ພະນັກງານ-ລັດຖະກອນ ອ້ອມຂ້າງແຂວງໄຊສົມບູນ ໄດ້ພ້ອມກັນສ້າງຂະບວນການອອກແຮງງານລວມເກັບຂີ້ເຫຍື້ອ ລຽບຕາມເສັ້ນທາງຕ່າງໆ ພາຍໃນເທດສະບານຂອງແຂວງ ໃນຕອນບ່າຍຂອງວັນທີ 27 ພະຈິກ 2024 ນີ້ ເພື່ອຂໍ່ານັບຮັບຕ້ອນວັນສຳຄັນຕ່າງໆ ຂອງພັກ-ຂອງຊາດ ໂດຍສະເພາະ ກໍຄືວັນທີ 2 ທັນວາ ຄົບຮອບ 49 ປີ, ວັນຄ້າຍວັນເກີດປະທານ ໄກສອນ ພົມວິຫານ ຜູ້ນໍາທີ່ແສນເຄົາລົບຮັກ ຂອງປວງຊົນລາວທັງຊາດ ຄົບຮອບ 104 ປີ ລວມໄປເຖິງງານສະເຫຼີມສະຫຼອງປີທ່ອງທ່ຽວລາວ 2024 ຢູ່ແຂວງໄຊສົມບູນ ທີ່ຈະໄດ້ຈັດຂຶ້ນໃນວັນທີ 30 ພະຈິກ ນີ້ ຕິດພັນກັບການສະເຫຼີມສະຫຼອງຫໍຫຼັກເມືອງ ແລະ ຕັ້ງກອງບຸນເພື່ອອຸທິດຫາບັນພະບຸລຸດ ໃນປີທີ 3 ໃຫ້ເຕັມໄປດ້ວຍບັນຍາກາດຟົດຟື້ນ, ເບີກບານມ່ວນຊື່ນ ແລະ ມີຄວາມໝາຍ-ຄວາມສຳກຄັນ.
ສຳລັບການສ້າງຂະບວນການອອກແຮງງານລວມ ຄັ້ງນີ້ ໄດ້ແບ່ງຄວາມຮັບຜິດຊອບໃຫ້ແຕ່ລະກຸ່ມ ຢ່າງລະອຽດຈະແຈ້ງ ໃນນີ້ກຸ່ມການເມືອງ ຮັບຜິດຊອບ ຕາມເສັ້ນທາງຖະໜົນເພຍຫຼວງ ເລີ່ມແຕ່ຂົວນໍ້າຈັ້ງ 2 ຫາສີ່ແຍກໂຮງໝໍແຂວງ, ກຸ່ມເສດຖະກິດ ຮັບຜິດຊອບ ຕາມເສັ້ນທາງຖະໜົນໄຊຊະນະ ໂດຍເລີ່ມແຕ່ຂົວນໍ້າຈັ້ງ 1 ຫາ 3 ແຍກເຮືອນທ່ານ ຢ່າງກົວ, ກຸ່ມວັດທະນະທຳ-ສັງຄົມ ຮັບຜິດຊອບ ຕາມເສັ້ນທາງຖະໜົນໄຊຊະນະ ເລີ່ມແຕ່ປະຕູໂຂງໃຫຍ່ ຫາ ໂຮງງຮຽນກິນນອນຊົນເຜົ່າ, ກຸ່ມປົກປ້ອງກົດໝາຍ ຮັບຜິດຊອບ ຕາມເສັ້ນທາງຖະໜົນໄຊຊະນະ ເລີ່ມແຕ່ໂຮງຮຽນກິນນອນຊົນເຜົ່າ ຫາ ຂົວນ້ຳຈັ້ງ 1 ແລະ ກຸ່ມປ້ອງກັນຊາດ-ປ້ອງກັນຄວາມສະຫງົບ ແມ່ນຮັບຜິດຊອບ ຕາມເສັ້ນທາງຖະໜົນອະນຸວົງ ເລີ່ມແຕ່ 3 ແຍກ ເຮືອນທ່ານ ຢ່າງກົວ ຫາ ຂົວນໍ້າຈັ້ງ 2
ຊຶ່ງການອອກແຮງງານລວມເທື່ອນີ້ ແຕ່ລະພາກສ່ວນ ໄດ້ສຸມທຸກກຳລັງແຮງ ເຂົ້າໃນການຈັດຕັ້ງປະຕິບັດ ດ້ວຍຄວາມຮັບຜິດຊອບສູງ ທັງນີ້ ກໍເພື່ອເຮັດໃຫ້ເສັ້ນທາງຕ່າງໆ ພາຍໃນເທດສະບານແຂວງ ມີຄວາມສະອາດຈົບງາມ ແລະ ເປັນລະບຽບຮຽບຮ້ອຍ ໂດຍປາສະຈາກສິ່ງຮົກເຮື້ອທັງປວງ ທັງເຮັດໃຫ້ສະພາບແວດລ້ອມອ້ອມຂ້າງ ມີຄວາມສົດຊື່ນ ແລະ ໂປ່ງໃສຕະຫຼອດເວລາ. ຂະນະດຽວກັນ ກໍເພື່ອສ້າງຈິດສຳນຶກ ໃຫ້ພະນັກງານອ້ອມຂ້າງ ແຂວງໄຊສົມບູນ ມັກຮັກໃນການອອກແຮງງານ ກໍຄືການອະນາໄມ ເພື່ອຄວາມສະອາດຈົບງາມ ພາຍໃນເທດສະບານແຂວງ ທັງເປັນການເຕົ້າໂຮມຄວາມສາມັກຄີ ໃຫ້ນັບມື້ແໜ້ນແຟ້ນຍິ່ງໆ ຂຶ້ນ ເພື່ອພ້ອມກັນປະກອບສ່ວນທີ່ສຳຄັນ ເຂົ້າໃນການສ້າງສາພັດທະນາ ແຂວງໄຊສົມບູນ ໃຫ້ຈະເລີນກ້າວໜ້າຂຶ້ນຢ່າງບໍ່ຢຸດຢັ້ງ.
