ຄະນະບໍລິຫານງານພັກ ແຂວງໄຊສົມບູນ ໄດ້ຈັດກອງປະຊຸມຄົບຄະນະບໍລິຫານງານເປີດກວ້າງ ຄັ້ງທີ 20 ສະໄໝທີ l ໃນວັນທີ 17 ກໍລະກົດ ນີ້ ທີ່ຫ້ອງປະຊຸມຫ້ອງວ່າການແຂວງ ໂດຍການເປັນປະທານຂອງສະຫາຍ ພອຍຄໍາ ຮຸ່ງບຸນຍວງ ເລຂາພັກແຂວງ, ເຈົ້າແຂວງໄຊສົມບູນ, ມີຮອງເລຂາພັກແຂວງ, ຄະນະປະຈໍາພັກແຂວງ, ກຳມະການພັກແຂວງ, ເລຂາພັກເມືອງ, ເລຂາໜ່ວຍພັກພະແນກການ, ອົງການ, ກົມກອງອ້ອມຂ້າງແຂວງເຂົ້າຮ່ວມ.
ໂອກາດນີ້ ສະຫາຍ ພອຍຄໍາ ຮຸ່ງບຸນຍວງ ໄດ້ມີຄຳເຫັນກ່າວເປີດກອງປະຊຸມ ຊຶ່ງກອງປະຊຸມຄັ້ງນີ້ ກໍເພື່ອທົບທວນຄືນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກ, ໄລຍະທ້າຍມະຕິກອງປະຊຸມໃຫຍ່ຄັ້ງທີ I ຂອງອົງຄະນະພັກແຂວງ, ຕີລາຄາການນໍາພາ-ຊີ້ນໍາວຽກງານຮອບດ້ານ ຂອງຄະນະບໍລິຫານງານພັກແຂວງ ໄລຍະ 6 ເດືອນຕົ້ນປີ ແລະ ຄົ້ນຄວ້າວາງທິດທາງແຜນການ 6 ເດືອນທ້າຍປີ 2025 ເພື່ອເຫັນໄດ້ດ້ານຕັ້ງໜ້າຜົນສໍາເລັດ, ບັນຫາຄົງຄ້າງ, ສາເຫດ ແລະ ມາດຕະການແກ້ໄຂໃນຕໍ່ໜ້າ ສະຫາຍໄດ້ຮຽກຮ້ອງໃຫ້ຜູ້ເຂົ້າຮ່ວມ ຈົ່ງພ້ອມກັນຍົກສູງຄວາມຮັບ ຜິດຊອບ ສຸມສະຕິປັນຍາ ເຂົ້າໃນການຄົ້ນຄວ້າ ປະກອບຄໍາຄິດຄໍາເຫັນ ຕໍ່ບັນດາເນື້ອໃນທີ່ນໍາມາລາຍງານໃນກອງປະຊຸມ ເພື່ອພ້ອມກັນຊອກຫາວິທີທາງມາດຕະການແກ້ໄຂບັນຫາທີ່ຍັງຄົງຄ້າງໃຫ້ດີຂຶ້ນກວ່າເກົ່າ.
ຈາກນັ້ນ ສະຫາຍ ອຸດອນ ສິງດາລາ ກຳມະການພັກແຂວງ, ຫົວໜ້າຫ້ອງວ່າການ ແຂວງໄຊສົມບູນ ໄດ້ຜ່ານຮ່າງບົດສະຫຼຸບຕີລາຄາການນໍາພາ-ຊີ້ນໍາວຽກງານຮອບດ້ານ ຂອງຄະນະບໍລິຫານງານພັກແຂວງ ໄລຍະ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2025 ຊຶ່ງຕະຫຼອດໄລຍະຜ່ານມາ ຄະນະບໍລິຫານງານພັກແຂວງ ສາມາດຍາດໄດ້ຜົນສໍາເລັດຫຼາຍດ້ານ ເປັນຕົ້ນ ໄດ້ເອົາໃຈໃສ່ສຶກສາອົບຮົມການ ເມືອງ-ນໍາພາແນວຄິດ ໃຫ້ແກ່ສະມາຊິກພັກ, ພະນັກງານ-ລັດຖະກອນ, ທະຫານ, ຕຳຫຼວດ ຕະຫຼອດຮອດພໍ່ແມ່ປະຊາຊົນບັນດາເຜົ່າ ໃນຂອບເຂດທົ່ວແຂວງ, ໄດ້ສໍາເລັດການຈັດຕັ້ງໂຮມຊຸມນຸມສະເຫຼີມສະຫຼອງວັນສ້າງຕັ້ງພັກ ຄົບຮອບ 70 ປີ ແລະ ເອົາໃຈໃສ່ຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານຂອງພັກຢ່າງແຂງແຮງ ໃນນີ້, ໄດ້ສຸມໃສ່ລົງຕິດຕາມ, ຊຸກຍູ້ພະນັກງານກຳລັງ ປະຈຳຢູ່ 13 ບ້ານຈຸດສຸມຂອງແຂວງ, ລົງປະເມິນບ້ານປ້ອງກັນຊາດເຂັ້ມແຂງ ແລະ ປະກາດຮັບຮອງໄດ້ 7 ບ້ານ, ປະກາດຮັບຮອງບ້ານປ້ອງກັນ ຄວາມສະຫງົບດີໄດ້ 11 ບ້ານ, ຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ສາມາດມ້າງເປົ້າໝາຍຄ້າ-ຂາຍຢາເສບຕິດ ໄດ້ 10 ລາຍ ກັກຕົວຜູ້ຖືກຫາໄດ້ 42 ຄົນ, ຄຽງຄູກັນນີ້ ກໍໄດ້ນໍາພາ-ຊີ້ນໍາຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຄັ້ງທີ II ຂອງແຂວງ ກໍຄືແຜນພັດທະນາ ເສດຖະກິດ-ສັງຄົມປະຈຳປີ 2025 ຕິດພັນກັບດຳລັດ 414/ລບ, 2 ວາລະແຫ່ງຊາດເຂົ້າສູ່ລວງເລິກ ເຮັດໃຫ້ເສດຖະກິດ ຂອງແຂວງ (GDP) ຂະຫຍາຍຕົວໃນລະດັບ 8%, ໂຄງການລົງທຶນຂອງລັດ ມີທັງໝົດ 170 ໂຄງການ, ມູນຄ່າ 177,000 ຕື້ກວ່າກີບ, ສາມາດຈັດເກັບລາຍຮັບເຂົ້າງົບປະມານໄດ້ທັງໝົດ 1,200 ຕື້ກວ່າກີບ ພ້ອມນີ້ ກໍໄດ້ຊຸກຍູ້, ຕິດຕາມ, ສົ່ງເສີມປະຊາຊົນທຳການຜະລິດສະບຽງອາຫານ ເປັນຕົ້ນ ແມ່ນການປູກ-ການລ້ຽງ ເພື່ອຮັບປະກັນຄວາມໝັ້ນຄົງທາງດ້ານສະບຽງອາຫານ ແລະ ການຜະລິດເປັນສິນຄ້າ ສ່ວນວຽກງານດ້ານອື່ນໆ ກໍໄດ້ມີການຈັດຕັ້ງປະຕິບັດ.
ພ້ອມນີ້ ຍັງໄດ້ຮັບຟັງການປະກອບຄຳເຫັນຈາກພາກສ່ວນທີ່ກ່ຽວຂ້ອງ ກ່ຽວກັບການກະກຽມ ແລະ ປັບປຸງກົງຈັກການຈັດຕັ້ງທົ່ວແຂວງ, ວຽກງານກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ, ການເກັບກໍາສະພາບຫາງສຽງຂອງສັງຄົມ ທີ່ມີຕໍ່ການນໍາພາ-ຊີ້ນໍາ ແລະ ແນວທາງນະໂຍບາຍຂອງພັກ-ລັດ ກໍ່ຄືການນໍາພາ-ຊີ້ນໍາຂອງຄະນະບໍລິຫານງານພັກແຂວງ, ການຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ ຕິດພັນການການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ພ້ອມດຽວກັນນີ້ ຜູ້ເຂົ້າຮ່ວມກໍໄດ້ປະກອບຄຳເຫັນ ດ້ວຍຄວາມຮັບຜິດຊອບສູງ ເພື່ອຊອກຫາວິທີການແກ້ໄຂບັນຫາຂໍ້ຄົງຄ້າງໃຫ້ດີ ຂຶ້ນກວ່າເກົ່າໃນຕໍ່ໜ້າ. ກອງປະຊຸມຄັ້ງນີ້ ຈະດຳເນີນເປັນເວລາ 2 ວັນຈຶ່ງຈະສໍາເລັດ.
