ກອງປະຊຸມສະໄໝສາມັນ ເທື່ອທີ 9 ຂອງສະພາປະຊາຊົນ ແຂວງໄຊສົມບູນ ຊຸດທີ II ໄດ້ໄຂຂຶ້ນຢ່າງເປັນທາງການ ໃນຕອນເຊົ້າຂອງວັນທີ 29 ກໍລະກົດ ນີ້ ທີ່ສະໂມສອນເມືອງອະນຸວົງ ໂດຍການເປັນປະທານຂອງທ່ານ ແດງ ປະທຸມທອງ ຮອງເລຂາພັກແຂວງ, ປະທານສະພາປະຊາຊົນແຂວງ, ເປັນກຽດເຂົ້າຮ່ວມຂອງທ່ານ ພອຍຄໍາ ຮຸ່ງບຸນຍວງ ເລຂາພັກແຂວງ, ເຈົ້າແຂວງໄຊສົມບູນ, ມີຄະນະປະຈໍາພັກແຂວງ, ຄະນະບໍລິຫານງານພັກແຂວງ, ຄະນະປະຈໍາສະພາປະຊາຊົນແຂວງ, ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 18, ສະມາຊິກສະພາປະຊາຊົນແຂວງ, ເລຂາພັກເມືອງ, ຫົວໜ້າພະແນກການ, ອົງການ, ກົມກອງ ອ້ອມຂ້າງແຂວງ, ພະນັກງານອາວຸໂສບຳນານ, ວິສາຫະກິດທັງພາກລັດ ແລະ ເອກະຊົນ ເຂົ້າຮ່ວມ.
ໂອກາດນີ້ ທ່ານ ແດງ ປະທຸມທອງ ໄດ້ມີຄໍາເຫັນກ່າວໄຂກອງປະຊຸມ ຢ່າງເປັນທາງການ ຊຶ່ງກອງປະຊຸມ ຄັ້ງນີ້ ຈະໄດ້ຮັບຟັງການລາຍງານ, ການພິຈາລະນາ, ການຮັບຮອງເອົາບັນຫາສໍາຄັນພື້ນຖານຂອງແຂວງ ຄື: ຮັບຟັງການລາຍງານໂດຍຫຍໍ້ ບົດລາຍງານໂດຍສັງເຂບຂອງທ່ານເຈົ້າແຂວງ ກ່ຽວກັບການຈັດຕັ້ງປະຕິບັດວຽກງານພົ້ນເດັ່ນ ຂອງແຂວງໄຊສົມບູນ ປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2025,
ບົດລາຍງານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2025 ຂອງແຂວງ, ບົດລາຍງານ ການຈັດຕັ້ງປະຕິບັດໂຄງການລົງທຶນຂອງລັດ ປະຈໍາປີ 2025, ບົດລາຍງານກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດຂອງແຂວງ ປະຈໍາ 6 ເດືອນຕົ້ນປີ ແລະ ທິດທາງແຜນ ການ 6 ເດືອນທ້າຍປີ 2025, ບົດລາຍງານ ກ່ຽວກັບຜົນກະທົບຈາກໂຄງການຂຸດຄົ້ນ, ປຸງແຕ່ງແຮ່ທາດ ຢູ່ພາຍໃນແຂວງ ແຕ່ປີ 2021 ຮອດປະຈຸບັນ ມີຈຸດດີ, ຈຸດອ່ອນ, ຂໍ້ຄົງຄ້າງ ຄືແນວໃດ ແລະ ຈະມີວີທີແກ້ໄຂຄືແນວໃດໃນຕໍ່ໜ້າ, ຮັບຟັງບົດລາຍງານກ່ຽວກັບການຈັດຕັ້ງປະຕິບັດແຜນພັດທະນາວຽກງານທ່ອງທ່ຽວແຂວງໄຊສົມບູນ ແຕ່ປີ 2021 ຮອດປະຈຸບັນ, ບົດລາຍງານກ່ຽວກັບການຈັດຕັ້ງປະຕິບັດ ການໂຄສະນາເຜີຍກົດໝາຍ ແລະ ນິຕິກໍາໃຕ້ກົດໝາຍ ແລະ ທິດທາງແຜນການໃນຕໍ່ໜ້າ, ຮັບຟັງການລາຍງານ ການຈັດຕັ້ງປະຕິບັດການເຄື່ອນໄຫວວຽກງານ ໄລຍະແຕ່ກອງປະຊຸມສະໄໝສາມັນ ເທື່ອທີ 8 ຫາກອງປະຊຸມສະໄໝສາມັນ ເທື່ອທີ 9 ແລະ ທິດທາງແຜນການຮອດກອງປະຊຸມສະໄໝສາມັນ ເທື່ອທີ 10 ຂອງສະພາປະຊາຊົນແຂວງ ໄຊສົມບູນ ຊຸດທີ II. ກອງປະຊຸມຍັງຈະໄດ້ຮັບຮອງເອົາກົງຈັກ ອົງການປົກຄອງ ແລະ ບຸກຄະລາກອນຈຳນວນໜຶ່ງ ຕາມການສະເໜີຂອງຫົວໜ້າອົງການປົກຄອງແຂວງ ແລະ ຈະໄດ້ອອກມະຕິຮັບຮອງເອົາວຽກງານທີ່ສຳຄັນ ຈຳນວນ 6 ສະບັບ ຕື່ມອີກ.
ພ້ອມນີ້ ຍັງຈະໄດ້ຮັບຟັງການອະທິບາຍ, ຊີ້ແຈງຈາກການນໍາແຂວງ ແລະ ພະແນກການກ່ຽວຂ້ອງຈໍານວນໜຶ່ງ ຕໍ່ຄໍາຊັກຖາມຂອງບັນດາສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ. ກອງປະຊຸມຄັ້ງນີ້ ຈະດໍາເປັນເວລາ 3 ວັນ ຈຶ່ງຈະສໍາເລັດ ບັນດາທ່ານສາມາດສົ່ງຄໍາຄິດຄໍາເຫັນ ແລະ ຄໍາສະເໜີໄປຍັງກອງປະຊຸມໄດ້ ໂດຍຜ່ານໂທລະສັບສາຍດ່ວນໝາຍເລກ 026 156 ຕະຫຼອດໄລຍະຂອງກອງປະຊຸມ.