ຄະນະຈັດຕັ້ງ ແຂວງໄຊສົມບູນ ໄດ້ຈັດພິທີປະກາດຍົກຍ້າຍ, ແຕ່ງຕັ້ງ ພະນັກງານນຳພາ-ຄຸ້ມຄອງ ຂັ້ນແຂວງຄຸ້ມຄອງຂຶ້ນ ໃນຕອນບ່າຍຂອງວັນທີ 17 ທັນວາ 2024 ນີ້ ຢູ່ທີ່ຫ້ອງປະຊຸມຫ້ອງວ່າການແຂວງ ໂດຍການເປັນປະທານຂອງ ທ່ານ ພົຈວ ບົວພັນ ອິນທະປັນຍາ, ຮອງເລຂາພັກແຂວງ, ຜູ້ຊີ້ນຳວຽກງານພັກ-ພະນັກງານ ພ້ອມດ້ວຍບັນດາຫົວໜ້າພະແນກການ, ອົງການ-ກົມກອງ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.
ໃນພິທີ ໄດ້ຮັບຟັງບັນດາມະຕິຕົກລົງ ວ່າດ້ວຍການຍົກຍ້າຍ, ແຕ່ງຕັ້ງ ພະນັກງານນຳພາຄຸ້ມຄອງ ໄປຮັບໜ້າທີ່ໃໝ່ຈາກທ່ານ ພູຄຳ ແກ້ວວົງໄຊ, ຮອງຫົວໜ້າຄະນະຈັດຕັ້ງແຂວງ ເປັນຕົ້ນ ມະຕິຕົກລົງຂອງຄະນະປະຈຳພັກແຂວງ ວ່າດ້ວຍການຕົກລົງເຫັນດີຍົກຍ້າຍ ທ່ານ ສົມດາວີ ຄຳເມືອງຄູນ, ຮອງຫົວໜ້າຄະນະໂຄສະນາອົບຮົມແຂວງ ໄປຮັບໜ້າທີ່ໃໝ່ ເປັນຮອງປະທານແນວລາວສ້າງຊາດແຂວງ, ເຫັນດີຍົກຍ້າຍ ທ່ານ ນາງ ສຸກຊົ່ງ ຕົ່ງສື ຮອງປະທານແມ່ຍິງແຂວງ ໄປຮັບໜ້າທີ່ໃໝ່ ເປັນຮອງຫົວໜ້າຄະນະໂຄສະນາອົບຮົມແຂວງ, ເຫັນດີແຕ່ງຕັ້ງ ທ່ານ ນາງ ບຸນທະວີ ສິງວິໄລ ເປັນປະທານສະຫະພັນແມ່ຍິງ ແຂວງໄຊສົມບູນ, ຂໍ້ຕົກລົງຂອງທ່ານເຈົ້າແຂວງ ວ່າດ້ວຍການຍົກຍ້າຍ ທ່ານ ດຮ ພຸດ ອິນທະວົງ ຫົວໜ້າພະແນກກະສິກຳ ແລະ ປ່າໄມ້ແຂວງ ໄປຮັບໜ້າທີ່ໃໝ່ ຢູ່ກະຊວງກະສິກຳ ແລະ ປ່າໄມ້ ແລະ ເຫັນດີແຕ່ງຕັ້ງ ທ່ານ ບຸນທອນ ປັນແກ້ວ ເປັນຮັກສາການຫົວໜ້າພະແນກກະສິກຳ ແລະ ປ່າໄມ້ແຂວງ.
ໃນຕອນທ້າຍພິທີ ທ່ານ ພົຈວ ບົວພັນ ອິນທະປັນຍາ ໄດ້ມີຄຳເຫັນໂອ້ລົມ ຊຶ່ງທ່ານໄດ້ຍົກໃຫ້ເຫັນເຖິງຄວາມສຳຄັນ ຂອງການຍົກຍ້າຍພະນັກງານນຳພາ-ຄຸ້ມຄອງ ຊຶ່ງເປັນວຽກງານປົກກະຕິຂອງທຸກການຈັດຕັ້ງ ໃນສັງຄົມ ອີງຕາມຄວາມຮຽກຮ້ອງຕ້ອງການຂອງໜ້າທີ່ການເມືອງ ແລະ ປະຕິບັດຕາມແຜນກຳນົດພະນັກງານນຳພາ-ຄຸ້ມຄອງ ຊຶ່ງແມ່ນຫຼັກການອັນໜຶ່ງຂອງພັກເຮົາ. ພ້ອມນີ້ ທ່ານຍັງໄດ້ຮຽກຮ້ອງໃຫ້ຜູ້ທີ່ໄດ້ຮັບໜ້າທີ່ໃໝ່ ຈົ່ງເອົາໃຈໃສ່ສືບຕໍ່ສຶກສາອົບຮົມການເມືອງ-ແນວຄິດ ເປັນບັນຫາສຳຄັນ ໄປພ້ອມກັບການເພີ່ມທະວີຄວາມສາມັກຄີໃຫ້ເປັນປຶກແຜ່ນ ແລະ ກຳແໜ້ນແນວທາງ, ແຜນນະໂຍບາຍຂອງພັກ ລະບຽບກົດໝາຍຂອງລັດ, ມີວິໄສທັດກວ້າງໄກ, ເບິ່ງບັນຫາຖືກຕ້ອງຊັດເຈນ ເພື່ອເຮັດໃຫ້ການຈັດຕັ້ງປະຕິບັດວຽກງານ ໃນຂົງເຂດຄວາມຮັບຜິດຊອບຂອງຕົນ ໃຫ້ມີປະສິດທິພາບ ແລະ ດີຂຶ້ນເປັນກ້າວໆ ໃນຕໍ່ໜ້າ.
