ພິທີ ຕັ້ງກອງບຸນ ແລະ ໃສ່ບາດຖວາຍສັງຄະທານຫາບັນພະບຸລຸດ ປີທີ 3 ຢູ່ແຂວງໄຊສົມບູນ ໄດ້ຈັດຂຶ້ນໃນລະຫວ່າງວັນທີ 1 ຫາ 2 ທັນວາ 2024 ນີ້ ທີ່ສວນສາທາລະນະຖໍ້າເຈົ້າອະນຸວົງ ໂດຍຝ່າຍຄະນະສົງ ມີ ພຣະອາຈານ ຄຳໝັ້ນ ສີສະຫວັດ, ກຳມະການສູນກາງອົງການພຸດທະສາສະໜາສຳພັນລາວ (ອພສ) ແລະ ຄະນະສົງ ຈາກສູນກາງອົງການພຸດທະສາສະໜາສຳພັນລາວ (ອພສ) ພ້ອມດ້ວຍຄະນະສົງ ພາຍໃນອົງການພຸດທະສາສະໜາສຳພັນລາວ (ອພສ) ແຂວງໄຊສົມບູນ ແລະ ຝ່າຍຄະລາວາດ ມີ ທ່ານ ພອຍຄຳ ຮຸ່ງບຸນຍວງ, ເຈົ້າແຂວງໄຊສົມບູນ ພ້ອມດ້ວຍການນຳແຂວງ, ຄອບຄົວການນຳ, ພຸດທະບໍລິສັດ ຕະຫຼອດຮອດອອກຕົນຍາດໂຍມ ຊາວແຂວງໄຊສົມບູນ ເຂົ້າຮ່ວມ ຢ່າງຫຼວງຫຼາຍ.
ໃນພິທີ ທ່ານ ພອຍຄຳ ຮຸ່ງບຸນຍວງ ໄດ້ໄຕ້ທູບທຽນບູຊາພຣະລັດຕະນະໄຕຣ ແລະ ລັ່ນຄ້ອງ 9 ບາດ ເພື່ອເປັນສິລິມຸງຄຸນ ຫຼັງຈາກນັ້ນກໍໄດ້ມີພິທີ ໄຫວ້ພຣະຮັບສິນ, ສູດປະຣິຕະມຸງຄຸນ, ຟັງທັມມະເທສະໜາປັນຍາປາລະມີ 1 ກັນ, ຖວາຍປັດໄຈໃຫ້ແກ່ພຣະສົງ ແລະ ຮັບພອນຢາດນໍ້າ. ການຕັ້ງກອງບຸນຫາບັນພະບຸລຸດ ປີທີ 3 ຕິດຕໍ່ກັນນີ້ ກໍເພື່ອເປັນສິລິມຸງຄຸນ ແລະ ໃຫ້ດວງວິນຍານຂອງບັນພະບຸລຸດ ໄດ້ຮັບຮູ້ ແລະ ລົງມາຕ້ອນຮັບຈັບໂຈມເອົາຂອງໄຫວ້ ເພື່ອໃຫ້ບຸນກຸສົນເຫຼົ່ານັ້ນ ໄດ້ມາປົກປັກຮັກສາ, ຄຸ້ມຄອງ ຊາວແຂວງໄຊສົມບູນ ໃຫ້ມີແຕ່ຄວາມຜາສຸກ, ສິວິໄລ ແລະ ຈະເລີນກ້າວໜ້າຂຶ້ນເລື້ອຍໆ. ຈາກນັ້ນ ໃນຕອນເຊົ້າຂອງວັນທີ 2 ທັນວາ 2024 ນີ້ ( ກົງກັບມື້ຂຶ້ນ 2 ຄໍ່າ ເດືອນ 1 ລາວ ປີມະໂຣງ ພສ 2567 ) ໄດ້ມີພິທີ ໃສ່ບາດຖວາຍສັງຄະທານໃຫ້ແກ່ພຣະສົງ ຈຳນວນ 31 ອົງ
ເຊິ່ງການໃສ່ບາດຖວາຍສັງຄະທານ ໃນຄັ້ງນີ້ ກໍເພື່ອອຸທິດບຸນກຸສົນຫາບັນພະບຸລຸດຜູ້ລ່ວງລັບ ແລະ ການນຳພັກ-ລັດ ຜູ້ທີ່ໄດ້ອຸທິດຕົນໃນການສ້າງສາປະເທດຊາດ ພ້ອມທັງສະແດງໃຫ້ເຫັນເຖິງຈິດໃຈເຫຼື້ອມໃສສັດທາອັນແຮງກ້າ ຕໍ່ພຣະພຸດທະສາສະໜາ ທີ່ຄົນລາວເຮົາໄດ້ນັບຖືມາແຕ່ສະໄໝບູຮານນະການ ແລະ ສືບທອດເຖິງຍຸກປັດຈຸບັນ ເຊິ່ງການໃສ່ບາດຢາດນໍ້າ ແມ່ນການໃຫ້ທານເພື່ອອຸທິດສ່ວນບຸນກຸສົນຫາຍາດຕິພີ່ນ້ອງ ຜູ້ທີ່ລ່ວງລັບໄປແລ້ວ ໃຫ້ຮັບຮູ້ ແລະ ມາຕ້ອນຮັບຈັບໂຈມເອົາ ຕາມຄວາມເຊື່ອທີ່ເຄີຍປະຕິບັດກັນມາ ຂະນະດຽວກັນ ກໍເພື່ອສະສົມບຸນປາລະມີ, ຄຸນງາມຄວາມດີ ແລະ ຄວາມເປັນສິລິມຸງຄຸນ ໃຫ້ແກ່ຕົນເອງ ທັງເປັນການຮັກສາໄດ້ວັດທະນະທຳ, ຮີດຄອງປະເພນີອັນດີງາມຂອງຊາດ, ຂອງເຜົ່າທີ່ເຄີຍປະຕິບັດ ແລະ ສືບທອດມາແຕ່ບູຮານນະການ
ທັງເປັນການກະຕຸກຊຸກຍູ້ ແລະ ສົ່ງເສີມການທ່ອງທ່ຽວ ຢູ່ແຂວງໄຊສົມບູນ ໃຫ້ມີບັນຍາກາດຟົດຟື້ນ, ກວ້າງຂວາງ, ໂດຍສະເພາະການທ່ອງທ່ຽວທາງປະຫວັດສາດ, ວັດທະນະທຳ ແລະ ທຳມະຊາດ ເນື່ອງຈາກວ່າສວນສາທາລະນະຖໍ້າເຈົ້າອະນຸວົງ ແຫ່ງນີ້ ເປັນສະຖານທີ່ທ່ອງທ່ຽວ ທີ່ສວຍສົດງົດງາມທາງດ້ານທິວທັດທໍາມະຊາດ ແລະ ມີຄວາມໝາຍທາງປະຫວັດສາດ ເພື່ອໃຫ້ນັກທ່ອງທ່ຽວ ທັງພາຍໃນ ແລະ ຕ່າງປະເທດ ທີ່ເຂົ້າມາທ່ຽວຊົມ ແຂວງໄຊສົມບູນ ມີຄວາມປະທັບໃຈ ແລະ ຢາກເຂົ້າມາທ່ຽວຊົມ ແຂວງໄຊສົມບູນ ນັບມື້ນັບຫຼາຍຂຶ້ນ ໃນຕໍ່ໜ້າ.
