ເນື່ອງໃນໂອກາດບຸນປີໃໝ່ປະຈຳຊາດ ສສ ຫວຽດນາມ ປີ2025, ຄະນະຜູ້ແທນແຂວງໄຊສົມບູນ ນຳໂດຍ ສະຫາຍ ເລັ່ງຊົ່ງ ຕົງສີ, ຄະນະປະຈຳພັກແຂວງ, ປະທານແນວລາວສ້າງຊາດແຂວງ ໄດ້ເດີນທາງໄປຢ້ຽມຢາມ ແລະ ອວຍພອນປີໃໝ່ ການນຳແຂວງເຫງະອານ, ກອງບັນຊາການທະຫານເຂດ 4 ແລະ ກຸ່ມບໍລິສັດຮ່ວມມືເສດຖະກິດໂກເອກໂກ, ຢູ່ ແຂວງເຫງະອານ, ສສ ຫວຽດນາມ ລະຫວ່າງ ວັນທີ 15-17 ມັງກອນ 2025. ເຊິ່ງໃນ ລະຫວ່າງ ການເຂົ້າອວຍພອນ ກໍ່ໄດ້ຮັບກຽດຈາກ ການນຳແຂວງເຫງະອານ ໃຫ້ການຕ້ອນຮັບ ໂດຍ ສະຫາຍ ບຸຍ ດິ່ງ ລອງ, ຄະນະປະຈຳພັກແຂວງ, ຮອງປະທານຄະນະກຳມະການປະຊາຊົນແຂວງເຫງະອານ ພ້ອມດ້ວຍຕາງໜ້າການນຳບັນດາພະແນກການ, ອົງການອ້ອມຂ້າງແຂວງເຫງະອານ, ກອງບັນຊາການທະຫານເຂດ 4 ໃຫ້ການຕ້ອນຮັບ ໂດຍ ສະຫາຍ ພົຈວ ຫວຽນ ຫງ໋ອກ ຮ່າ, ຮອງຫົວໜ້າກອງບັນຊາການທະຫານເຂດ 4, ກຸ່ມບໍລິສັດຮ່ວມມືເສດຖະກິດໂກເອກໂກ ໃຫ້ການຕ້ອນຮັບໂດຍ ສະຫາຍ ພັອ ຫງວຽນ ວັນ ນາມ, ຮອງຜູ້ອຳນວຍການໃຫຍ່ກຸ່ມບໍລິສັດຮ່ວມມືເສດຖະກິດໂກເອກໂກ.
ທັງນີ້, ການໄປຢ້ຽມຢາມ ແລະ ອວຍພອນບັນດາແຂວງຂອງ ສສ ຫວຽດນາມ, ບັນດາການຈັດຕັ້ງທີ່ໄດ້ມີການຮ່ວມມືກັບແຂວງໄຊສົມບູນ ກໍ່ເພື່ອເປັນການປະກອບສ່ວນເຂົ້າໃນການເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ-ສອງລັດຖະບານ ແລະ ປະຊາຊົນສອງຊາດ ລາວ – ຫວຽດນາມ ໂດຍສະເພາະແມ່ນການຮ່ວມຂອງໄຊສົມບູນແລະແຂວງກັບບັນແຂວງ ແລະ ອົງການຈັດຕັ້ງຕ່າງໆ ຂອງ ສ.ສ ຫວຽດນາມນາມ ໃຫ້ນັບມື້ກ້າວເຂົ້າສູ່ລວງເລິກ, ແຕກດອກອອກຜົນຕະຫຼອດການ. 