ເນື່ອງໃນໂອກາດ ສະຫາຍ ນາງ ອາລິຍະວັນ ອັກຄະວົງ ຮອງເລຂາຄະນະພັກ, ຮອງປະທານຄະນະບໍລິຫານງານສູນກາງ ສະຫະພັນກຳມະການລາວ ພ້ອມດ້ວຍຄະນະ ໄດ້ລົງມາເຄື່ອນໄຫວວຽກງານ ຢູ່ແຂວງໄຊສົມບູນ ສະຫາຍ ພ້ອມດ້ວຍຄະນະ ໄດ້ເຂົ້າພົບປະການນໍາແຂວງ ໃນຕອນເຊົ້າຂອງວັນທີ 29 ເມສາ ນີ້ ຢູ່ທີ່ຫ້ອງຮັບແຂກຫ້ອງວ່າການແຂວງ ໂດຍການຕ້ອນຮັບຂອງສະຫາຍ ບົວພັນ ອິນທະປັນຍາ ຮອງເລຂາພັກແຂວງ ຜູ້ຊີ້ນໍາວຽກງານພັກ-ພະນັກງານ ພ້ອມດ້ວຍ ຄະນະສະຫະພັນກຳມະການແຂວງ ເຂົ້າຮ່ວມ.
ໂອກາດນີ້ ສະຫາຍ ນາງ ອາລິຍະວັນ ອັກຄະວົງ ໄດ້ແຈ້ງຈຸດປະສົງໃຫ້ທ່ານ ຮອງເລຂາພັກແຂວງ ພ້ອມດ້ວຍຄະນະໄດ້ຮັບຊາບ ຊຶ່ງການລົງມາເຄື່ອນໄຫວວຽກງານ ຢູ່ແຂວງໄຊສົມບູນໃນຄັ້ງນີ້ ກໍເພື່ອລົງມາຊຸກຢູ້ວຽກງານການກະກຽມດຳເນີນກອງປະຊຸມໃຫຍ່ ຄັ້ງທີ່ lll ຂອງສະຫະພັນກຳມະບານແຂວງ ທີ່ຈະໄດ້ໄຂຂຶ້ນໃນຕໍ່ໜ້ານີ້ ໂດຍສະເພາະແມ່ນການກະກຽມທາງດ້ານເນື້ອໃນ ແລະ ດ້ານບຸກຄະລາກອນ ເພື່ອໃຫ້ມີຄວາມພ້ອມຮອບດ້ານ ທັນຕາມກຳນົດເວລາ ແລະ ມີຜົນສຳເລັດຕາມຄາດໝາຍທີ່ວາງໄວ້.
