິ່ງເປັນການສ້າງຜົນງານ ເພື່ອຂໍ່ານັບຮັບຕ້ອນກອງປະຊຸມໃຫຍ 3 ຂັ້ນຂອງພັກທົ່ວ ແຂວງໄຊສົມບູນ ອີກດ້ວຍ.

ໂອກາດທີ່ມີຄວາມໝາຍຄວາມສຳຄັນນີ້ ສະຫາຍ ປອ ຄໍາພັນ ເຜີຍຍະວົງ ໄດ້ມີຄຳເຫັນໂອ້ລົມ ເຊິ່ງ ສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດຫຼາຍດ້ານທີ່ພົ້ນເດັ່ນ ແລະ ໄດ້ເນັ້ນໜັກໃຫ້ຄະນະນຳຂອງແຂວງ ຍົກສູງບົດບາດການນຳພາຂອງອົງຄະນະພັກ ສູ້ຊົນໃຫ້ເສດຖະກິດຂະຫຍາຍຕົວຢ່າງຕໍ່ເນື່ອງ, ສືບຕໍ່ຈັດເກັບລາຍຮັບເຂົ້າງົບປະມານໃຫ້ໄດ້ຕາມລະດັບຄາດໝາຍ, ເອົາໃຈໃສ່ຄຸ້ມຄອງໂຄງການລົງທຶນຂອງລັດ ແລະ ເອກະຊົນທັງພາຍໃນ ແລະ ຕ່າງປະເທດໃຫ້ສໍາເລັດ ສືບຕໍ່ຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ (SDG) ໂດຍສະເພາະ 6 ຄາດໝາຍ ຂອງຂະແໜງສຶກສາ ແລະ 2 ຄາດໝາຍທີ່ບໍ່ທັນບັນລຸຂອງຂະແໜງສາທາໃຫ້ມີຄວາມຄືບໜ້າ ສຸມໃສ່ນໍາພາ-ຊີ້ນໍາຄະນະຮັບຜິດຊອບຂັ້ນແຂວງ, ກະກຽມຄວາມພ້ອມຮອບດ້ານໃຫ້ແກ່ການສະເຫຼີມສະຫຼອງ 3 ວັນປະຫວັດສາດ ຂອງພັກ ຂອງຊາດ ໃຫ້ມີເນື້ອໃນເລິກເຊິ່ງ ເປັນຂະບວນການຟົດຟື້ນ ແລະ ກວ້າງຂວາງ.